Em i Wok Strong Long Kirapim Ol Man Long Ritim Baibel

Em i dai long ples kol nogut tru long Isten Saibiria; ol i bin tok bilas nogut long em na semim em. Ol man i lusim tingting olsem dispela man i bin mekim bikpela wok tru long helpim ol wantok Grik long kisim save long Baibel. Nem bilong dispela man ol i bin givim baksait long en, em Seraphim. Strongpela wok bilong em long kirapim ol man long ritim Baibel, em wanpela as na em i dai.

SERAPHIM i bin i stap long taim kantri Grik i stap aninit long Gavman Ottoman. Wanpela saveman bilong lotu Grik Otodoks, George Metallinos, i tok, long dispela taim bipo “ol i sot long ol gutpela skul,” na “klostu olgeta manmeri i no bin skul gut,” na ol pris tu.

Long dispela taim tok Grik Koine em i narapela kain tru long tok Grik planti manmeri i mekim. Ol i bin raitim Ol Skripsa Grik long Koine, tasol long dispela taim ol manmeri i no bin skul ol i no gat save long dispela tok ples. Tok pait i kamap long wanem kain tok ol i mas mekim, na misin i makim olsem ol i mas mekim tok Grik Koine, em ol man i no save long en.

Orait long dispela taim, long 1670 samting, wanpela pikinini i kamap insait long wanpela famili i gat nem long ailan Lesbos, long kantri Grik, nem bilong em Stephanos Ioannis Pogonatus. Ol lain bilong ailan ol i stap rabis na i no gat save long rit rait. I no gat ol skul long ailan, so Stephanos i mas kisim skul long wanpela haus bruder i stap long dispela ailan. Taim em i yangpela tru ol i makim em long kamap wanpela dikon bilong Misin Grik Otodoks, na ol i givim nem Seraphim long em.

Long 1693 samting, bikpela laik bilong Seraphim long kisim save i kirapim em long i go long Constantinople (nau em Istanbul, Teki). Bihain, bikpela save bilong em i mekim na ol bikman bilong Grik ol i rispek long em. I no longtaim na wanpela lain bilong Grik ol i wok hait, ol i salim em i go olsem mausman bilong ol long Bikpela King Peter bilong Rasia. Bilong go long Moscow na kam bek gen, Seraphim i mas brukim planti hap bilong Yurop, na em i bungim ol nupela kain tingting bilong lotu na bilong ol man i mas skul na kisim save. Long 1698, Seraphim i go long Inglan na em i bungim sampela bikpela man long London na Oxford. Em i bungim Asbisop Bilong Canterbury, em het bilong Misin Angliken, na i no longtaim na dispela bai helpim gut Seraphim.

Prinim Wanpela Baibel

Taim Seraphim i stap long Inglan, em i tingting olsem ol Grik i mas i gat wanpela “Nupela Testamen” (Ol Skripsa Grik) ol inap kisimgut tok bilong en. Em i mekim wok long wanpela Baibel em bruder Maximus i bin tanim inap 50 yia paslain long em, na em i kirapim wok bilong tanim wanpela Baibel i no gat ol popaia long en na ol man inap kisim gut tok bilong en. Seraphim i givim bel na i kirapim dispela wok, tasol i no longtaim na mani bilong em i pinis. Tasol bihain Asbisop Bilong Canterbury i tok promis long givim mani long em bilong helpim dispela wok. Em nau, dispela i strongim bel bilong Seraphim na em i baim pepa bilong prinim ol Baibel na em i stretim tok wantaim wanpela man i gat wok long prinim ol buk.

 Tasol mani i sot yet na ol inap prinim Gutnius bilong Matyu, Mak, na hap tasol bilong Luk. Orait nau i gat sampela senis i kamap long wok politik long Inglan, na dispela i mekim na Asbisop Bilong Canterbury i no givim sampela mani moa. Tasol Seraphim i no larim dispela i pasim em​—⁠em i askim sampela maniman long helpim dispela wok, olsem na long 1703 em i prinim dispela Baibel. Hap mani bilong mekim dispela wok i kam long wanpela lain i laik kamapim strong wok bilong prinim ol Gutnius long ol narapela narapela kantri.

Baibel Maximus i bin tanim i gat tupela volium, na i gat ol tok bilong Baibel ol i bin raitim pastaim long tok Grik. Tasol em i bikpela na i hevi tumas. Dispela Baibel Seraphim i bin stretim, rait bilong en i liklik, na em i gat ol tok Grik bilong dispela taim tasol, na em i no bikpela, na pe bilong en i liklik.

