Ol Gutpela Man i Sindaun Klostu Ol i Go We?

“Ol man long nau i no moa tingim ol man i sindaun klostu long ol.”​​—⁠Benjamin Disraeli, wanpela bikman bilong Inglan long bipo.

OL LAPUN bilong Kuba i gat narakain rot bilong strongim pasin bilong i stap gut wantaim, olsem: Sampela lain i save sindaun klostu, o ol lapun bubu, ol i save bung wantaim olsem wanpela grup. Wanpela ripot long 1997 i tok, long olgeta 5-pela 5-pela lapun long Kuba, wanpela lapun i insait long kain grup olsem. Long dispela rot ol i painim ol poroman, na narapela i helpim narapela, na ol i kisim helpim long olsem wanem ol i ken lukautim skin bilong ol. Wanpela nius (World-Health) i tok: “Taim ol dokta i gat wok long raun na givim sut long ol manmeri bilong pasim sik, ol i save kisim helpim long dispela grup bilong ol lapun em ol i amamas long helpim ol.”

Tasol sori tru, long planti hap ol man i no moa tingim ol narapela i sindaun klostu long ol. Tingim samting nogut i kamap long Wolfgang Dircks, em i sindaun long wanpela bikpela haus i gat planti rum ol man i save rentim long westen Yurop. Sampela yia i go pinis, nius The Canberra Times i tok, i gat 17-pela famili ol tu i sindaun long dispela bikpela haus olsem Wolfgang, tasol maski ol i luksave olsem em i no kam mekim ol wok bilong em, “i no gat wanpela i tingting long ringim belo long dua bilong em.” Taim papa bilong haus i kam, “em i painim bun bilong man i sindaun i stap long ai bilong televisen.” Antap long lek bilong em i gat program bilong televisen bilong Disemba 5, 1993. Wolfgang i bin dai inap faipela yia pinis. Sori tru! Pasin bilong tingim na lukautim man i sindaun klostu i no moa i stap. Olsem na wanpela man bilong raitim stori i tok long nius The New York Times olsem, ol man i sindaun klostu long em ol i kamap “wanpela lain em narapela i no save long narapela,” na i wankain tu long planti ol narapela hap. Olsem wanem? Em i wankain tu long hap bilong yu?

Tru, long sampela hap longwe long ol taun ol man i save mekim pasin wantok long ol lain i sindaun klostu long ol, na long sampela taun ol i wok long kirapim pasin bilong tingim ol man i sindaun klostu long ol. Tasol planti man i sindaun long ol bikpela taun ol i bel hevi na pilim olsem ol i stap wanpis, na ol i pret, nogut wanpela samting nogut i painim ol, long wanem, ol i no save liklik long ol lain i sindaun klostu long ol. Olsem wanem ol i pilim olsem?

Narapela i No Save Liklik Long Narapela

Tru, yumi olgeta i gat ol lain i sindaun klostu long yumi. Taim yumi lukim lait bilong televisen, na tewel o mak bilong man i kamap  long windo, na ol i kirapim na mekim dai lait, na krai bilong ka i go i kam, na lek bilong man i pairap, na ki i pairap taim ol i opim na lokim dua, dispela olgeta samting i makim olsem i gat ol man i sindaun klostu long yumi. Tasol pasin bilong tingim man i sindaun klostu, em i pinis taim narapela i no laik save liklik long narapela na ol i save hariap hariap long mekim ol samting. Ating ol i pilim olsem i no gat as na ol i mas save gut long ol man i sindaun klostu long ol, o ol i no gat wok long helpim ol. Nius Herald Sun bilong Australia i tok: “Ol man i no laik save long ol lain i sindaun klostu long ol, na ol i no pilim olsem ol i gat wok long mekim pasin pren long ol. Dispela i mekim na nau planti ol i save givim baksait o lusim tingting long ol man em ol i no laik bung wantaim ol.”

Yumi no ken kirap nogut long dispela samting. Long nau ol manmeri i save “laikim ol yet tasol,” na long planti hap ol man i kisim hevi long ol dispela kain man i tingim ol yet tasol. (2 Timoti 3:⁠2) Olsem na planti ol i stap wanpis na i stap longwe long ol narapela. Dispela i save kirapim pasin olsem narapela i no bilip long narapela, na em i kamap moa yet taim pasin raskol i go bikpela long hap bilong ol. Taim narapela i no bilip long narapela, dispela i save pinisim pasin bilong sori.

Maski wanem pasin i stap long hap bilong yu, bai yu wanbel long tok olsem, taim i gat ol gutpela man i sindaun klostu long yu, dispela i gutpela samting tru bilong helpim dispela ples. Planti gutpela samting inap kamap taim ol manmeri i wok wantaim bilong winim wanpela mak. Na tu, ol gutpela man i sindaun klostu ol i olsem gutpela samting tru yumi kisim. Stori i kamap bihain bai toktok long dispela samting.