Stori Bilong Wanpela Meri

“Mi No Laik Senisim Wanpela Samting!”

STORI BILONG GLADYS ALLEN

Sampela taim ol man i save askim mi, “Sapos yu inap long statim laip bilong yu gen, bai yu senisim wanem samting? Mi ken tok tru olsem, “Mi no laik senisim wanpela samting!” Orait mi laik stori long as na mi gat dispela kain tingting.

LONG taim bilong san long 1929, taim mi gat 2-pela krismas, wanpela gutpela samting i kamap long papa bilong mi, Matthew Allen. Em i bin kisim dispela buklet Millions Now Living Will Never Die!, em ol Intenesenel Sumatin Bilong Baibel i bin wokim, em nem bilong ol Witnes Bilong Jehova long bipo. Kwiktaim papa i kirap ritim sampela pes na bihain em i tok, “Dispela em i wanpela gutpela tok mi ritim!”

Bihain liklik, papa i kisim ol narapela buk na nius bilong ol Sumatin Bilong Baibel. Em i no lusim taim long tokim ol lain i sindaun klostu long ol samting em i lainim. Tasol i no gat kongrigesen bilong ol Witnes Bilong Jehova long hap bilong mipela. Taim papa i kisim save olsem olgeta Kristen i mas bung wantaim, em i kisim famili bilong mipela i go sindaun long wanpela taun, Orangeville, long Ontario, Kanada long 1935, long wanem, i gat wanpela kongrigesen long dispela hap.

Long dispela taim, ol i no save kirapim ol pikinini long bung wantaim ol long miting; ol pikinini i save stap ausait long ples bilong miting na pilai i go inap long taim ol manmeri i bikpela pinis ol i pinis long miting. Papa i no amamas long dispela pasin. Em i tingting olsem, “Sapos ol miting bai helpim mi, orait ol bai helpim tu ol pikinini bilong mi.” Olsem na maski em i namba wan taim bilong papa long bung wantaim ol, em i tokim mi na bikbrata bilong mi, Bob, na bikpela susa bilong mi, Ella, na Ruby long bung wantaim ol manmeri i bikpela pinis long miting, na mipela i mekim olsem. I no longtaim na ol pikinini bilong ol narapela Witnes i kam long miting tu. Pasin bilong go long olgeta miting na bekim tok  long ol miting i bikpela samting long mipela.

Papa i laikim Baibel, na em i gat gutpela pasin bilong kamapim ol stori bilong Baibel. Long dispela rot, em i bin skulim mipela long ol bikpela samting na putim i go daun long bel bilong mipela taim mipela i liklik yet, na mi tingim yet ol dispela samting. Wanpela samting mi inap tingim yet, em Jehova i save mekim gut long ol man i bihainim tok bilong em.

Papa i skulim mipela tu long mekim wok long Baibel bilong sambai long bilip bilong mipela. Mipela i save mekim pilai long en. Papa i save tok, “Mi bilip olsem taim mi dai bai mi go long heven. Yu mas kamapim klia long mi olsem mi i no inap go long heven.” Mi na Ruby i save sekim buk Concordance bilong painim ol skripsa em mipela inap mekim wok long en bilong daunim dispela bilip. Taim mitupela i ritim pinis ol skripsa mitupela i painim, papa i save tok, “Em gutpela, tasol mi bilip yet olsem mi bai go long heven.” Mitupela i save sekim gen buk Concordance. Mipela i save mekim olsem i go i go inap planti aua, inap long taim papa i amamas long bekim mipela i givim long em. Dispela i mekim na mitupela Ruby inap stori gut long bilip bilong mipela na sambai long en.

Winim Pasin Bilong Pret Long Ol Man

Maski mi kisim gutpela skul long haus na long ol miting bilong kongrigesen, mi mas tokaut olsem i gat sampela samting Kristen i mas mekim na mi pilim i hatwok. Olsem planti yangpela, mi no laik i stap narapela kain long ol narapela, na moa yet long ol wanklas bilong mi. Wanpela samting i kamap bilong traim bilip bilong mi, em long taim mipela i mats wantaim olsem bikpela lain na karim ol strongpela pepa i gat rait long en.