Wanpela Tok Pait i Go Bikpela

Saveman George Metallinos i tok: “Dispela Baibel ol i bin stretim em i bin helpim tru ol man. Tasol dispela i givim rot long Seraphim long sutim tok long wanpela lain pris ol i birua long wok bilong tanim Baibel.” Ol pris i belhat stret long tok Seraphim i raitim long tok i go pas bilong Baibel olsem em i bin tanim dispela Baibel ‘bilong helpim sampela pris na lain bilong misin em ol i no gat save long tok Grik [Koine], olsem na Holi Spirit i ken helpim ol na ol inap ritim na kisim gut tok bilong Baibel ol i bin raitim long pastaim, bambai ol i ken kamapim as bilong dispela tok long ol Kristen.’ (The Translation of the Bible Into Modern Greek​​—⁠During the 19th Century) Olsem na Seraphim i go insait long bikpela tok pait i stap pinis insait long Misin Grik Otodoks long wok bilong tanim Baibel.

Sampela i save, bilong helpim ol manmeri long lain gut long laik bilong God na bilong bihainim stretpela pasin, ol i mas kisim save long Baibel. Na ol i tingting tu olsem ol pris na bisop yet i mas kisim sampela save moa long Baibel. Na tu, ol lain i laik strongim wok bilong tanim Baibel ol i bilip olsem yumi inap kamapim ol tok i tru bilong Baibel long olgeta kain tok ples.​—⁠KTH 7:⁠9.

Ol man i birua long wok bilong tanim Baibel ol i giaman na tok, sapos ol i tanim Baibel, dispela bai paulim sampela tok bilong en na misin i no gat strong moa long bosim wok bilong kamapim mining bilong Baibel na bosim ol bilip bilong lotu. Tasol as tru na ol i no orait long dispela wok, em ol i pret, long wanem, ol Talatala i mekim wok long Baibel ol i tanim long tok ples bilong ol man na bai isi isi ol i ken daunim strong bilong Misin Grik Otodoks. Planti pris i bilip olsem ol i mas sakim ol wok i laik helpim ol Talatala na wok bilong tanim Baibel na bai ol manmeri nating ol inap kisim gut tok bilong en. Olsem na wok bilong tanim Baibel i kamap nambawan bikpela tok insait long kros pait i stap namel long lotu Talatala na lotu Otodoks.

Seraphim i no gat tingting long lusim Misin Otodoks, tasol em i tokaut long ol pris i birua long em olsem ol i no gat save liklik, na ol i tingting nogut long wok bilong em. Long tok i go pas long “Nupela Testamen” bilong em, em i tok: “Olgeta Kristen i pret long God ol i mas ritim Baibel Holi” bambai ol i ken “kamap man bilong bihainim pasin bilong Krais na bihainim ol tok bilong em.” Seraphim i bilip olsem, pasin bilong tambuim ol man long stadi long Baibel, em Satan yet i as bilong en.

Pasin Birua i Go Bikpela

Taim Baibel bilong Seraphim i kamap long kantri Grik, dispela i kirapim belhat bilong Misin Grik Otodoks. Ol i putim tambu long en. Ol i kukim ol dispela Baibel long paia, na misin i tok, man i holim o ritim, ol bai rausim em long misin. Bikman Gabriel Namba 3 i putim tambu long tilim Baibel bilong Seraphim, na em i tok ol man i no gat wok long en na i no inap helpim liklik ol man.

Seraphim i no les, tasol em i lukim olsem em i mas wok isi na bihainim savepasin. Maski misin i tambuim dispela Baibel, sampela pris na man nating ol i kisim. Em i mekim gutpela wok tru long tilim dispela Baibel i go nabaut long ol man. Tasol dispela kros i stap namel long em na ol strongpela birua bilong em i no pinis.

Ol Samting i Daunim Em

Seraphim i laik kamapim strong wok bilong tilim Baibel, na tu, em i go insait long sampela lain i laik daunim gavman na ol lain i litimapim  kantri. Bilong mekim dispela wok, em i go bek long Moscow long 1704. Em i kamap gutpela pren bilong Bikpela King Peter, na inap liklik taim em i stap profesa long bikpela skul olsem yunivesiti (Russian Royal Academy). Tasol Seraphim i tingting planti long samting inap painim dispela Baibel em i bin tanim, olsem na em i go bek long Constantinople long 1705.

