PLANTI man i ting dispela animal i luk nais, tasol ol arapela i ting em i luk narakain tru. Em i gat longpela lek, gras bilong en i smut, na em i gat bikpela ai. Dispela animal i longpela inap olsem 12.5 sentimita na hevi bilong bodi bilong en em 114 gram. Wanem dispela animal? Nem bilong en tarsier!

Yumi ken stori long wanpela bilong ol dispela animal, em tarsier bilong Filipins. Na bai yu luksave olsem bodi bilong en i narakain tru. Ai, yau, han, lek, na tel bilong en i bikpela winim bodi bilong en.

YAU: Yau bilong tarsier i save pas na op gen bilong harim ol saun i stap longwe tru. Em inap harim gut ol saun, olsem na em i save hait long ol narapela animal olsem ol wel pusi. Tasol em inap tu long painim ol arapela animal bilong kaikai. Na tu, taim ples i wok long go tudak nois bilong ol liklik binatang olsem ol kriket na ol anis, na ol rokrok na ol liklik pisin, i save helpim em long painim kaikai bilong en. Taim em i harim nois bilong ol dispela animal, em i save tanim het bilong en i go long hap we nois i kam long en.

HAN: Han bilong tarsier inap holim strong ol liklik han bilong diwai. Ol pinga bilong tarsier i gat kain samting olsem glu long en wankain olsem tret i stap long ol taia. Maski tarsier i slip, em inap long holim strong diwai. Na tu, long tel bilong en i gat wankain samting olsem glu i stap, olsem na maski em i slip em i no inap pundaun.

 AI: Tarsier i gat bikpela ai na liklik bodi na dispela i narakain long ol narapela animal. Ai bilong en i bikpela moa winim kru bilong en! Em i no inap muvim ai bilong en, olsem na em i save lukluk stret tasol. Yu ting dispela i pasim tarsier long lukim gut ol samting? Nogat. Em inap tanim nek bilong en inap olsem 180 digri i go long left na rait sait.

LEK: Ol tarsier i gat longpela lek, olsem na ol inap kalap longwe inap olsem 6 mita! Taim dispela animal i painim kaikai long nait, em i save opim han bilong en na kalap kwiktaim tru bilong ketsim narapela animal.

Sapos ol man i lukautim tarsier long wanpela banis em inap dai, long wanem, em i no inap long painim ol binatang samting we em i save kaikai. Na tu, ol tarsier i no laik bai ol man i lukautim ol. Maski i olsem, ol manmeri bilong Filipins i amamas long lukim dispela narakain animal. Klostu olgeta hap bilong bodi bilong dispela animal i narakain tru.