Pikinini bilong yu i gat 5-pela krismas i pilai i stap long narapela rum. Bihain yu harim pairap bilong wanpela samting i pundaun. Yu ran i go long rum na lukim olsem wanpela naispela botol ston i bruk bruk olgeta. Pes bilong pikinini i soim olsem em i mekim rong.

Yu askim strong pikinini: “Yu brukim dispela botol, a?”

Kwiktaim em i tok: “Nogat mama, mi no mekim!”

Dispela i no namba 1 taim pikinini bilong yu i tok giaman. Olsem na dispela i mekim na yu tingting planti?

Olgeta tok giaman i nogut. Baibel i tok God Jehova i no laikim “pasin bilong mekim tok giaman.” (Sindaun 6:16, 17) Lo God i bin givim long lain Israel i tokaut long strafe man bai kisim sapos em i tok giaman long narapela man.—Wok Pris 19:11, 12.

Olgeta tok giaman i no wankain. Sampela man i save tok giaman bilong bagarapim gutnem bilong ol narapela. Na sampela taim ol man i tok giaman, long wanem, ol i no laik kisim sem long ai bilong narapela o ol i mekim olsem bilong abrusim strafe. (Stat 18:12-15) I gat kain kain tok giaman, sampela bilong ol i nogut moa. Sapos pikinini bilong yu i tok giaman, tingim krismas bilong em na as na em i mekim olsem.

Yu mas givim tok bilong helpim pikinini maski em i liklik yet. Dokta David Walsh i raitim wanpela buk, na em i tok: “Maski i hatwok long skulim ol pikinini long mekim tok tru, dispela em gutpela skul pikinini i mas kisim. Bilong i stap pren bilong narapela, man i mas i gat pasin bilong trastim narapela, pasin bilong tok giaman bai bagarapim pasin pren bilong ol.” a

No ken tingting planti. Tru, pikinini bilong yu i tok giaman, tasol dispela i no makim olsem em bai kamap man nogut. Baibel i tok: “Ol pikinini i save mekim olkain longlong pasin.” (Sindaun 22:15) Sampela pikinini i tok giaman, long wanem, ol i no laik kisim panismen. Olsem na samting yu mekim long stretim pikinini i bikpela samting.

Save gut long as na pikinini i tok giaman. Em i save pret long kisim panismen? O em i no laik bai yu bel hevi? Sapos pikinini bilong yu i save mekim ol giaman stori, dispela i makim olsem em i liklik yet na em i no save long ol stori tru na ol stori giaman. Sapos yu save long as na pikinini i tok giaman, bai yu inap long stretim em.—Stiatok bilong Baibel: 1 Korin 13:11.

Toktok wantaim ol na no ken givim tasol ol askim. Long kirap bilong stori, mama i save pinis long samting i kamap, tasol em i askim strong pikinini: “Yu brukim dispela botol, a?” Pikinini i giaman, long wanem, ating em i pret olsem mama bai kros. Mama i ken mekim kain tok olsem: “Aiyo! Yu brukim botol ya!” Taim em i tok olsem na em i no askim strong pikinini, orait dispela bai helpim pikinini long kisim pasin bilong mekim tok tru tasol.—Stiatok bilong Baibel: Kolosi 3:9.

Tok amamas long pikinini taim em i tok tru. Ol pikinini i laik bai ol papamama i mas amamas long ol, olsem na taim yu tok olsem dispela bai mekim gut bel bilong ol. Helpim pikinini long save olsem pasin bilong tok tru em bikpela samting, olsem na yu laik bai em i mas tok tru.—Stiatok bilong Baibel: Hibru 13:18.

Kamapim klia long pikinini olsem taim man i tok giaman, ol narapela i no inap bilip moa long em, na i hatwok long ol bai trastim em gen. Tok amamas long pikinini taim em i tok tru na dispela bai strongim em long bihainim dispela pasin. Yu ken tok: “Mi amamas long yu tok tru.”

Stap gutpela eksampel. Sapos yu yet i mekim ol kain tok giaman olsem, “Tokim em mi no stap long haus,” tasol tru tru yu no laik toktok long fon. O yu tok, “Mi sik na mi stap long haus,” tasol tru tru yu laik malolo. Taim yu mekim olsem, pikinini i luksave long dispela, olsem na em bai bihainim pasin bilong yu long tok giaman.—Stiatok bilong Baibel: Jems 3:17.

Yusim tok bilong Baibel. Ol stiatok na ol stori bilong ol man i stap long Baibel i strongim pasin bilong mekim tok tru tasol. Buk Kisim Skul Long Bikpela Tisa, em ol Witnes Bilong Jehova i wokim, inap helpim yu long putim ol stiatok bilong Baibel long bel bilong pikinini. Long sapta 22 bilong dispela buk, i gat dispela het tok, “Bilong Wanem Yumi No Ken Giaman?” (Lukim hap tok bilong en long blok “ Wanpela Buk Bilong Helpim Pikinini Bilong Yu.”) Buk