Ediukesen bilong Baibel i gat bikpela strong long helpim ol man. Skelim stori bilong tupela man: Ricardo na Andres.

RICARDO: Taim mi gat 15 krismas, mi joinim wanpela geng. Ol nupela pren bilong mi i mekim na mi senis tru. Mi putim mak long go stap long kalabus inap 10-pela yia! Em longlong tingting. Long ples mi stap long en, ol man i save laikim na rispektim ol man i stap long kalabus. Na mi laik kamap olsem ol.

Mi mekim olgeta samting ol man i insait long geng i save mekim, na tu, drak, pamuk, na pait. Wanpela nait geng bilong mipela i pait long gan wantaim narapela geng. Mi ting mi bai dai, tasol mi ranawe na mi i no kisim bagarap. Bihain long dispela, mi tingting strong long laip bilong mi na ol mak mi laik winim, na mi laik senis. Tasol hau bai mi senis? Bai mi kisim helpim we?

Planti wanblut bilong mi i no amamas. Laip bilong ol i pulap long hevi. Tasol wanpela ankol bilong mi na famili bilong em i stap narakain. Mi save olsem ol i gutpela lain, na ol i bihainim ol stiatok bilong Baibel long i stap bilong ol. Wanpela taim ol i skulim mi olsem nem bilong God em Jehova. Bihain liklik long dispela pait, mi beten long Jehova, mi kolim nem bilong em na askim em long helpim mi. Mi kirap nogut, long neks de wanpela Witnes Bilong Jehova i nok long dua! Em i kamap Baibel tisa bilong mi.

I no longtaim na mi bungim bikpela hatwok. Planti taim ol olpela pren i save ring na askim mi long raun wantaim ol. Maski em hatwok, mi tok nogat. Mi strong yet long stadi long Baibel, na mi amamas mi bin mekim olsem! Laip bilong mi i senis tru, na mi stap amamas.

Mi tingim mi bin beten na tokim God olsem bipo mi redi long stap 10-pela yia long kalabus na bai ol man i ken rispektim mi olsem wanpela geng memba. So mi askim em long helpim mi long autim tok fultaim inap 10-pela yia na bai mi inap helpim ol narapela, wankain olsem ol i bin helpim mi. God i harim beten bilong mi, inap 17 yia pinis mi autim tok fultaim! Na mi laik tok moa, mi no bin go long kalabus.

Tasol planti pren bilong mi long bipo i stap kalabus inap planti yia. Na sampela i dai pinis. Taim mi tingim bek, mi amamas tru long ol wanblut bilong mi em ol i Witnes Bilong Jehova. Ol i redi long i stap narapela kain bikos ol i bihainim ol tok bilong Baibel. Mi rispektim ol moa winim rispek mi givim long ol man insait long geng. Moa yet, mi tenkyu long God i bin skulim mi long namba 1 rot bilong laip.

 ANDRES: Mi bon na kamap bikpela long wanpela ples we planti man i save kisim drak, stil na pulim samting bilong ol narapela, kilim man, na pasin pamuk. Papa bilong mi em man bilong spak na kisim drak. Oltaim em na mama bilong mi i save pait na kros.

Taim mi yangpela mangi, mi kirap long dring alkohol na yusim drak. Planti taim mi raun long ol strit, stilim ol samting na salim. Taim mi go bikpela, papa bilong mi i traim long pas gut wantaim mi tasol em i gat narapela tingting, em i skulim mi long kisim ol drak long pasin hait i kam insait long kantri na salim. Mi kisim planti mani—hariap tru. Wanpela de polis i kam long haus bilong mi. Ol i arestim mi, na salim mi i go stap 5-pela yia long kalabus, bikos mi bin traim long kilim man.

Wanpela moning, toksave i kamap long spika insait long kalabus, ol i invaitim ol kalabusman long kam long wanpela bung bilong Baibel stadi em ol Witnes Bilong Jehova bai mekim. Mi tingting long i go. Samting mi harim i klia tru, olsem na mi kirap stadi long Baibel wantaim ol Witnes. Ol i tokim mi long ol stretpela lo bilong God, na ol i no kamapim tasol sampela hap bilong Baibel, nogat.

Bihain mi luksave olsem mi nidim helpim bilong mekim senis, moa yet taim ol wankalabus i traim long mekim nogut long mi bikos ol i no laikim samting mi mekim. Olsem na mi beten askim Jehova long givim mi strong na savetingting, na em i helpim mi. Mi kisim strong na mi inap autim tok bilong Baibel long ol narapela kalabusman.

Taim mi kisim toksave long i go fri, mi tingting planti na mi laik stap longpela taim moa long kalabus! Taim mi laik lusim kalabus, sampela wankalabus i tok gutbai long mi. Sampela i tok, “Go long haus, liklik wasman.”

Mi no save wanem samting bai painim mi sapos mi no larim God i skulim mi. Mi tenkyu tru olsem God i laikim mi na em i no tingim mi olsem wanpela man nogut. *