LONG Sarere long Epril 25, bikpela guria em strong bilong en inap 7.8 i kamap long Nepal, em kantri i stap long hap not bilong India na i gat planti maunten. Dispela guria i kamap long hap not-wes bilong biktaun Kathmandu inap 80 kilomita. Na winim 8,500 manmeri i bin dai, dispela em bikpela disasta tru i kamap long Nepal winim olgeta arapela disasta. Winim 5 handret tausen haus i bin bagarap. I gat 2,200 Witnes Bilong Jehova long Nepal na planti bilong ol i stap long ples we bagarap i kamap. Sori tru olsem wanpela meri Witnes na 2-pela pikinini bilong em i bin dai.

Michelle em wanpela meri Witnes i tok: “Taim guria i kamap, ol kongrigesen long ples we ol i kisim bikpela bagarap i bin mekim miting Kristen long Haus Kingdom bilong ol. Sapos ol i bin stap long haus, planti inap kisim bagarap na dai.” Bilong wanem ol lain i stap long Haus Kingdom i no kisim bikpela bagarap? Long wanem, ol i bin wokim gut dispela haus na em i sanap strong.

Ol i bin sanapim strong ol pos bilong ol Haus Kingdom long Nepal, na bai haus i sanap strong long taim bilong guria. Wanpela man i bin insait long wok bilong sanapim ol Haus Kingdom em Man Bahadur, em i tok: “Planti taim ol man i askim mipela, wai na yupela i sanapim ol strongpela pos long ol liklik haus. Nau mipela i lukim gutpela samting i kamap!” Guria i kamap na i bagarapim haus bilong planti, olsem na ol brata i go pas long mekim wok long Nepal i tok orait long ol man i ken slip long ol Haus Kingdom. Maski ol liklik guria i kamap, ol Witnes Bilong Jehova na ol neiba bilong ol i no tingting planti.

Kwiktaim ol elda Kristen i painim ol bratasista em ol i no bin lukim ol. Babita em wanpela Witnes i tok: “Ol elda i tingim tru ol bratasista long ol samting ol i nidim winim laik bilong ol yet. Mipela i kirap nogut long lukim kain pasin laikim.” Long de bihain long guria, 3-pela memba bilong komiti i go pas long lukautim wok bilong Ol Witnes Bilong Jehova long Nepal na ol wasman raun i visitim ol kongrigesen na wok wantaim ol elda bilong strongim ol na givim helpim.

Sikspela de bihain long guria i kamap, Gary Breaux na meri bilong em Ruby i wok long wol hetkota bilong Ol Witnes Bilong Jehova long Amerika i kam long Nepal. Rueben em wanpela memba bilong komiti i go pas long lukautim wok bilong ol Witnes long Nepal, em i tok: “Ol liklik guria i kamap long Kathmandu na ol man i tingting planti na pret, olsem na mipela i no save sapos tru tru Brata Breaux bai kam. Maski i olsem em i bin kam! Ol Witnes long dispela hap i amamas tru olsem em i visitim ol.”

Silas i save wok long ofis bilong ol Witnes long Nepal, em i tok: “Kirap long taim ol i stretim telefon bilong mipela long ofis, fon i wok long ring long san na long nait! Ol wanbilip Witnes long graun olgeta i tingim tru mipela. Maski sampela i mekim tokples mipela  i no save long en, mipela i pilim tru pasin laikim bilong ol na mipela i luksave olsem ol i redi long helpim mipela.”

Inap sampela de bihain long guria, ol Witnes i kisim kaikai i kam long ol Haus Kingdom na serim wantaim ol lain i sot long kaikai. Na tu, ol i kamapim Disasta Rilif Komiti na ol kantri olsem Banglades, India, na Japan i salim ol kaikai na klos samting i kam long mipela. Insait long sampela de 5-pela Witnes long Yurop i kam, ol i stap long wanpela Haus Kingdom na helpim ol man i kisim bagarap. Na tu, ol i givim ol tok bilong strongim ol man husat i pret na tingting planti.

Wanpela meri, nem bilong em Uttara, i kamapim tingting bilong planti na em i tok: “Dispela guria i kamapim bikpela bagarap na planti man i pret. Tasol dispela hevi i mekim na mipela i pas gut wantaim ol wanbilip bilong mipela winim long bipo.” Tru tumas maski bagarap i kamap, lain bilong Jehova i strongim pasin bilong ol long laikim Em na laikim narapela narapela.