YUMI gat hamaspela kru? Sapos yu tok 1-pela, bekim bilong yu i stret. Tasol i gat ol narapela hap bilong bodi tu i mekim wankain wok olsem kru bilong yu. Wanpela hap bilong bodi i gat planti rop i wok gut wantaim, olsem na ol saientis i kolim ol dispela rop olsem “namba 2 kru.” Em enteric nervous system (ENS) na em i stap insait long bel, na i no long het.

Taim man i kaikai, ol dispela rop i wok gut wantaim long mekim bikpela wok long brukbrukim kaikai na bai kaikai inap strongim bodi. I olsem kru i makim ENS long kontrolim bikpela wok bilong brukbrukim kaikai.

ENS i mekim narakain wok tru. Long bel bilong man, ol rop bilong ENS em inap olsem 200 milion i go inap 600 milion. Ol dispela rop i sapotim wok bilong brukbrukim kaikai. Ol saientis i ting sapos kru i mekim wok bilong ENS, ol rop bilong en bai bikpela tumas. Buk The Second Brain i tok: “[Sistem bilong brukbrukim kaikai] i lukautim em yet na dispela i gutpela moa na i lukautim laip bilong man.”

Paslain long bodi i brukbrukim kaikai, i mas i gat narapela narapela kemikal i kamap long taim stret na stap long ples stret bilong en. Profesa Gary Mawe i tok sistem bilong brukbrukim kaikai i olsem “wanpela kemikal woksop.” Wok bilong en i narakain tru na i hatwok long kliagut long en. Ol rop bilong bel i gat ol spesel sel na ol dispela sel inap luksave sapos kaikai i gat kemikal. Ol dispela infomesen i helpim ENS long makim marasin i stret long brukbrukim kaikai na bai bodi inap kisim helpim long dispela kaikai. Na tu, ENS i mekim bikpela wok long skelim strong bilong kemikal i stap long kaikai na bai em i makim marasin i stret bilong brukbrukim kaikai.

Sistem bilong brukim kaikai i olsem wanpela faktori em ENS i bosim. ENS i kontrolim ol masol insait long bel long muvim kaikai i go na bai em inap brukbrukim dispela kaikai. ENS i kontrolim strong na spit bilong ol masol long muvim kaikai, na dispela i olsem ol masin long faktori we i save muvim ol kago.

ENS i save lukautim tu sistem bilong brukbrukim kaikai. Kaikai yu kisim inap karim ol binatang nogut. Olsem na 70 i go 80 pesen bilong ol lymphocyte sel i stap insait long bel—lymphocyte sel i stap olsem gad bilong banisim yumi long ol binatang nogut! Sapos yu kisim kaikai i gat planti binatang nogut, orait ENS bai stiaim masol bilong bel long rausim ol dispela binatang nogut long rot bilong traut o pekpek wara.

Toktok i save kamap namel long ENS na kru. ENS i save yusim ol homon long toksave long kru long wanem taim man i mas kisim kaikai na hamas kaikai em i mas kisim.  Ol rop bilong ENS i salim tok long kru taim man i kaikai na pulap, na ENS inap mekim man i pilim traut taim em i kaikai planti tumas.

Paslain long yu ritim dispela atikol, ating yu save olsem toktok i save kamap namel long kru na hap bilong bodi we i save brukbrukim kaikai. Olsem wanem? Yu save pilim amamas taim yu kaikai ol switpela kaikai? Wok painimaut i soim olsem yu save pilim amamas taim ENS i salim gutpela toksave i go long kru. Olsem na sampela man i save kisim ol switpela kaikai bilong mekim ol i amamas. Ol saientis i laik painim rot bilong kirapim ENS long salim gutpela toksave i go long kru na dispela bai helpim ol man i stap bel hevi.

Sampela taim man inap pilim olsem bel i no stap isi. Dispela i soim olsem toktok i save kamap namel long kru na hap bilong bodi i save brukbrukim kaikai. Taim man i tingting planti, ENS inap senisim ron bilong blut na blut i no kam insait long bel. Na tu, man inap pilim traut bikos kru i salim tok long ENS long senisim wok bilong ol masol bilong bel long muvim kaikai. Ol saveman i tok dispela pasin bilong salim tok i go i kam namel long ENS na kru i mekim na yumi ol man inap kisim tingting long sampela samting maski i no gat man i tokim yumi.

Maski i olsem, ENS i no inap wokim tingting o stiaim ol disisen bilong yu. Yumi ken tok, ENS i no mekim wankain wok olsem kru. Em i no inap helpim yu long raitim wanpela singsing, kaunim mani long akaun, o mekim homwok. Ol saientis i kirap nogut long narakain wok bilong ENS—ol i no kliagut yet long planti samting long wok bilong en. Olsem na taim yu redi long kaikai, tingim hau ENS i save wok gut wantaim kru—em i save skelim kaikai, kontrolim wok bilong brukbrukim kaikai, na salim toksave i go long kru!