BAIBEL I TOK WANEM?
Ol Pen na Hevi
Sampela man i ting God i as bilong ol pen na hevi, na sampela arapela i ting God i lukim ol pen na hevi bilong yumi, tasol em i no laik helpim yumi. Tasol Baibel i tok wanem? Bai yu kirap nogut long bekim em Baibel i kamapim.
Yu ting God i as bilong ol pen na hevi?
“Mi tok tru, God I Gat Olgeta Strong i no inap rongim wanpela man.”—Jop 34:12.
OL MAN I TOK
Sampela man i tok olgeta samting i kamap em laik bilong God, olsem na ol i ting God i as bilong ol pen na hevi. Na tu, ol i ting long rot bilong ol disasta God i givim strafe long ol man i bikhet.
BAIBEL I TOK
Baibel i kamapim klia olsem God i no as bilong ol pen na hevi yumi karim. Olsem na Baibel i tok taim hevi i painim yumi, yumi no ken tok: “God i traim mi.” Long wanem, “ol samting nogut i no inap traim God, na tu, God i no save traim man.” (Jems 1:13) I klia tru olsem God i no save traim yumi, na tu, em i no as bilong ol pen na hevi i painim yumi. Baibel i tok, ‘God i no inap rongim wanpela man,’ na dispela i makim olsem em i no inap givim pen na hevi long yumi.—Jop 34:12.
God i no as bilong ol pen na hevi, olsem na husat tru i as bilong en? Planti taim, ol man yet i save birua na mekim nogut long narapela narapela. (Saveman 8:9) Na tu, sampela taim hevi i kamap, long wanem, “taim nogut i save painim yumi olgeta.” Olsem, ating yumi stap long wanpela hap we eksiden i kamap. (Saveman 9:11) Baibel i tok, Satan em “hetman bilong dispela graun,” olsem na em i as bilong olgeta pen na hevi i painim ol man, long wanem, “dispela graun olgeta i stap long han bilong Satan.” (Jon 12:31; 1 Jon 5:19) Olsem na Satan i as bilong ol pen na hevi, na i no God.
Yu ting God i tingim ol pen na hevi bilong yumi?
“Long taim ol i karim pen na hevi, Bikpela tu i bin karim pen na hevi wantaim ol.”—Aisaia 63:9.
OL MAN I TOK
Sampela man i tok God i no tingim ol pen na hevi bilong yumi. Olsem, wanpela man bilong raitim buk i tok, God i “lukim yumi karim ol pen na hevi, tasol em i no tingim yumi.” Dispela man i tok sapos God i stap tru, “em i no pilim hevi bilong ol man.”
BAIBEL I TOK
Baibel i tok God i pilim tru ol pen na hevi bilong yumi na klostu nau em bai pinisim olgeta hevi. Bilong mekim gut bel bilong yu, yumi ken stori long 3-pela tok i tru bilong Baibel.
God i save long ol pen na hevi bilong yumi. Long namba 1 taim pen na hevi i painim ol manmeri, Jehova a i luksave long dispela. Baibel i tok, ‘ai bilong God i save lukim olgeta man.’ (Song 11:4; 56:8) Olsem, long bipo taim ol man i mekim nogut long ol lain i lotuim God, em i tok: “Mi lukim pinis ol i wok long mekim nogut long ol manmeri bilong mi long Isip.” Yu ting God i lukluk tasol na em i no helpim ol? Nogat. Baibel i tok long God olsem: “Mi harim pinis dispela singaut na mi save tru long pen na hevi ol i karim.” (Kisim Bek 3:7) Planti manmeri i stap bel isi taim ol i kisim save olsem God i luksave long olgeta pen na hevi yumi karim, na em i save tu long ol traim i painim yumi, maski ol narapela i no save o kliagut long as bilong en.—Song 31:7; Sindaun 14:10.
God i save tingim tru yumi taim yumi karim pen na hevi. God Jehova i save long ol pen na hevi ol man i karim, na tu, em i pilim hevi bilong ol. Olsem, God i pilim tru hevi bilong lain bilong em long bipo taim ol i karim ol hevi. Baibel i tok: “Long taim ol i karim pen na hevi, Bikpela tu i bin karim pen na hevi wantaim ol.” (Aisaia 63:9) Maski God i gat bikpela strong winim ol man, em i pilim tru hevi bilong ol na i kain olsem ol dispela hevi i painim em yet. Tru tumas, “Jehova i gat pasin bilong sori tru na marimari.” (Jems 5:11) Na tu, em i save helpim yumi long karim ol pen na hevi.—Filipai 4:12, 13.
God bai pinisim olgeta pen na hevi bilong ol man. Baibel i tok God bai pinisim olgeta pen na hevi i painim ol man long graun olgeta. Long rot bilong Kingdom bilong Jehova long heven, em bai mekim ol bikpela senis long i stap bilong ol man na bai ol i ken stap gut. Long dispela taim, Baibel i tok promis olsem God “bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.” (Revelesen 21:4) Olsem wanem long ol manmeri husat i dai pinis? God bai kirapim bek ol na ol bai stap amamas long graun i nogat pen na hevi. (Jon 5:28, 29) Yu ting ol man bai tingim ol pen na hevi i painim ol long bipo? Jehova i tok promis olsem: “Ol man bai i no inap tingim moa ol samting i bin kamap bipo.”—Aisaia 65:17. b
