Yumi Mas Ting Olsem Wanem Long Ol Traim?

OL TRAIM! Em samting i save painim olgeta manmeri. Ol traim inap kamap, long wanem, pasin bilong narapela i skrapim bel, hevi bilong mani, sik, ol traim, ol wanlain i strong long pulim yumi long mekim rong, ol man i birua, yumi no insait long pait o lotuim ol god giaman na yumi karim hevi long dispela, na planti narapela samting. Maski wanem kain traim i painim yumi, dispela i save mekim na yumi tingting planti. Olsem wanem yumi inap karim hevi bilong ol traim? Ol traim inap helpim yumi long sampela rot?

Nambawan Helpim

King Devit bilong bipo i bin kisim kain kain traim long i stap bilong em, tasol em i stap gut long God i go inap long taim em i dai. Olsem wanem em inap long sanap strong? Em i kamapim as bilong strong bilong em taim em i tok: “Bikpela em i wasman bilong mi. Olsem na mi no inap sot long wanpela samting.” Na em i tok moa olsem: “God, maski mi wokabaut long ples nogut na bikpela tudak, mi no ken pret long samting nogut, long wanem, yu stap wantaim mi. Mi lukim yu i holim stik ol wasman bilong sipsip i save holim, olsem na bel bilong mi i stap isi. Mi no inap bagarap.” (Song 23:​1, 4) Yes, Jehova em i as tru bilong bikpela helpim. Em i bin helpim Devit long taim nogut tru, na em i redi long mekim wankain long yumi taim em i mas mekim olsem.

Olsem wanem yumi inap kisim dispela helpim bilong Jehova? Baibel i soim rot bilong kisim dispela helpim na em i tok: “Yupela yet i mas traim na lukim na bai yupela i save olsem Bikpela i gutpela tru.” (Song 34:⁠8) Em wanpela gutpela tok Baibel i kirapim yumi long mekim, tasol em i makim wanem samting? Em tok bilong strongim yumi long mekim wok bilong Jehova na bihainim laik bilong em long i stap bilong yumi. Bilong mekim olsem yumi mas lusim sampela samting yumi laik mekim, na daunim laik bilong yumi yet. Sampela taim dispela inap kamapim ol traim​​—⁠ol man bai birua na yumi karim pen na hevi. Tasol ol lain husat i bihainim dispela tok bilong Jehova, ol i no inap bel hevi long ol i bin mekim olsem. Jehova bai mekim gutpela pasin tru long ol. Em bai stiaim ol na lukautim ol long ol samting bilong spirit. Em bai strongim ol long taim bilong hevi long rot bilong Tok bilong em, spirit holi, na kongrigesen Kristen. Na bihain em bai givim pe long ol em laip i stap gut oltaim.​​—⁠Song 23:6; 25:9; Aisaia 30:21; Rom 15:⁠5.

Ol lain husat i pasim tok long bel long mekim wok bilong Jehova oltaim na ol i bihainim gut dispela tok, ol i kisim save olsem Jehova i save truim olgeta tok promis bilong em. Dispela samting i  painim ol Israel husat i bin bihainim Josua i go insait long Graun Bilong Promis. Taim ol i brukim wara Jordan na i go long hapsait bilong en, ol traim i painim ol, ol i mas pait long ol birua, na ol hevi i painim ol bai skulim ol. Tasol dispela lain i gat strongpela bilip, winim ol tumbuna papa bilong ol husat i bin lusim Isip na i dai long ples drai nating. Olsem na Jehova i bin helpim ol lain i stap gut long em, na long taim Josua i laik i dai, Baibel i stori long sindaun bilong ol olsem: “Bikpela i givim gutpela taim long ol, olsem em i bin promis long ol tumbuna bilong ol. . . . Bikpela i inapim tru olgeta gutpela promis em i bin mekim long ol.” (Josua 21:​44, 45) Dispela samting inap kamap long yumi tu sapos yumi bilip strong long Jehova long taim traim i painim yumi na long ol narapela taim tu.

Wanem samting inap mekim na yumi no bilip strong moa long Jehova? Jisas i kolim wanpela samting na i tok: “I no gat wanpela man inap i stap aninit long tupela bosman wantaim. . . . Yupela i no inap i stap aninit long God na long mani wantaim.” (Matyu 6:​24) Sapos yumi bilip long Jehova, bai yumi no tingim ol samting bilong skin bai lukautim yumi, olsem planti manmeri i ting ol dispela samting bai helpim ol. Jisas i tokim ol disaipel bilong em olsem: “Namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting [ol samting bilong skin yupela i mas kisim] tu long yupela.” (Matyu 6:​33) Kristen i kisim stretpela tingting long ol samting bilong skin na putim Kingdom bilong God i stap namba wan samting long laip bilong em, em i makim rot i stret. (Saveman 7:​12) Tru, dispela inap mekim na em i mas lusim sampela samting. Ating em bai lusim sampela samting bilong skin. Tasol em bai kisim planti blesing. Na Jehova bai helpim em.​​—⁠Aisaia 48:​17, 18.

