Ol saveman bilong lo long Saina i tok, sapos papamama i no skulim ol pikinini long ol samting bilong maritpasin long taim ol i liklik yet, orait em bai isi long ol man long mekim pasin sem long ol pikinini. Insait long 4-pela yia, ol prosekiuta long Saina i harim kot bilong klostu 8,000 keis we ol man i bin mekim pasin sem long ol pikinini. Wanpela profesa bilong lo long Beijing Normal University i tok: “Em i isi tru long ol man long giamanim ol pikinini. Tasol sapos papamama i skulim pikinini long lukautim em yet, pikinini inap long sakim ol man bilong mekim pasin sem.”

BAIBEL I TOK: Ol papamama i gat savetingting i skulim ol pikinini long sakim ol man i “save mekim tok i no stret.”—Sindaun 2:1, 10-12.

Wanpela wok painimaut i soim olsem namba bilong ol bebi gel long Filipins i dai long yia bihain long saiklon i kamap i winim namba bilong ol man i dai long taim bilong saiklon. Dispela i makim olsem 1-pela man long olgeta 15 man i dai bihain long saiklon. Dispela hevi i kamap, long wanem, planti i no gat wok mani, pe bilong stretim ol haus i go antap, na tu, gavman i no stretim rot bilong givim kaikai, sut na marasin samting long ol bebi.

BAIBEL I TOK: ‘Givim kaikai long ol man i hangre. Na taim yupela i lukim ol rabisman i no gat haus long slip long en, bringim ol i kam long haus bilong yupela. Na taim yupela i lukim man i no gat laplap bilong karamapim skin bilong en, givim laplap long ol.’—Aisaia 58:7.

Long yia 2011, winim 25 pesen bilong ol man i dai long suasaid em ol man i gat 65 krismas na i go antap. Sampela saveman i tok dispela hevi i kamap, long wanem, klostu 50 pesen bilong ol lapun long Saut Korea i stap rabis. Na tu, ol man i no lukautim lapun papamama bilong ol. Klostu 50 pesen bilong ol man long dispela kantri i tok ol pikinini i mas lukautim lapun papamama bilong ol.

BAIBEL I TOK: “Onarim papa bilong yu na mama bilong yu.”—Efesus 6:2.