Ol Elektronik Divais i Mekim Wanem Long Tingting?
Ol manmeri i wok yet long lainim ol samting—long skul, long wok, o long ol narapela samting. Ol elektronik divais inap helpim ol man long lainim ol samting. Winim olgeta taim bipo, nau em isi tru long kisim ol infomesen, yu no gat wok long lusim haus bilong yu o kirap long sia bilong yu.
Tasol planti em ol i yusim tumas ol elektronik divais ol i bungim ol dispela hevi . . .
-
ol i hatwok long putim tingting long samting ol i ritim.
-
ol i hatwok long putim tingting long wanpela samting tasol.
-
ol i pilim boring hariap taim ol i stap wanpis.
SAMTING YU MAS SAVE
TAIM YU RIT
Ol manmeri i save yusim ol elektronik divais, ol i no gat pasin bilong stap isi na ritim gut buk olgeta, ol i save lukluk hariap tasol long ol bikpela tok.
Pasin bilong rit hariap i gutpela taim yu laik painim hariap bekim bilong wanpela askim. Tasol sapos yu laik kliagut long wanpela topik, pasin bilong rit hariap i no gutpela.
SAMTING BILONG TINGIM: Yu inap ritim gut wanpela longpela atikol? Olsem wanem pasin bilong rit gut inap helpim yu long kisim gut save?—PROVEP 18:15.
PUTIM TINGTING LONG WANPELA SAMTING
Sampela manmeri i ting ol inap yusim ol elektronik divais long mekim tupela samting long seim taim—olsem, salim teks long pren bilong ol na mekim stadi tu. Tasol taim tingting i bruk, ol i no inap mekim gut tupela samting wantaim, moa yet taim ol i mas putim tingting long dispela tupela samting wantaim.
Bilong putim tingting long wanpela samting, yu mas bosim gut yu yet na dispela bai helpim yu. Wanpela tineja nem bilong em Grace i tok: “Taim yu mekim olsem, bai yu no mekim planti popaia na yu no pilim presa. Mi kisim save olsem em gutpela long putim tingting long wanpela samting tasol na abrusim pasin bilong mekim planti samting long wankain taim.”
SAMTING BILONG TINGIM: Pasin bilong salim teks, e-meil, na ring long seim taim inap mekim wanem long pasin bilong yu long skelim gut ol samting na tingim samting yu stadi long en?—PROVEP 17:24.
STAP WANPIS
Sampela manmeri taim ol stap wanpis, ol i save yusim ol elektronik divais na bai ol i pilim olsem ol i no stap wanpis. Wanpela meri nem bilong em Olivia i tok: “Mi save pilim boring long stap nating inap 15 minit sapos mi no sekim fon, o teblet, o onim TV.”
Tasol pasin bilong stap wanpis sampela taim i gutpela bilong helpim yumi long wokim gut tingting—em gutpela taim bilong lainim ol samting, i no ol yangpela tasol, ol man i bikpela pinis tu inap lainim ol samting.
SAMTING BILONG TINGIM: Taim yu stap wanpis, yu save yusim dispela haptaim bilong tingim tingim ol samting? —1 TIMOTI 4:15.
SAMTING YU KEN MEKIM
SKELIM PASIN BILONG YU LONG YUSIM OL ELETRONIK DIVAIS
Long wanem ol rot yu inap yusim ol elektronik divais bilong helpim yu long lainim ol samting? Ol elektronik divais inap mekim wanem long pasin bilong yu long putim tingting long ol samting na lainim samting?
STIATOK BILONG BAIBEL: “Banisim gut savetingting na pasin bilong wokim gut tingting.”—PROVEP 3:21.
Ating Yu Bai Laikim Tu
KIRAP!
Yu Mekim Planti Samting Tumas?
Planti manmeri i pilim olsem i hatwok long ol i mekim ol wok long ples wok na ol wok long haus. Bilong wanem ol i pilim olsem? Wanem samting inap helpim ol?
