PLANTI animal bilong kolwara i gat bikpela gris aninit long skin na dispela i helpim bodi bilong ol long i stap hot. Tasol ota bilong solwara i narapela kain bikos gras i gro long bodi bilong en i helpim em long i stap hot.

Tingim: Gras bilong ota bilong solwara i pas pas tru winim gras long bodi bilong ol narapela animal. Long bodi bilong ota, wanpela skwe sentimita i gat 155,000 gras. Taim ota i swim, ol gras bilong en i save trapim win. Dispela win i stopim kolwara long pas long skin bilong ota na mekim bodi bilong en i kol.

Ol saientis i pilim olsem yumi inap kisim skul long gras bilong ota bilong solwara. Ol i mekim wok painimaut long ol saket ol i wokim long gras—longpela bilong ol gras na spes i stap namel long ol i narapela narapela. Ol i painimaut olsem “ol gras i longpela na i pas pas tru i stopim wara long mekim ol samting i kamap wet.” Gras bilong ol ota bilong solwara i olsem saket i lukautim gut bodi bilong ol.

Ol saveman i laik bai ol wok painimaut bilong ol i helpim ol long wokim ol klos we inap stopim wara long mekim bodi i kol. Ating sampela man inap pilim olsem lain bilong daiv long kolwara i mas werim klos i gat planti gras long en, wankain olsem gras bilong ota bilong solwara!

Yu ting wanem? Gras bilong ota bilong solwara i kamap long rot bilong evolusen? O wanpela i bin wokim?