Yunaitet Nesen i kirapim olgeta manmeri long wok bung wantaim long rispektim raits bilong ol man na lukautim graun. Bilong wanem ol i mekim olsem? Long nius UN Chronicle, Maher Nasser i tok, “klaimet i senis, pasin raskol, pasin bilong tingim wanpela lain tasol i go bikpela, ol woa, planti man i go stap nabaut long ol narapela ples, pasin teroris, ol kain kain sik, na ol kain hevi olsem i no gat . . . mak bilong en.”

Ol narapela i tokaut olsem wanpela gavman i mas bosim graun olgeta. Na tu, bikman Dante (1265-1321) bilong Itali na saientis Albert Einstein (1879-1955) i bilip olsem bel isi i no inap stap long graun em ol gavman i bruk bruk nabaut. Dante i kamapim tok bilong Jisas Krais olsem wanpela “kingdom i bruk long tupela lain ol bai bagarap.”—Luk 11:17.

Bihain liklik long Wol Woa 2, em ol i bin yusim 2-pela atomik bom, Albert Einstein i raitim wanpela leta i go long Jeneral Asembli Bilong Yunaitet Nesen. Em i tok: “Yunaitet Nesen i mas hariap long mekim olgeta samting bilong lukautim graun olgeta, long rot bilong redim ol samting bilong kamapim wanpela strongpela gavman bilong graun.”

Tasol olsem wanem? Ol lain politik husat bai kamapim dispela strongpela gavman inap long sakim pasin korapsen, pasin resis, na hatpela pasin? O ol bai bihainim wankain pasin olsem ol narapela bikman bilong gavman? Ol dispela askim i mekim na yumi tingim tok bilong saveman bilong Briten, Lord Acton, em i tok: “Taim man i kamap bikman na kisim strong, dispela inap bagarapim pasin bilong em; na sapos em i kamap nambawan bikman na em i gat strong bilong bosim olgeta samting, dispela inap bagarapim moa yet pasin bilong em.”

Bilong ol manmeri i ken stap amamas na bel isi tru, yumi mas stap wanbel. Tasol olsem wanem yumi inap stap wanbel na bel isi tru? Dispela samting inap kamap tru? Bekim bilong Baibel em yes. Yumi inap stap wanbel na bel isi tru. Hau? I no long rot bilong gavman bilong graun we i gat pasin korapsen, nogat. Long rot bilong gavman em God i kamapim. Na tu, dispela gavman bai kamapim rait bilong em long bosim ol samting em i wokim. Wanem dispela gavman? Baibel i givim nem bilong en—“Kingdom Bilong God.”—Luk 4:43.

Jisas Krais i tingim Kingdom Bilong God taim em i beten olsem: “Kingdom bilong yu i mas i kam. Laik bilong yu i mas kamap long graun.” (Matyu 6:9, 10) Yes, Kingdom Bilong God bai kamapim laik bilong God long dispela graun, na i no laik bilong ol man husat i tingim ol yet na namba bilong ol.

Baibel i kolim tu Kingdom Bilong God olsem “Kingdom bilong heven.” (Matyu 5:3) Bikos em bai stap long heven na bosim olgeta hap bilong graun, tasol wok bos bilong em bai no stap long graun. Tingim, dispela gavman i no nidim ol samting o mani bilong sapotim em. So ol man i stap aninit long en bai stap amamas tru!

Dispela tok “kingdom” i makim olsem, Kingdom Bilong God em wanpela gavman i gat king i bosim. Dispela King—Jisas Krais—God i givim namba long em. Baibel i tok long Jisas olsem:

• “Gavman bai stap long sol bilong Em. . . . Gavman na bel isi bilong Em bai kamap bikpela moa na i no gat pinis bilong em.”—Aisaia 9:6, 7, King Jems Pisin Baibel.

•   “Em i kisim wok bos, ona, na wanpela kingdom, olsem bai ol manmeri bilong narapela narapela kantri na tok ples i ken stap aninit long em. Wok bos bilong em . . . i no inap pinis.”—Daniel 7:14.

• “Kingdom bilong ol manmeri i kamap Kingdom bilong Bikpela [God] bilong yumi na bilong Krais bilong em.”—Revelesen 11:15.

Bilong truim beten bilong Jisas, Kingdom Bilong God bai inapim tru laik bilong God long graun. Aninit long dispela Kingdom, olgeta manmeri bai kisim skul long hau ol inap lukautim dispela graun na bai em i stap gut na i pulap long olgeta samting i gat laip.

Na moa yet, Kingdom Bilong God bai skulim ol manmeri i stap aninit long en. Olgeta bai kisim skul long wankain lo. Olgeta bai i stap wanbel. Aisaia 11:9 i tok: “Bai ol i no inap kamapim wanpela bagarap o bagarapim ol samting . . . long wanem, graun bai pulap long save bilong Jehova olsem wara i karamapim solwara olgeta.”

Ol manmeri long olgeta hap bilong graun bai i stap wanbel na bel isi tru, em samting Yunaitet Nesen i tingting long en. Buk Song 37:11 i tok: “Ol bai i stap bel isi tru na dispela bai mekim ol i stap amamas moa yet.” Long dispela taim bai i no gat ol wed olsem “stil,” “polusen,” “rabis,” na “woa.” Tasol ol dispela samting bai kamap long wanem taim? Yes, wanem taim Kingdom Bilong God bai bosim dispela graun? Olsem wanem em bai bosim? Na olsem wanem wok bos bilong en inap helpim yu? Nau yumi ken stori long dispela.