Stori long bekgraun bilong yu.

Mi go bikpela long famili we papamama i tingim lotu olsem bikpela samting, na tu, ol i gat onest pasin na ol i save wok hat. Ol i kirapim mi long go long bikpela skul, olsem na mi kisim kos bilong bisnis long University of New South Wales. Mi amamas long mekim ol wok painimaut, olsem na mi kamap wanpela tisa.

Yu mekim wanem wok painimaut?

Mi gat laik long save long wok ol i save mekim long stok maket. a Long stok maket ol kampani i save kisim na givim mani em ol i kolim sea long ol narapela bikpela bisnis. Na taim ol i kisim winmani orait ol man i gat sea inap long kisim mani bilong ol. Na tu, mi mekim wok painimaut long olsem wanem ol kampani i save kisim bikpela winmani.

Yu inap stori long wanpela eksampel?

Long olgeta taim ol kampani i mas tokaut long hamas mani ol i kisim na bai ol man i investim mani i save long hamas mani ol i gat. Tasol sampela taim ol kampani i no bihainim stret lo bilong tokaut long ol winmani ol i kisim. Ol saveman i painimaut olsem ol kampani i mekim olsem na bai ol i no ken tokaut stret long hamas mani na winmani ol i gat. Olsem na hau bai ol man i investim mani i save long hamas mani stret kampani i save kisim? Na tu, olsem wanem ol man bilong skelim ol stok maket bai save olsem ol kampani i bihainim stret ol lo bilong salim ol sea bilong ol? Mi na ol wanwok  bilong mi i save mekim ol wok painimaut long ol kain samting olsem.

Yu go bikpela long wanem lotu?

Taim mi liklik mi save go wantaim papamama long lotu Presbitirian, tasol taim mi kamap tineja mi no go moa long lotu. Mi bilip long Krieta na mi rispektim Baibel, tasol mi ting lotu i no inap pinisim ol hevi bilong mi. Mi tingim lotu olsem ol grup nating we ol man i go bilong bung wantaim. Taim mi go long Yurop, mi lukim sampela bikpela haus lotu na mi tingting olsem, bilong wanem ol lotu i gat bikpela mani samting na long planti hap bilong graun ol man i stap rabis. Mi ting dispela i no stret, olsem na mi gat tupela tingting long ol lotu.

Bilong wanem yu senisim tingting bilong yu?

Meri bilong mi Jennifer i kirap stadi long Baibel wantaim ol Witnes Bilong Jehova na em i go long ol miting bilong ol. Olsem na mi ting i gutpela mi go wantaim em na bai mi inap save ol Witnes i wanem kain lain. Taim mi go long miting bilong ol, mi luksave olsem mi nogat save long tok bilong Baibel. Em samting mi kirap nogut long en! Olsem na mi kirap stadi long Baibel wantaim ol Witnes.

Mi amamas long pasin bilong ol Witnes long stadi wantaim ol man long Baibel. Ol i givim ol askim, mekim wok painimaut na skelim gut ol dispela tok wantaim Baibel, em pasin mi save yusim taim mi mekim wok tisa! Bihain meri bilong mi Jennifer i kisim baptais. Na long 1999, mi tu i kisim baptais olsem wanpela Witnes Bilong Jehova.

Save bilong yu long bisnis i strongim bilip bilong yu long Baibel?

Yes. Olsem, Lo em God i givim long lain Israel bilong bipo i stori long rot bilong stretim hevi bilong mani, na yumi inap bihainim wankain pasin long stretim ol hevi em planti bisnis long nau i kisim. Lo i tok lain Israel i mas bungim kaikai bilong givim long ol rabisman, dispela i wankain long pasin bilong baim takis na insurens. Na tu, lain Israel i save givim dinau mani long ol man i sot, tasol ol i no ken askim long winmani. Olsem tasol, long nau sampela benk i no askim long kisim bikpela winmani long ol man i ken kisim dinau. Narapela samting em olsem, bihain long 50 yia lain Israel i mas givim bek graun long papa tru bilong en. Na long nau tu i gat ol lo bilong lukautim graun na haus samting bilong ol man. (Wok Pris 19:9, 10; 25:10, 35-37; Lo 24:19-21) Ol dispela lo i helpim lain Israel long 3-pela rot: (1) helpim ol taim ol i gat hevi bilong mani, (2) helpim ol long stretim sindaun bilong ol bihain long bikpela hevi bilong mani i pinis, na (3) helpim ol na bai i no gat wansait pasin long ol wok bisnis samting. Tingim, olgeta dispela samting i kamap winim 3,000 yia paslain long ol saveman i kamapim save bilong bisnis!

Baibel i stori tu long ol pasin yumi ken bihainim bilong lukautim yumi yet long sait bilong mani. Olsem, Baibel i skulim ol man long bihainim onest pasin, tingim ol narapela, na mekim gut long ol. (Lo 15:7-11; 25:15; Song 15) I no longtaim i go pinis, bihain long bikpela hevi bilong mani, sampela skul bilong bisnis na ol oganaisesen i kirapim ol bikman bilong kampani long bihainim stretpela pasin long wok bisnis. Tasol mi ting ol stretpela lo bilong Baibel i winim tru ol lo na stiatok bilong ol oganaisesen bilong graun.

Bilip bilong yu i helpim yu olsem wanem?

Jennifer i tok nau mi holim stretpela tingting! Pastaim mi gat hatpela pasin na mi save ting olsem ol samting i mas kamap gut tasol. Ating dispela em as na mi mekim gut long skul bilong bisnis! Tasol ol stiatok bilong Baibel i helpim tru i stap bilong mi. Nau mi na famili bilong mi i stap amamas tru. Na tu, mipela i amamas long stori wantaim ol narapela long gutpela savetok bilong Baibel. Taim mi kirap long stadi long Baibel, dispela i gutpela disisen tru mi bin mekim.