OL CUTTLEFISH inap long senisim kala na haitim ol yet, olsem na i hatwok tru long ol man i lukim ol. Wanpela ripot i tok, ol cuttlefish “i gat kain kain disain long bodi na ol inap long senisim kala bilong ol wantu tasol.” Wanem samting i mekim na ol cuttlefish inap senisim kala bilong ol?

Tingim: Ol cuttlefish i save yusim wanpela kain sel (chromatophore) i stap aninit long skin bilong ol long helpim ol long senisim kala. Ol dispela sel i gat ol liklik samting olsem beg i gat planti kala long en, na ol liklik masol i raunim ol dispela beg. Taim cuttlefish i laik haitim em yet, kru bilong en i salim tok i go long ol rop wailis na ol masol bilong en i go liklik. Na nau, ol dispela liklik beg i gat kala long en i go bikpela, na bai cuttlefish inap senisim disain na kala bilong en wantu tasol. Ol cuttlefish i mekim olsem bilong haitim ol yet, pulim ai bilong narapela cuttlefish o ating em rot bilong ol long toktok.

Ol ensinia long University of Bristol long Inglan i wokim wanpela samting i luk olsem cuttlefish. Ol i putim ol blakpela raunpela raba namel long ol liklik masin i mekim wok olsem masol bilong cuttlefish. Taim ol saveman i putim pawa long skin bilong en, ol dispela liklik masin i mekim na ol raba i go bikpela, na nau samting i luk olsem cuttlefish i go tudak na i senisim kala.

Saveman Jonathan Rossiter i tok, ol wok painimaut long masol bilong cuttlefish i helpim ol man long wokim ol klos we inap senisim kala insait long sampela seken tasol. Em i tok moa olsem “ol samting i gat laip i malumalum na i gutpela.” Rossiter i tok, ol man inap werim ol klos em ol i wokim wankain olsem cuttlefish na bai ol inap senisim kala bilong klos o bilong werim olsem bilas.

Yu ting wanem? Save bilong cuttlefish long senisim kala i kamap long rot bilong evolusen? O wanpela i bin wokim?