INAP longpela taim ol man i tok ol pisin tern i save lusim Aktik na flai inap 35,200 kilomita bilong i go long Antaktika na go bek long Aktik. Tasol ol nupela wok painimaut i soim olsem ol dispela pisin i save flai i go longwe moa.

Ol saveman i pasim wanpela liklik masin (geolocator) long sampela pisin. Hevi bilong dispela masin i klostu wankain long hevi bilong liklik pin bilong klipim ol pepa, na ol dispela masin i kamapim klia olsem sampela pisin tern i save flai inap olsem 90 tausen kilomita bilong i go long Antaktika na kam bek long Aktik—em longpela raun tru winim raun bilong olgeta narapela animal. Wanpela pisin i flai inap olsem 96 tausen kilomita! Wai na ol saveman i skelim gen raun bilong ol dispela pisin?

Maski ol dispela pisin i stap long wanem hap na kirapim raun bilong ol, ol i no save bihainim wankain rot taim ol i go bek long Aktik. Olsem sat i soim, taim dispela pisin i bihainim Solwara Atlantik, raun bilong en i olsem leta “S.” Bilong wanem? Ol i bihainim ron bilong win.

Ol pisin tern i save stap laip inap 30 yia, na ol inap raun winim 2.4 milion kilomita. I kain olsem ol i go i kam long mun inap 3-pela o 4-pela taim! Wanpela saveman i tok: “Hevi bilong dispela liklik pisin i olsem 100 gram, olsem na i hatwok tru long yumi inap tingim olsem dispela kain pisin inap mekim kain raun olsem.” Na tu, ol dispela pisin i save stap long 2-pela kona bilong graun long taim bilong san, olsem na ol i lukim “planti moa lait bilong san long olgeta yia winim ol narapela samting i stap laip.”—Buk Life on Earth: A Natural History.