God i Gat Wanem Laik Long Dispela Graun?

BILONG WANEM yu amamas long wokabaut long wanpela gaden i gat ol plaua i gat gutpela smel? Bilong wanem yu pilim olsem yu kisim nupela strong na amamas taim yu lukim wanpela naispela raunwara o ol bikpela maunten em ol klaut i karamapim het bilong ol? Bilong wanem yu lusim haptaim bilong harim gutpela singsing bilong ol pisin em ol i sindaun long ol diwai? Na bilong wanem yu save amamas long lukim wanpela animal i kalap kalap o wanpela lain sipsip i wok long kaikai gras?

I gat wanpela bekim bilong ol dispela askim. God i wokim yumi bilong i stap long Paradais! Long kain ples olsem, tupela tumbuna bilong yumi, Adam na Iv, i bin kamap. Yumi kisim dispela laik bilong i stap long Paradais long ol, na ol i kisim long Man Bilong Wokim ol, em God Jehova. Em i save olsem, yumi ol man bai stap amamas long Paradais, long wanem, taim em i wokim yumi em i putim ol pasin long yumi bilong i stap amamas long kain gutpela ples olsem.

Bilong wanem Jehova i bin wokim dispela graun? “Em i bin wokim bilong olgeta samting i ken i stap long en,” na ol manmeri tu. (Aisaia 45:18) “Bikpela i bin wokim graun” em i givim wanpela gutpela ples paradais long Adam na Iv, em gaden Iden. (Jeremaia 10:12; Stat 2:​7-9, 15, 21, 22) Man! Ol i ken amamas tru long ol gutpela wara, plaua, na diwai! Ol i ken lukim ol naispela pisin long skai, na kain kain animal i raun long graun​—⁠na i no gat wanpela bilong ol i bagarapim ol manmeri. Ol pis na sampela narapela animal i raun long ol klinpela wara. Na gutpela samting moa, Adam na Iv i stap wantaim. Ol i ken kamapim ol pikinini na olsem wanpela famili i wok long i go bikpela ol i ken wok wantaim na surikim Paradais i go i go.

Tru, graun long nau i no olsem wanpela paradais, tasol yumi ken tok graun i kain olsem wanpela gutpela haus bilong wanpela famili i stap amamas. Dispela “haus” God i bin givim long yumi i gat olgeta samting yumi mas i gat​—⁠lait, hat bilong san, wara, na kaikai. Yumi amamas tru long gutpela lait na hat bilong san na lait bilong mun long nait! (Stat 1:​14-18) Insait long graun i gat wel na ol blakpela ston kol, em ol  samting bilong hatim skin. Yumi gat wara, long wanem, ren i save kam daun long graun na i gat ol wara, raunwara, na solwara. Na gutpela grinpela gras i karamapim graun olsem wanpela mat.

Olsem ol man i save putim kaikai i stap long haus, olsem tasol dispela graun i gat planti kaikai long en. Jehova ‘i mekim planti gutpela kaikai i kamap. Em i givim yumi planti kaikai na i mekim bel bilong yumi i amamas.’ (Aposel 14:​16, 17) Em nau, graun i stap pinis olsem gutpela ples bilong ol man i ken i stap long en, olsem na yumi ken ting graun bai i stap gutpela ples moa taim Jehova, dispela Man bilong “amamas,” bai mekim graun i kamap Paradais!​—⁠1 Timoti 1:⁠11.

 [Ol Piksa Kredit Lain long pes 2]

COVER: Earth: NASA photo; Stars: NASA, ESA and AURA/​Caltech