OL LIKLIK sel bilong solwara i save banisim bodi bilong ol bambai presa bilong solwara i no ken bagarapim ol. Ol ensinia i stadim seip bilong ol sel bilong solwara na disain bilong en, na ol i laik wokim ol kar na ol bilding we i strong tru na inap lukautim gut ol man i stap insait.

Tingim: Ol ensinia i kisim save long 2-pela kain sel bilong solwara—em kramsel (bivalve) na ol sel i gat raunpela disain long en, kain olsem demdem (screw-shape).

Ol ensinia i painimaut olsem ol streit lain o disain i stap long ol sel olsem kramsel, ol i save stiaim presa bilong solwara i go long as bilong sel o arere bilong en. Tasol long sel i gat raunpela disain na peten, ol dispela disain i save stiaim presa bilong solwara i go long teil bilong sel na ai bilong en. Tupela sel wantaim i save stiaim presa i go long hap bilong sel we i strong moa. Long dispela rot, sel i banisim gut samting i stap insait long en.

Ol saveman i testim ol sel bilong solwara na ol sel bilong demdem samting wantaim ol samting i gat seip bilong sel, kain olsem ol koun. Ol i painimaut olsem ol sel bilong solwara i strong moa inap 2-pela taim winim ol samting olsem koun.

Buk Scientific American i stori long dispela wok painimaut na i tok: “Bihain, sapos yu draivim wanpela kar em ol i wokim wankain olsem seip bilong sel, ol bai luk nais tru na em bai lukautim gut ol lain i sindaun insait.”

Yu ting wanem: Sel bilong solwara i kamap long rot bilong evolusen? O wanpela i bin wokim?