Ol Samting Ol Traim i Skulim Yumi Long En

Pasin bilong ‘traim na lukim na bai yumi save olsem Bikpela i gutpela tru’ i no makim olsem dispela bai lukautim yumi na bai ol hevi i no inap painim yumi, o banisim yumi na bai Satan na ol lain bilong em i no inap bagarapim yumi, nogat. (Saveman 9:​11) Olsem na ol samting inap kamap bilong traim pasin bilong Kristen long givim bel na sanap strong. Bilong wanem Jehova i larim ol traim i painim ol lain i lotuim em? Aposel Pita i kolim wanpela as na em i tok: “Nau long liklik taim tasol, ating kain kain traim bai i kamap na givim pen long yupela. Long dispela pasin God i save traim bilip bilong yupela. Yumi save, gol em i gutpela samting tru, tasol ol i save kukim long paia, bilong traim na painimaut em i gol tru, o nogat. Bilip bilong yupela i winim gol na i gutpela moa, long wanem, gol em i samting bilong bagarap. Olsem na sapos ol kain kain traim i kamap long yupela, em i bilong traim bilip na soim olsem, yupela i bilip tru long Krais. Na long las de, taim Jisas Krais i kamap ples klia, em bai i amamas tru long yupela na givim biknem long yupela.” (1 Pita 1:​6, 7) Yes, ol traim i painim yumi i opim rot long yumi ken kamapim klia yumi gat wanem kain bilip na pasin bilong yumi long laikim Jehova. Na ol i helpim yumi long bekim ol tok Satan i wok long sutim.​​—⁠Sindaun 27:11; KTH 12:⁠10.

Ol traim i helpim tu yumi long kisim ol narapela pasin Kristen. Olsem: Tingim tok bilong man bilong raitim song: ‘Bikpela i save tingting long ol manmeri i no bikhet. Na ol bikhetman tu i no inap hait long em.’ (Song 138:⁠6) Pasin daun i no pasin tru bilong planti bilong yumi, tasol ol traim inap helpim yumi long kisim dispela pasin yumi mas kisim. Tingim samting i bin kamap long taim bilong Moses, taim sampela Israel i les pinis long kaikai mana long olgeta wik na mun. Dispela em wanpela traim bilong ol, maski mana em wanpela kaikai i kamap long rot bilong mirakel. Wanem as bilong dispela traim? Moses i tokim ol Israel: “Long dispela ples [God] em i givim yupela mana bilong kaikai . . . bilong traim yupela. Olsem bai bihain em i ken mekim ol gutpela samting i kamap long yupela.”​​—⁠Lo 8:​16.

 Ol samting inap traim pasin daun bilong yumi. Olsem wanem dispela inap kamap? Olsem: Yumi gat wanem tingting long ol senis i kamap long pasin bilong oganaisesen long mekim wok? (Aisaia 60:17) Yumi givim bel olgeta long sapotim wok bilong autim tok na skulim ol man? (Matyu 24:14; 28:​19, 20) Yumi save bilip long ol tok i tru bilong Baibel em lain “wokboi i gat gutpela tingting” i save kamapim? (Matyu 24:​45-​47; Sindaun 4:​18) Yumi sakim dispela tingting bilong kisim ol nupela nupela kain masin, ol stail klos, na nupela ka? Man i gat pasin daun em inap tok yes long ol kain askim olsem.​​—⁠1 Pita 1:​14-​16; 2 Pita 3:​11.

Ol traim i helpim yumi long kisim narapela bikpela pasin​—⁠pasin bilong sanap strong. Disaipel Jems i tok: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi.” (Jems 1:​2, 3) Taim yu bilip tru long Jehova na karim hevi bilong ol traim i painim yu, dispela bai kamapim pasin bilong sanap strong, bihainim wankain pasin long olgeta taim, na stap gut long God. Em bai strongim yumi long sakim ol narapela traim bilong Satan, em god bilong dispela graun i save belhat.​​—⁠1 Pita 5:​8-​10; 1 Jon 5:​19; KTH 12:⁠12.

Holimpas Stretpela Tingting Long Ol Hevi

Pikinini bilong God i gutpela olgeta, em Jisas Krais, i bungim planti traim taim em i stap long graun na ol gutpela samting i painim em taim em i sanap strong. Pol i tok Jisas i bin “karim pen, na dispela i skulim em tru long pasin bilong bihainim tok bilong God.” (Hibru 5:⁠8) Pasin bilong em long stap gut long God i go inap long taim em i dai i litimapim nem bilong Jehova, na i opim rot long em inap givim gutpela laip bilong em olsem pe bilong baim bek ol manmeri. Dispela i opim rot long ol manmeri i bilip long Jisas ol i ken tingting long kisim laip oltaim. (Jon 3:​16) Jisas i bin stap gut long God taim traim i painim em, olsem na nau em i stap Hetpris na em i sindaun long sia King.​​—⁠Hibru 7:​26-​28; 12:⁠2.

Olsem wanem long yumi? Pasin bilong yumi long i stap gut long God taim ol traim i kamap em tu bai kamapim ol gutpela blesing. Baibel i tok long ol manmeri i wet long kisim laip long heven olsem: “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en. God i tok pinis long givim dispela prais long olgeta man i save laikim em tru.” (Jems 1:​12) Ol manmeri i wet long kisim laip long graun i bilip tru olsem sapos ol i sanap strong na stap gut long God, ol bai kisim laip i stap gut oltaim long Paradais long graun. (KTH 21:​3-6) Na bikpela samting moa, pasin bilong ol long sanap strong na stap gut long God i litimapim nem bilong Jehova.

Taim yumi wok long bihainim lek mak bilong Jisas, yumi ken bilip tru olsem yumi inap karim na winim ol traim i painim yumi long dispela taim yumi stap long en. (1 Korin 10:13; 1 Pita 2:​21) Olsem wanem yumi inap mekim olsem? Yumi mas bilip long Jehova, em man bilong givim “bikpela strong” long ol man i bilip long em. (2 Korin 4:⁠7) Yumi mas i gat wankain bilip olsem bilong Jop, em i bin sanap strong taim ol bikpela traim i painim em na em i tok: “Sapos em i traim mi, bai em i lukim mi i kamap gutpela tru olsem gol.”​​—⁠Jop 23:⁠10.

[Piksa long pes 31]

Pasin bilong Jisas long stap gut long God taim traim i painim em i litimapim nem bilong Jehova. Yumi inap mekim wankain pasin