Wai i No Gat Moa Pasin Bilong Rispek Long Narapela?
RISEN NA YUMI RISPEKTIM OL NARAPELA
Taim yumi rispektim ol narapela dispela i daunim kros na hevi i no go bikpela.
-
Wanpela savetok bilong Baibel i tok: “Taim man i bekim tok long pasin isi, dispela i save pinisim bikpela belhat, tasol hatpela tok i save kirapim man long belhat.” (Provep 15:1) Taim yumi no soim pasin rispek long toktok na pasin bilong yumi, i olsem yumi putim moa paiawut long paia, na planti taim dispela inap kamapim bikpela hevi.
-
Jisas i tok: “Maus i save autim ol tingting i pulap long bel.” (Matyu 12:34) Sapos long toktok bilong yumi, yumi no soim rispek long ol man bilong narapela skin, traib, kantri, o sindaun, we i no wankain long yumi, dispela inap kamapim bikpela hevi. Em soim olsem yumi no laikim ol na yumi mas stretim tingting bilong yumi.
I no longtaim i go pinis, wanpela wok painimaut ol i mekim long 32,000 manmeri bilong 28 kantri, 65 pesen i tok ol i no lukim moa pasin rispek i stap namel long ol man.
SAMTING YU KEN MEKIM
Taim yu stap long skul o long wok yu mas rispektim olgeta manmeri—maski yu no holim wankain tingting olsem bilong ol. Luksave long ol samting em yupela inap wanbel long en. Dispela bai helpim yu long abrusim pasin bilong luk daun long ol na skelim ol.
Mekim pasin long ol narapela olsem yu laik bai ol i mekim long yu. Sapos yu tingim tru ol narapela na mekim pasin fea long ol, ating ol bai bekim wankain pasin long yu.
Fogivim rong. Taim yu lusim tingting long tok o pasin ol narapela i mekim long yu, yu soim olsem yu trastim ol.
WOK MIPELA I MEKIM
Long ol komiuniti we ol Witnes Bilong Jehova i stap na wok, ol i save soim rispek long ol narapela, na kirapim ol man long mekim wankain pasin.
Mipela i save givim fri Baibel stadi long olgeta man tasol mipela i no save fosim ol narapela long bihainim ol tingting na ol bilip bilong mipela. Nogat, mipela i bihainim tok bilong Baibel na long “pasin isi na pasin rispek” mipela i autim tok long ol narapela.—1 Pita 3:15; 2 Timoti 2:24.
Mipela i sakim pasin bilong luk daun long ol narapela na mipela i welkamim ol man bilong olgeta kain bekgraun husat i laik kisim save long Baibel long ol miting bilong mipela. Mipela i traim bes long “soim gutpela pasin rispek long olgeta man,” maski sapos mipela i no wanbel long ol.—1 Pita 2:17, New International Version.
Mipela i rispektim gavman bilong hap mipela i stap long en. (Rom 13:1) Mipela i save bihainim lo na baim takis. Mipela i no save sapotim wanpela lain politik, nogat, tasol mipela i rispektim raits bilong ol narapela taim ol i mekim disisen long sait bilong politik.
