Lain Spen na Potugal, na ol pop i tokaut pinis long ol kantri ol i makim bilong bosim. Long 1455, Pop Nicholas Namba 5 i tok orait long lain Potugal i ken raun long sip long ol kantri long Atlantik Kos bilong Afrika, na ol i ken kisim olgeta samting ol i painim long ol dispela ples. Long 1479, long wanpela kontrak ol i kolim Treaty of Alcáçovas, Afonso Namba 5 bilong Potugal na pikinini man bilong em Prins John i tok orait long Ferdinand na Isabella bilong Spen long bosim Canary Islands. Lain Spen i luksave olsem Potugal i bosim ol wok bisnis bilong Afrika, na tu, ol i bosim kantri Asores, Kep Verd, na Madera. Tupela yia bihain, Pop Sixtus Namba 4 i strongim dispela kontrak olsem lain Potugal i ken bosim tu ol ples i stap long hap saut na hap is bilong Canary Islands.

Tasol Prins John em nau ol i kolim em olsem John Namba 2 bilong Potugal i tok ol kantri Columbus i painim i bilong lain Potugal. Tasol ol bikman bilong Spen i no wanbel long dispela tok, olsem na ol i tokim nupela pop em Alexander Namba 6 long givim rait long ol long bosim ol ples em Columbus i painim. Long dispela rot ol man bilong ol dispela ples i ken kamap Kristen.

 Bilong helpim lain Spen, Alexander i kamapim 3-pela lo. Namba 1, “long nem bilong God i gat olgeta strong,” ol i givim tok orait long lain Spen i ken bosim ol ples em Colombus i painim. Namba 2, Alexander i makim ol ples i stap inap 560 kilomita long hap wes bilong Kep Verd na i tokaut olsem lain Spen bai bosim ol dispela ples. Long rot bilong dispela lo, pop i brukim ol kantri! Namba 3 lo bilong Pop Alexander i helpim lain Spen long bosim ol ples i stap long hap is i go inap long India. Dispela i mekim na King John i belhat, long wanem, ol wokman bilong em i pinisim raun bilong ol long poin bilong Afrika. Na nau ol i laik go long ol ples i stap long solwara India, tasol lain Spen i bosim pinis ol dispela ples.

John i no amamas long disisen bilong Alexander, a olsem na em i stretim tok wantaim Ferdinand na Isabella. Man bilong raitim buk William Bernstein i tok: “Long dispela taim ol bikman bilong Spen i laik bosim Amerika, na tu, ol i pret long ol lain Potugal, olsem na ol i amamas long disisen bilong John.” Long 1494, ol i sainim wanpela kontrak long Tordesillas, em wanpela taun bilong Spen. Na ol i kolim dispela kontrak olsem Treaty of Tordesillas.

Dispela kontrak i mekim na ol i skruim dispela mak em Alexander i putim i go inap olsem 1,480 kilomita i go long hap wes. Nau lain Potugal i bosim Afrika na Esia, na lain Spen i bosim Amerika. Tasol taim ol i muvim mak bilong boda i go long hap wes, nau lain Potugal inap bosim ol narapela ples olsem Brasil.

Ol kontrak ol pop i wokim bilong larim lain Spen na Potugal long bosim ol narapela kantri i mekim na planti pait i kamap na ol man i dai. Na tu, ol dispela disisen i mekim na ol man bilong ol dispela ples i no inap mekim wanpela samting long pasim ol. Olsem na inap planti handret yia ol man i pait long kisim fridom long ol kantri i bosim ol.