BILONG HELPIM FAMILI | OL YANGPELA
Rot Bilong Sakim Ol Traim
HATWOK BILONG EN
“Sampela taim ol meri i save askim long fon namba bilong mi, long wanem, ol i laik prenim mi. Mi no save givim namba bilong mi. Tasol sampela taim mi save tingting olsem, ‘Wanem samting bai kamap sapos mi givim fon namba bilong mi?’ Sampela bilong ol dispela meri i luk nais tru. Na em i isi long ting olsem, ‘Ating i nogat rong long givim fon namba bilong mi.’”—Carlos, a em i gat 16 krismas.
Yu gat wankain hevi olsem Carlos? I hatwok long yu long sakim ol traim? Sapos olsem, dispela atikol inap helpim yu.
SAMTING YU MAS SAVE LONG EN
Sapos yu larim traim i daunim yu, hevi bai painim yu
Maski man i gat hamas krismas, em inap pundaun long ol traim. Traim i ken painim man long kain kain rot. Tingim aposel Pol, em i gat bikpela krismas taim em i tok: “Mi laikim tumas lo bilong God. Tasol mi lukim olsem narapela lo i stap insait long bodi bilong mi. Na dispela lo i save pait wantaim lo i stap long tingting bilong mi. Na dispela lo bilong sin i wok long kalabusim mi.” (Rom 7:22, 23) Pol i bin sakim ol traim, olsem na yu tu inap mekim olsem! Sapos yu bihainim laik bilong bodi i olsem yu stap wokboi bilong en. (1 Korin 9:27) Olsem na taim yu yangpela yet i gutpela long skulim yu yet long rot bilong sakim ol traim. Long dispela rot yu inap abrusim ol hevi na dispela bai lukautim yu taim yu go bikpela.
Ol muvi na ol nius samting inap mekim man i pundaun long traim. Baibel i tok, “ol laik i save kamap long bel bilong ol yangpela” i strong tru. (2 Timoti 2:22) Ol man i kamapim ol muvi, musik, na ol buk samting bilong kirapim ol yangpela long ting olsem i nogat rong long bihainim laik bilong bodi. Olsem, long ol muvi sapos man na meri i laikim narapela narapela, orait ol bai mekim marit pasin. Tasol Baibel i tok sapos man na meri i rispektim narapela narapela ol bai “sakim ol laik bilong bel.” (1 Pita 2:11) Dispela i makim olsem yu inap sakim ol traim. Wanem samting bai helpim yu long mekim olsem?
SAMTING YU KEN MEKIM
Luksave long ol traim. Sapos yu larim laik bilong yu i bosim yu, ating bai i hatwok long sakim ol traim. Yu mas was gut long wanem ol samting?—Stiatok bilong Baibel: Jems 1:14.
Redim tingting. Tingim ol samting inap kamap bilong traim yu. Taim yu mekim olsem dispela bai helpim yu long sakim ol traim.—Stiatok bilong Baibel: Sindaun 22:3.
Strongim bilip bilong yu. Baibel i tok taim traim i kamap long pulim Josep long mekim marit pasin, em i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” (Stat 39:9) Dispela tok “olsem wanem bai mi mekim dispela pasin nogut tru?” i soim olsem Josep i holimpas bilip bilong em long bihainim stretpela pasin. Olsem wanem? Yu tu i gat wankain tingting olsem Josep?
Painim ol gutpela pren. Yu inap sakim ol traim sapos yu pren wantaim ol man i gat wankain bilip olsem bilong yu. Baibel i tok: “Man i wokabaut wantaim man i gat gutpela tingting, orait em tu bai i kisim gutpela tingting.” —Sindaun 13:20.
Abrusim ol samting we inap mekim yu pundaun long ol traim. Olsem:
-
No ken stap wanpis wantaim man o meri husat i no poroman marit bilong yu.
-
Bilong sakim pasin bilong lukim ponografi, no ken yusim Intenet long taim yu yet i stap.
-
No ken poroman wantaim ol man i save mekim ol tok na pasin i no stret.
Yu inap bihainim wanem pasin na bai yu inap sakim ol traim?—Stiatok bilong Baibel: 2 Timoti 2:22.
Beten long kisim helpim. Jisas i tokim ol disaipel: “Yupela i mas was i stap na beten oltaim bai yupela i no ken pundaun long traim.” (Matyu 26:41) Dispela i kamapim klia olsem God i laik bai yu mas sakim ol traim, olsem na em bai helpim yu long mekim olsem. Na tu, Baibel i tok: “Em i no inap larim wanpela traim i kamap long yupela i winim strong bilong yupela. Nogat. Taim traim i painim yupela, em bai wokim rot bilong helpim yupela long sanap strong na bai traim i no inap daunim yupela.” —1 Korin 10:13.
a Mipela i bin senisim nem.