OL SIKADA i wankain liklik long ol grasopa, na ol i stap long olgeta kontinen, tasol i no long Antaktika. Wanpela lain sikada ol i kolim periodical sikada i stap long not is bilong Amerika. Inap planti yia ol saientis i mekim ol wok painimaut long ol.

Tingim: Long taim bilong san, planti milion periodical sikada i save kamap na i stap inap sampela wik tasol. Long dispela liklik haptaim, ol i senisim skin bilong ol, singsing strong, flai, karim pikinini, na bihain ol i dai. Sampela i stap 13 yia na ol narapela i stap 17 yia na bihain ol i kamapim pikinini. Insait long dispela haptaim, wanem samting i kamap long ol?

Bilong bekim dispela askim, yumi mas kliagut long laip bilong ol periodical sikada. Bihain long wanpela wik taim ol bikpela sikada i digim graun na kam antap, ol man sikada i stap wantaim ol meri sikada, na nau meri i putim 400 i go 600 kiau long ol han bilong diwai. Bihain liklik, ol bikpela sikada i save dai. Insait long sampela wik, ol kiau i bruk na ol liklik sikada i pundaun long graun, na nau ol i digim graun na i go stap aninit long graun. Inap sampela yia, ol i stap aninit na dring wara long rop bilong ol diwai. Bihain long 13 o 17 yia taim ol dispela sikada i go bikpela, ol i mekim wankain samting na nau lain periodical sikada i stap yet.

Wanpela atikol long nius Nature i tok, laip bilong dispela lain sikada i narakain tru, “inap planti handret yia ol saientis i laik kisim save long ol. . . . Long nau tu, ol saientis i laik save hau dispela binatang inap mekim olsem bilong i stap laip.” Taim yu skelim ol sikada wantaim ol arapela animal, em samting i narakain tru.

Yu ting wanem? Periodical sikada i kamap long rot bilong evolusen? O wanpela i bin wokim?