Ol i laik bai wanpela grup bilong ol brata sista i wokabaut isi isi i go daun long bikrot bilong taun na karim ol pepa i gat ol tokaut long en. I gat olsem 3,000 manmeri tasol long taun bilong mipela na olgeta i save long narapela narapela. Wanpela taim mipela i mekim olsem, na mi wokabaut long baksait na karim wanpela pepa i gat tok olsem, “Ol Lotu i Olsem Trap Bilong Giamanim Yu.” Sampela ol wanskul bilong mi i lukim mi, na kwiktaim ol i bihainim mi na ol i mekim singsing olsem, “God i Mas Helpim King.” Olsem wanem mi karim dispela hevi? Mi beten strong long Jehova i ken strongim mi na mi ken wok yet i go. Taim mats i pinis, mi go bek hariap long Haus Kingdom bilong givim bek pepa bilong mi na go long haus. Tasol brata i go pas long dispela wok i tokim mi olsem bai ol i mekim narapela mats gen na ol i sot long wanpela man long karim pepa i gat rait. Olsem na mi go mats gen, na mi beten strong moa yet. Tasol long dispela taim, ol wanklas bilong mi i les na ol i go pinis long haus bilong ol. Em nau, beten mi mekim bilong kisim strong i kamap beten bilong tok tenkyu!​​—⁠Sindaun 3:⁠5.

Famili bilong mipela i save amamas long singautim ol lain i mekim wok painia long kam long haus bilong mipela. Ol i lain bilong amamas na mipela i save amamas long singautim ol. Mi tingim yet taim mi liklik, papamama i save tokim mipela olsem wok bilong autim tok fultaim em i nambawan gutpela wok bilong mekim.

Mi bihainim tok bilong ol na long 1945 mi kirap mekim wok autim tok fultaim. Bihain mi go bungim sista bilong mi, Ella, em i mekim wok painia long London, Ontario. Long dispela hap, ol i lainim mi long wanpela pasin bilong autim tok em mi ting mi no inap long mekim. Ol brata i save go insait long haus dring na tilim nius Wastaua na Consolation (nau ol i kolim Kirap!) long ol wan wan tebol bilong ol kastama. Gutpela tru ol i save mekim dispela wok long Sarere apinun, olsem na long wik olgeta mi beten bilong kisim strong na  bai mi inap mekim dispela wok! Tru, dispela wok i hatwok long mi mekim, tasol gutpela samting i kamap.

Long dispela rot mi lain long olsem wanem mi ken tilim nius Consolation i stori long ol samting nogut i painim ol brata bilong yumi i stap long kalabus nogut bilong ol Natsi, na olsem wanem mi ken tilim long ol bikpela bisnisman bilong Kanada, na ol presiden bilong ol bikpela koporesen. Insait long ol yia i go pinis, mi painimaut olsem oltaim Jehova i save helpim yumi sapos yumi bilip na askim em long strongim yumi. Olsem papa i save tok, Jehova i save blesim ol lain i bihainim tok bilong Em.

Singaut Bilong Mekim Wok Long Quebec

Long Julai 4, 1940, ol i tambuim wok bilong ol Witnes Bilong Jehova long Kanada. Bihain ol i rausim dispela tambu, tasol ol i mekim nogut yet long mipela long Quebec, em provins Katolik. Mipela i mekim wanpela bikpela tokaut long rot bilong wanpela liklik nius i gat strongpela tok long en bilong tokaut olsem ol man i mekim nogut long ol brata bilong yumi long dispela hap. (Quebec’s Burning Hate for God and Christ and Freedom Is the Shame of All Canada) Nathan H. Knorr, em wanpela memba bilong Gavening Bodi bilong ol Witnes Bilong Jehova, i bung wantaim ol planti handet painia long Montreal bilong stori long ol samting mipela bai mekim. Brata Knorr i tokim mipela olsem sapos mipela i wanbel long insait long dispela bikpela tokaut, mipela i mas redi long ol bai holim mipela na putim mipela long kalabus. Tok bilong em i stret! Ol i holim mi 15-pela taim. Taim mipela i go autim tok, mipela i save karim titbras na kom i go raun wantaim mipela, nogut ol i holim mipela na mipela slip long haus kalabus.

