NIUS I KAM LONG OLGETA HAP
Nius Bilong Not, Sentral, na Saut Amerika
Ol nius i kam long Amerika i kamapim klia gutpela savetingting bilong Baibel.
Sekim E-mail Wan Wan Taim na Daunim Presa
Wanpela wok painimaut long Vancouver, long Kanada i tok, ol man i sekim e-mail klostu klostu long olgeta de, ol i kisim bikpela presa. Tasol ol manmeri i sekim e-mail 3-pela taim long wanpela de, ol i no kisim presa. Kostadin Kushlev em man i go pas long dispela wok painimaut i tok: “I hatwok long ol man i sakim pasin bilong sekim e-mail, tasol dispela bai daunim presa bilong ol.”
TINGIM DISPELA: Yumi stap long “taim nogut . . . na dispela bai givim hatwok long ol man,” olsem na yu ting yumi mas painim rot bilong daunim presa?—2 Timoti 3:1.
Solwara i Gat Laip Gen
Wanpela ripot bilong lain Wildlife Conservation Society (WCS) i tok, long Belis na ol arapela ples long Karibian, “gavman i tambuim ol man long kisim pis na selpis samting long sampela hap bilong solwara, olsem na namba bilong selpis ol i kolim conch, na ol kuka na pis i go antap. Long ol ples i gat dispela tambu, ol i ting insait long 6-pela yia samting, isi isi bai i gat ol pis na selpis samting long solwara gen. Tasol planti yia i mas lus . . . bambai olgeta kain pis na selpis i pulap long solwara.” Janet Gibson, em dairekta bilong WCS program long Belis i tok: “Ol hap bilong solwara bilong ol kantri mipela i putim tambu, ol pis na ol samting i gat laip inap kamap planti gen.”
TINGIM DISPELA: Ol samting i gat laip inap kamap nupela gen, olsem na yu ting i gat wanpela Krieta i gat savetingting i stap?—Song 104:24, 25.
Pait na Bagarapim Man Long Brasil
Niuslain Agência Brasil i tok, pasin bilong pait na bagarapim man i go bikpela long Brasil. Long 2012, namba bilong ol man i kilim i dai narapela i go antap winim 56 tausen. Dispela namba i winim namba em lain Dipatmen Bilong Helt i rekodim long ol narapela yia. Luís Sapori i wok wantaim lain sekiuriti bilong gavman. Em i tok dispela namba i go antap bikos ol man i no bihainim stretpela pasin. Taim ol man i no rispektim ol lo bilong kantri, “ol i strong long bihainim laik bilong ol na pait na bagarapim ol narapela.”
YU SAVE LONG DISPELA? Baibel i tok profet olsem, pasin laikim bilong planti manmeri “bai i no strong olsem long bipo” na pasin bilong brukim lo bai i go bikpela.—Matyu 24:3, 12.
