Bilong kisim bekim bilong dispela askim, yumi laik stori long ol samting inap kamap.

Yu ting husat i stap amamas tru?

• ALEX

  Alex i gat wanpela bisnis. Em man bilong tok tru na wok hat, na em i save mekim ol gutpela pasin. Bisnis bilong Alex i go bikpela na dispela i mekim na em wantaim famili bilong em i gat gutpela sindaun tru.

• PETER

  Peter i gat wankain bisnis olsem Alex, tasol em i gat planti mani moa long Alex. Em i save wok ovataim, long wanem, em i laik winim Alex, tasol dispela i mekim na em i sik.

• JANET

  Janet em wanpela skul sumatin na em i save givim bel tru long mekim skul wok bilong en. Olsem na em i kisim ol gutpela mak long skul.

• HELEN

  Helen i save kisim ol gutpela mak long skul winim Janet, tasol em i save lukstil long ol eksem na em i no gat bikpela laik long skul.

Sapos yu bekim olsem Peter na Helen, o olgeta bilong ol i stap amamas, i luk olsem yu tingim samting man i kisim i mekim em i stap amamas tru, maski em i bihainim wanem rot long kisim ol dispela samting.

Sapos yu makim Alex na Janet, dispela i soim olsem yu tingim pasin ol man i mekim i as na ol i stap amamas. Em stret long gat kain tingting olsem. Yumi ken skelim sampela eksampel.

• Wanem samting inap helpim Janet long bihain? Kisim ol gutpela mak long skul o kisim pasin bilong laikim skul?

• Wanem samting i bikpela samting long ol pikinini bilong Alex? Ol i laik bai papa i mas lusim sampela haptaim wantaim ol o ol i laik kisim olgeta samting em papa inap baim?

Poin em olsem: Amamas bilong sotpela taim i olsem man i mekim ol samting bilong kisim biknem, tasol amamas tru em olsem man i bihainim ol gutpela na stretpela pasin.