Pastaim mipela i mekim wok bilong mipela long nait na bai mipela i no ken pulim ai bilong ol man. Mi save karim sampela liklik nius insait long bek mi hangamapim long nek bilong mi aninit long saket. Ol liklik nius i pulap long bek, na dispela i mekim na i luk olsem mi gat bel. Tasol em i helpim mi taim mi laik kalap long bas bilong i go long hap bilong autim tok na ol man i pulap long bas. Sampela taim ol man i gat gutpela pasin i save sanap na tokim dispela “meri i gat bel” long sindaun long sia bilong ol.

Isi isi mipela kirap long tilim dispela liklik nius long san. Mipela save lusim liklik nius long 3-pela o 4-pela haus, na mipela i go long narapela hap. Dispela pasin mipela i bihainim i kamap gutpela. Tasol sapos wanpela pris Katolik i kisim save olsem mipela i stap long dispela hap, mipela i save hevi bai kamap. Wanpela taim, wanpela pris i kirapim bel bilong 50 o 60 man, meri na pikinini na ol i tromoi tomato na kiau long mipela. Mipela i hait long haus bilong wanpela sista Kristen, na mipela i mas slip long plua long haus bilong em long dispela nait.

Ol i sot tru long ol painia bilong autim tok long ol man bilong Quebec i save tok ples Frans, olsem na long Disemba 1958, mi na susa bilong mi, Ruby, i kirap lainim tok ples Frans. Olsem na bihain ol i makim mitupela long go long hap em ol i save mekim tok ples Frans. Long ol hap mipela i go long en i gat sampela nupela samting i painim mipela. Long wanpela hap, inap tupela yia mipela i save go long ol haus na autim tok inap 8-pela aua long olgeta de, tasol i no gat wanpela i opim dua. Ol dua bilong haus i gat windo long en, olsem na taim mipela i kamap long dua bilong haus ol manmeri i save pulim blain i kam daun. Tasol mipela i no les. Nau i gat tupela strongpela kongrigesen long dispela taun.

Jehova i Wok Yet Long Strongim Mi

Mipela i kirap mekim wok painia salim long yia 1965. Long wanpela hap mipela i mekim wok painia salim, mipela i pilim tru tok bilong Pol i stap long 1 Timoti 6:​8, em i tok: “Sapos yumi gat kaikai na laplap samting, orait yumi ken tok, ‘Em inap long mi.’ ” Mipela i mas skelim gut ol samting na bai mipela inap long baim ol samting bilong mipela. Mipela putim mani bilong baim wel bilong masin bilong hatim haus, baim haus, pawa, na kaikai. Taim mipela i skelim pinis mani bilong ol dispela samting, nau mipela i gat 60 toea tasol i stap yet bilong baim ol narapela samting long dispela mun.

Mitupela i sot long mani, olsem na mitupela i save hatim haus long sampela aua tasol long nait. Olsem na oltaim rum bilong mipela i save kol na i no winim 15 digri na sampela taim em i save kol moa. Wanpela taim, pikinini man bilong wanpela Baibel-stadi bilong Ruby i kam lukim mitupela.  Ating em i go long haus na tokim mama bilong em olsem mitupela i kol nogut tru, olsem na bihain mama bilong em i save salim 24 kina long olgeta mun bilong mitupela i ken baim wel bilong masin bilong hatim haus na bai em i ken wok i stap long olgeta taim. Mitupela i no pilim olsem mipela i sot tru long wanpela samting. Tru mitupela i no gat planti samting, tasol oltaim mipela i gat ol samting inap long mipela. Taim mitupela i gat sampela samting moa, mitupela i pilim olsem em i presen. Tok bilong Song 37:25 i stret tru, em i tok: “Mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru”!

