Wai i No Gat Moa Pasin Bilong Rispek Long Yu Yet?
RISEN NA YU MAS RISPEKTIM YU YET
Ol man i save rispektim ol yet ol i gat strongpela bel na ol inap karim ol hevi. Ol i no inap givap kwik.
-
Wok painimaut i soim olsem ol man i no save rispektim ol yet, ol inap karim ol kain hevi olsem wari na tingting planti, na kisim sik bilong kaikai liklik o kaikai planti tumas. Na ating ol bai kamap man bilong mekim nabaut long alkohol na kisim drak.
-
Ol man i gat pasin bilong rispektim ol yet, ol bai abrusim pasin bilong skelim ol yet wantaim ol narapela, olsem na em bai isi long ol i kamap pren bilong ol narapela na pas gut wantaim ol. Tasol ol man i no rispektim ol yet, ol i save mekim ol tok bilong daunim narapela, na dispela i mekim na ol i no inap pas gut wantaim ol narapela.
-
Ol man i gat pasin bilong rispek long ol yet, ol i save sanap strong maski ol i bungim kain kain hevi, ol i no inap larim ol hevi i pasim ol long winim ol mak ol i putim. Tasol ol man i no gat rispek long ol yet, planti taim ol i save tingim ol liklik hevi i olsem ol bikpela hevi tru. Dispela inap mekim na ol i givap kwik.
SAMTING YU KEN MEKIM
Kisim ol gutpela pren we ol bai strongim yu. Poroman wantaim ol lain i gat pasin bilong rispek long ol narapela, em ol i tingim tru yu, na ol bai strongim yu.
Helpim ol narapela. Taim yu mekim gutpela pasin na mekim ol samting bilong helpim ol narapela—na tu ol man husat i no inap bekim gutpela pasin bilong yu—yu bai kisim bikpela amamas long pasin bilong givim samting. Dispela em tru, maski ol narapela i no lukim samting yu mekim.
Helpim ol pikinini long kisim pasin bilong rispek long ol yet. Wanpela rot bilong mekim olsem em yu larim ol yet i stretim hevi bilong ol, inap long save ol i gat long stretim hevi. Dispela bai helpim ol long lain long pasin bilong stretim na karim hevi. Na i skulim ol long pasin bilong rispek long ol yet long nau na i go inap long taim ol i kamap bikpela.
WOK MIPELA I MEKIM
Ol miting na Baibel stadi kos ol Witnes Bilong Jehova i mekim i helpim ol manmeri long mekim sindaun bilong ol i kamap gutpela na i helpim ol long kisim pasin bilong rispek long ol yet.
OL MITING BILONG MIPELA
Long ol miting bilong mipela long olgeta wik, mipela i save amamas long harim ol tok bilong Baibel, na planti taim i gat ol tok i stori long hau yu inap kisim pasin bilong rispektim yu yet. Ol miting bilong mipela em fri na olgeta man i ken kam na harim. Olsem, long ol miting bilong mipela yu inap kisim save long . . .
-
wai na God i tingim tru yu
-
i gat wanem as tru na yumi stap laip
-
hau yu inap pas gut wantaim ol narapela na stap pren inap longpela taim
Bai yu bungim tu ol pren tru em ol i i save “tingim ol arapela.”—1 Korin 12:25, 26.
Bilong kisim save long ol miting bilong mipela, go long jw.org na lukim vidio Wanem Samting i Save Kamap Long Haus Kingdom?
BAIBEL STADI KOS BILONG MIPELA
Mipela i save mekim fri Baibel stadi wantaim ol manmeri long buk Stap Amamas Oltaim! Dispela buk i gat planti skripsa, ol tok bilong en i klia, ol gutpela askim, ol vidio, na ol naispela piksa. Baibel stadi mipela i mekim i helpim ol man long kisim pasin bilong rispek long ol yet na mekim sindaun bilong ol i kamap gutpela moa.
Bilong kisim save long hau pasin bilong stadi long Baibel wantaim ol Witnes Bilong Jehova i ken helpim yu, go long jw.org na lukim vidio Wai na i Gutpela Long Stadi Long Baibel?
Ating Yu Bai Laikim Tu
KIRAP!
Rot Bilong Kamapim Pasin Rispek
Pasin rispek i mas stap oltaim insait long marit. Olsem wanem yu inap soim olsem yu rispektim poroman marit bilong yu?
MIPELA OL WITNES
Askim Long Wanpela i Ken Kam Lukim Yu
Kisim bekim bilong wanpela askim bilong Baibel, o kisim sampela save moa long Ol Witnes Bilong Jehova.
MIPELA OL WITNES
Go Long Wanpela Miting
Kisim save long ol miting bilong mipela. Painim ples bilong miting i stap klostu long hap bilong yu.
