OL BINEN BILONG WOKIM HANI i save flai isi isi na sindaun long ol plaua na ol i no bam na pundaun nabaut. Wanem samting i helpim ol long mekim olsem?

Tingim: Taim ol binen i flai i go klostu long wanpela samting, hariap tru ai bilong ol i mekim dispela samting i luk bikpela. Na nau ol i flai isi isi na dispela i helpim ol long i go sindaun long plaua na ol i no bam na pundaun nabaut. Tasol planti binatang i no inap mekim olsem.

Ai bilong yumi ol man inap skelim sapos samting i stap klostu o longwe, tasol ol binen bilong wokim hani i no inap mekim olsem. Ol wok painimaut long Australian National University i soim olsem ol binen i save flai isi isi na bai ai bilong ol inap lukim gut ples ol i laik sindaun long en.

Wanpela ripot bilong nius Proceedings of the National Academy of Sciences i tok: “Pasin bilong binen long flai isi isi na sindaun long ol plaua . . . inap helpim ol man long wokim ol robot i save flai.”

Yu ting wanem? Ai bilong binen bilong wokim hani i kamap long rot bilong evolusen? O wanpela i bin wokim?