Maski ol man i mekim nogut long mipela, mi amamas long lukim sampela manmeri mi bin stadi wantaim ol long Baibel ol i kisim save long tok i tru. Sampela i kisim wok bilong autim tok fultaim olsem wok bilong ol, na mi amamas tru long dispela.

Winim Ol Nupela Traim

Long 1970 mitupela i go long Cornwall, Ontario, em nupela hap mitupela bai wok long en. Mitupela i kam long Cornwall na wanpela yia bihain, mama i kisim sik. Papa i bin dai long 1957, na mi wantaim tupela susa bilong mi i senis senis long lukautim mama i go inap long taim em i dai long 1972. Long dispela taim tupela poroman painia bilong mipela, em Ella Lisitza na Ann Kowalenko, tupela i strongim mipela na helpim mipela long dispela taim bilong hevi. Ol i lukautim ol Baibel-stadi bilong mitupela na ol narapela samting long taim mitupela i no stap. Tok bilong Sindaun 18:24 i stret tru, em i tok: “Sampela man i gat narakain pren na tupela i pas gut na i wanbel. Pasin bilong tupela i winim pasin namel long tupela brata”!

Tru, i gat planti ol hevi na traim i bin painim mi. Tasol Jehova i helpim mi na mi inap long karim ol dispela hevi. Mi amamas long insait yet long wok autim tok fultaim. Bob i dai long 1993. Em i bin mekim wok painia winim 20 yia, na meri bilong em Doll i bin wok painia wantaim em inap 10-pela yia. Bikpela susa bilong mi Ella, em i dai long Oktoba 1998, em i bin mekim wok painia winim 30 yia na oltaim em i bin amamas long wok painia. Long 1991 narapela susa bilong mi, Ruby, em i kisim toksave long dokta olsem em i gat sik kensa. Tasol em i mekim yet wok autim tok long liklik strong em i gat. Na em i bin holim yet pasin bilong lap na amamas i go inap long dispela moning em i bin dai long Septemba 26, 1999. Mi no gat moa  ol susa bilong mi, tasol mi gat famili spirit, em ol brata sista ol i helpim mi long holim yet pasin bilong lap na amamas.

Taim mi tingting i go bek long i stap bilong mi, i no gat wanpela samting mi laik senisim long laip bilong mi. Mi no marit, tasol mi bin kisim gutpela blesing tru, olsem gutpela papamama, wanpela brata na ol susa em ol i bin putim tok i tru i stap namba wan samting long laip bilong ol. Mi amamas na wet long lukim ol klostu nau long taim ol i kirap bek. Mi ken pilim olsem papa i holimpasim mi, na mi inap lukim aiwara bilong mama taim mipela i holimpasim narapela narapela. Ella, Ruby, na Bob bai ol i amamas nogut tru.

Tasol nau long dispela taim mi gat laik long mekim yet wok long hap strong bilong mi i stap yet long litimapim nem bilong Jehova na givim biknem long em. Wok bilong autim tok fultaim em wanpela gutpela wok tru. Olsem man bilong raitim song i tok long ol man i wokabaut long rot Jehova i makim: “Olgeta samting yu mekim bai i kamap gutpela. Na bai yu amamas.”​​—⁠Song 128:​1, 2.

[Ol Piksa long pes 26]

Papa i laikim tru Baibel. Em i bin skulim mipela long mekim wok long Baibel bilong sambai long bilip bilong mipela

[Piksa long pes 28]

Kirap long han kais i go long han sut: Ruby, mi, Bob, Ella, mama, na papa long 1947

[Piksa long pes 28]

Namba wan lain, kirap long han kais i go long han sut: Mi, Ruby na Ella long wanpela Kibung Distrik long yia 1998