BAIBEL I TOK WANEM?
Pasin Bilong i Stap Klin
Yu ting pasin bilong i stap klin long skin i bikpela samting long God?
“Yumi mas rausim olgeta pasin doti bilong skin na bilong tingting.”—2 Korin 7:1.
BAIBEL I TOK
Krieta bilong yumi i laikim yumi, olsem na em i laik bai yumi gat gutpela helt, na yumi ken i stap longpela taim na mekim ol gutpela wok. God i tok: “Oltaim yu mas tingim gut. Sapos yu bihainim dispela tok bai yu stap longpela taim long graun na bai yu sindaun gut tru.” (Sindaun 3:1, 2) God i soim pasin laikim bilong em long ol man taim em i givim lo long lain Israel long pasin bilong i stap klin long skin. (Lo 23:12-14) Lain Israel i bihainim gut ol dispela lo, olsem na ol i gat gutpela helt. Na tu, dispela i lukautim ol na ol i no kisim ol arapela sik we i painim ol narapela lain, olsem lain Isip, em ol i no gat ol dispela kain lo bilong lukautim ol.—Lo 7:12, 15.
Long nau tu, ol man husat i “rausim olgeta pasin doti bilong skin,” olsem pasin bilong smok, dring planti, na kisim drak samting, ol i abrusim olkain sik bilong skin na tingting, na tu, ol i no dai long taim ol i yangpela yet. Na tu, pasin bilong bihainim gut ol lo bilong God long i stap klin i soim olsem yumi tingim tu ol narapela.—Mak 12:30, 31.
Yu ting God i laik bai yumi stap klin long pasin na long ol samting bilong lotu?
“Yupela i mas kilim i dai ol laik i stap long ol hap bilong bodi bilong yupela, olsem pasin pamuk, pasin i no klin, bel i kirap, ol laik nogut, na pasin gridi, em wankain olsem pasin bilong lotuim imis. Ol dispela samting i as na belhat bilong God bai kam.”—Kolosi 3:5, 6.
BAIBEL I TOK
Olsem yumi ritim pinis, Baibel i tok yumi mas “rausim olgeta pasin doti bilong skin na bilong tingting.” Long taim bilong Krais Jisas, planti manmeri na ol bikman bilong lotu Juda i bin wok strong tru long i stap klin long skin, tasol ol i givim baksait long ol lo bilong stretpela pasin na long ol samting bilong lotu. (Mak 7:1-5) Jisas i laik bai ol man i kisim stretpela tingting long dispela, olsem na em i tok: “I no gat wanpela samting i stap ausait long man na i go insait long en inap mekim em i kamap doti? Long wanem, . . . em i go long ol bel rop na i kamaut na i go daun long toilet. . . . Samting i stap insait long man na i kam ausait, dispela i mekim man i kamap doti. Ol tingting nogut i kamap insait long bel bilong man na i kam ausait, dispela i save kamapim ol pasin olsem: pasin pamuk, stil, kilim man i dai, pasin adaltri, pasin gridi, pasin nogut, giaman, pasin bikhet na i no sem, aigris, . . . na longlong pasin. Olgeta dispela samting nogut . . . i mekim man i kamap doti.”—Mak 7:18-23.
Jisas i tok ol man husat i strong tumas long i stap klin long bodi, tasol ol i givim baksait long ol lo bilong God long stretpela pasin na long ol samting bilong lotu, ol i olsem kap i klin long ausait, tasol insait bilong en i doti.—Matyu 23:25, 26.
Yu ting ol lo bilong Baibel inap helpim yu?
“Pasin bilong laikim God i olsem, yumi bihainim ol lo bilong en na ol lo bilong en i no givim hevi long yumi.”—1 Jon 5:3.
BAIBEL I TOK
Maika 6:8 i tok: “Bikpela i . . . laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol.” Ol dispela samting God i laik bai yumi mekim i no hatwok. Na em i laik bai yumi bihainim tok bilong em, long wanem, yumi laikim em tru. Na taim yumi mekim olsem, yumi inap stap amamas tru. (Song 40:8) Maski taim yumi popaia, marimari bilong God inap mekim gut bel bilong yumi. Baibel i tok: “Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.” Olsem na God i save long ol pen na hevi yumi karim, na tu, em i luksave olsem sampela taim yumi save popaia.—Song 103:13, 14.
Olsem na yumi kisim save olsem ol lo bilong God long i stap klin long skin, pasin na tingting, na ol samting bilong lotu i kamapim klia gutpela pasin na pasin laikim bilong God long yumi. Taim yumi amamas long bihainim ol dispela lo, em i soim olsem yumi gat savetingting na yumi laikim tru God.
Ating Yu Bai Laikim Tu
WASTAUA
Tingting Bilong God Long Pasin Bilong Smok
Baibel i no stori long smok tabak, olsem na hau yumi save olsem i no stret long smok?
