Papamama i stap eksampel long mekim ol samting ol i skulim pikinini long en. Olsem, yu no ken ting pikinini bai mekim tok tru taim em i harim yu tok, “Tokim em mi no stap long haus,” yu tok olsem taim yu no laik toktok wantaim wanpela i sanap long dua.

“Planti i save long dispela tok: ‘Mekim olsem mi tok, na no ken bihainim pasin bilong mi.” Tasol dispela tingting i no save helpim pikinini. Ol i olsem spans i kisim olgeta toktok na pasin yumi mekim, na ol bai tokim yumi taim pasin bilong yumi i no stret wantaim ol samting yumi skulim ol long en.”—David.

STIATOK BILONG BAIBEL: “Yu husat i tokim ol man, ‘No ken stil,’ yu yet yu save stil?”—Rom 2:21.

Planti taim ol pikinini na ol tineja i save bihainim pasin bilong papamama bilong ol winim ol arapela man—makim tu ol wanlain bilong ol. Dispela i makim olsem em i bikpela samting long papamama i stap gutpela eksampel long stiaim pikinini bilong ol long bihainim stretpela pasin—papamama yet i mas mekim ol samting ol i skulim pikinini long en.

“Yumi inap mekim wanpela tok inap planti handret taim na ting pikinini i harim o nogat. Tasol sapos wanpela taim yumi no mekim samting yumi skulim ol long en, pikinini bai tokaut long dispela. Ol pikinini i save lukim na harim gut ol samting yumi mekim, maski yumi ting ol i no luksave.”—Nicole.

STIATOK BILONG BAIBEL: “Savetingting i kam long heven i mekim . . . na em i no man bilong tupela maus.”—Jems 3:17.

Skelim ol lo yu putim. Yu save lukim wanem kain program? Yu save mekim wanem pasin long poroman marit na pikinini? Yu gat wanem kain ol pren? Yu save tingim ol narapela? Yu stap dispela kain man em yu laik bai pikinini bilong yu bai kamap bihain?

“Mi na man bilong mi i no save tokim ol pikinini long mekim ol samting em mipela yet i no mekim.”—Christine.

Tok sori long ol popaia bilong yu. Ol pikinini i save pinis olsem yu gat sin. Taim yu tok “Mi sori” long taim i stret long mekim—poroman marit na pikinini—yu bai helpim ol long kisim gutpela skul long bihainim onest pasin na mekim pasin daun.

“Ol pikinini bilong yumi i mas harim yumi tokaut long taim yumi popaia, na ol i mas harim yumi tok sori long rong bilong yumi. Sapos yumi no mekim, ol bai kisim skul long haitim ol popaia bilong ol.”—Robin.