Long dispela yia yet, Seraphim i prinim gen Baibel em i bin tanim, na em i rausim dispela tok i go pas em i bin raitim long namba wan Baibel bilong em. Em i raitim narapela tok i go pas, bilong kirapim ol man long ritim Baibel. Planti man i kisim dispela Baibel, na i no gat stori olsem ol bikman bilong misin i bel nogut long dispela.

Tasol long 1714, Alexander Helladius, em wanpela man Grik i save raun raun na em i birua long wok bilong tanim Baibel, em i kirap na givim bikpela hevi tru long Seraphim. Long buk bilong em (Status Præsens Ecclesiæ Græcæ) em i sutim strongpela tok nogut long ol man i bin tanim tok bilong Baibel na ol Baibel ol dispela man i bin tanim. Long wanpela sapta olgeta bilong buk, Helladius i sutim tok giaman long Seraphim na tok em i stilman, na man bilong paulim mani bilong ol man, na em i wanpela giaman man i no bin skul na em i pamukman. Orait yu ting ol dispela tok em i sutim long Seraphim i tru? Man bilong raitim buk, em Stylianos Bairaktaris, i kamapim wankain tingting olsem bilong planti saveman taim em i kolim Seraphim olsem ‘wanpela wokman na man i gat gutpela save na i go pas long brukim bus,’ em ol man i sutim tok long em, long wanem, em i gat ol save ol narapela man long taim bilong em ol i no gat. Tasol buk bilong Helladius i mekim na taim nogut i painim Seraphim.

Ol i Tingting Nogut Long Em

Taim Seraphim i go bek long Rasia long 1731, Bikpela King Peter i dai pinis. Olsem na ol bikman bilong kantri i no laik helpim em. Kwin Anna Ivanovna i was gut, nogut sampela pasin i kamap na ol lain em i bosim ol i no stap isi. Long Janueri 1732, wanpela tok win i kamap long St. Petersberg olsem wanpela man Grik i kam bilong lukstil na mekim ol samting bilong bagarapim ol wok bilong kantri. Ol i tok dispela man em Seraphim. Ol polis i holimpas em na salim em i go long haus bruder long Nevsky bilong sutim ol kain kain askim long em. Long haus bruder i gat dispela buk bilong Helladius, i sutim tok long Seraphim long sampela bikpela rong. Em i raitim tripela pas i tokaut olsem em i no bin mekim ol dispela rong. Ol i wok long sutim ol askim long em inap 5-pela mun samting, na maski em i mekim wanem, em i no inap rausim dispela tingting nogut ol i gat long em.

Kot i no inap painim tru wanpela rong bilong Seraphim, olsem na ol i no kilim em i dai. Tasol ol i tingim ol dispela tok Helladius i bin sutim long em, olsem na ol i no laik lusim em i go. Ol i salim em i go kalabus long Saibiria i go inap long taim em i dai. Kot i pasim tok olsem, “ol tok i stap long buk bilong dispela man Grik, Helladius,” em i as bilong strafe kot i makim bilong Seraphim. Long Julai 1732, Seraphim i kamap long Saibiria. Ol i bin pasim ain long lek bilong em, na ol i tromoi em i go long haus kalabus nogut tru bilong Okhotsk.

Inap olsem 3-pela yia bihain, Seraphim i dai​—⁠ol man i bin lusim em na ol i lusim tingting pinis long em. Tru, sampela taim em i no bin bihainim savetingting long ol samting em i mekim na long pasin bilong em long mekim ol samting, tasol dispela Baibel em i bin tanim em i wanpela bilong planti Baibel nau ol man inap kisim long tok Grik bilong nau. * Wanpela Baibel namel long ol em New World Translation of the Holy Scriptures, tok bilong en i klia na i no hatwok long kisimgut, na dispela Baibel tu ol inap kisim long planti kain tok ples. Yumi ken tenkyu tru long God Jehova i bin lukautim Baibel na bai ol manmeri bilong olgeta hap ol i gat rot long kisim “save long as bilong tok tru.”​—⁠1 Timoti 2:​3, 4.

[Futnot]

[Piksa long pes 12]

Bikpela King Peter

[Piksa Kredit Lain long pes 10]

Photos: Courtesy American Bible Society