Ol Amamas Em Pasin Bilong Wokabaut Stret i Save Kamapim

“Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”​—⁠SINDAUN 10:⁠22.

1, 2. Bilong wanem yumi no ken tingting tumas long taim bihain?

WANPELA saveman long Amerika i tok: “Pasin bilong tingting tumas long taim bihain . . . i pasim rot bilong yumi long amamas long ol samting yumi holim long nau.” Dispela tok i stret long ol pikinini husat i save tingting tumas long ol samting ol inap mekim taim ol i kamap bikpela, na ol i no luksave long ol gutpela samting ol i holim pinis taim ol i stap pikinini yet. Ol i luksave long ol dispela samting taim ol i bikpela pinis.

² Ol man i lotuim Jehova, ol tu inap kisim dispela kain tingting. Tingim samting inap kamap. Yumi gat bikpela laik long lukim truim bilong tok promis bilong God long kamapim Paradais long graun. Yumi wet long kisim laip we yumi no gat sik, go lapun, kisim pen, o hevi. Em i gutpela long wetim ol dispela samting, tasol olsem wanem sapos yumi tingting tumas long ol gutpela samting bilong skin yumi bai kisim long bihain, na nau yumi no tingim ol gutpela samting bilong lotu i tru yumi holim long nau? Sori tru sapos yumi mekim olsem! Dispela inap mekim na yumi bel hevi, long wanem, yumi “wet nating longpela taim,” samting yumi wet long en i no kamap hariap. (Sindaun 13:12) Ol hevi na hatwok bilong laip inap mekim na yumi bel hevi i stap o sori long yumi yet. Ating yumi no inap karim hevi taim samting nogut i kamap na yumi kirap toktok planti. Yumi inap abrusim olgeta dispela samting, sapos yumi tingim tingim ol gutpela samting yumi kisim long nau.

3. Bai yumi skelim wanem samting long dispela stadi?

³ Sindaun 10:22 i tok: “Sapos  Bikpela yet i givim yumi planti gutpela samting, em i no save larim ol dispela samting i givim hevi long yumi.” Ol wokman bilong Jehova long nau i stap gut long ol samting bilong lotu i tru na dispela em i wanpela gutpela samting yumi ken amamas tru long en, a? Nau yumi ken skelim sampela bilong ol dispela gutpela samting na olsem wanem ol i helpim yumi yet. Taim yumi lusim haptaim bilong tingim tingim ol gutpela samting Jehova i bin givim long ‘stretpela man i save bihainim gutpela pasin,’ dispela bai strongim yumi long amamas long mekim yet wok bilong Papa bilong yumi long heven.​—⁠Sindaun 20:⁠7.

Ol Blesing i Givim Amamas Long Yumi Long Nau

4, 5. Yu yet i amamas long wanem tok bilong Baibel? Bilong wanem yu amamas long dispela tok?

⁴ Yumi gat stretpela save long ol tok bilong Baibel. Ol lotu bilong Kristendom i tok ol i bilip long Baibel. Tasol ol i no wanbel wantaim long ol tok bilong en. Sampela wanlotu tu i gat narapela narapela tingting long ol tok Baibel i lainim ol man long en. Ol i stap narapela kain tru long ol wokman bilong Jehova! Maski yumi bilong wanem kantri, skin, o lain, yumi lotuim dispela God em yumi save long nem bilong em. Em i no wanpela god triwan yumi no inap kliagut long en. (Lo 6:4; Song 83:​18, NW; Mak 12:29) Yumi save tu olsem klostu nau em taim bilong stretim bikpela tok i bin kamap long namba bilong God long bosim heven na graun. Long rot bilong stap gut long God yumi olgeta wan wan i insait long dispela bikpela tok. Yumi save long ol samting i painim ol man i dai pinis, na yumi no pret nogut tru long wanpela God em ol man i tok em i save givim bikpela pen long ol man long helpaia o long klinpaia.​—⁠Saveman 9:​5, 10.

⁵ Na tu, yumi amamas long save olsem yumi no bin kamap nating long rot bilong evolusen! Nogat. God i bin wokim yumi, na em i wokim yumi i kamap olsem em yet. (Stat 1:26; Malakai 2:10) Man bilong raitim song i tok long God: “Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.”​—⁠Song 139:⁠14.

6, 7. Wanem ol senis long laip bilong yu o long laip bilong ol arapela yu save long ol, i bin kamapim ol gutpela samting?

⁶ Yumi abrusim ol pasin inap bagarapim yumi. Ol nius na televisen samting i save mekim planti tok lukaut long ol samting nogut em pasin bilong smok, dring planti, na pasin pamuk i save kamapim. Tasol planti man i no save bihainim ol dispela tok lukaut. Wanem samting i kamap taim man husat i gat gutpela bel i kisim save olsem God tru i no orait long ol dispela pasin na i bel hevi long ol man i save mekim olsem? Dispela man bai lusim ol dispela pasin! (Aisaia 63:10; 1 Korin 6:​9, 10; 2 Korin 7:1; Efesus 4:30) Em i mekim olsem bilong God Jehova i ken orait long em, tasol em bai kisim ol narapela gutpela samting tu​—⁠gutpela helt na bel isi.

⁷ Long planti man em i hatwok tru long lusim ol pasin nogut. Tasol planti tausen manmeri i save mekim olsem long olgeta yia. Ol i dediketim ol yet long Jehova na kisim baptais long wara, na long dispela rot ol i kamapim klia olsem ol i lusim pinis ol pasin em God i no orait long en. Dispela i save strongim tru bel bilong yumi olgeta! Bai yumi tingting strong moa long stap fri long ol pasin nogut i save bagarapim yumi.

8. Wanem tok bilong Baibel i helpim famili long i stap amamas?

⁸ Yumi stap amamas wantaim famili. Long planti kantri ol famili i no stap gut wantaim. Planti marit i bruk na dispela i save bagarapim tru bel bilong planti pikinini. Long sampela kantri long Yurop, inap 20 pesen bilong olgeta famili i gat papa o mama tasol. Olsem wanem Jehova i bin helpim yumi long bihainim stretpela pasin long  samting bilong famili? Plis ritim Efesus 5:22–6:​4, na lukim gutpela tok Baibel i mekim long man marit, meri marit, na ol pikinini. Pasin bilong bihainim dispela tok na ol narapela tok bilong Baibel i strongim tru marit, i helpim papamama long mekim bikpela long ol pikinini, na i helpim famili long i stap amamas. Dispela em i wanpela gutpela samting bilong amamas tru long en, a?

9, 10. Olsem wanem tingting bilong yumi long taim bihain i narapela kain long tingting bilong ol man bilong dispela graun?

⁹ Yumi save olsem klostu nau ol hevi bilong dispela graun bai pinis. Maski save bilong saiens i go bikpela na ol i kamapim ol nupela nupela masin samting na sampela lida i wok strong long mekim gut wok bilong ol, ol bikpela hevi long i stap bilong ol man i no pinis. Klaus Schwab, em man i bin kamapim wanpela lain (World Economic Forum), na em i tok olsem “lista bilong ol hevi i painim ol manmeri i wok long i go longpela moa na taim bilong stretim ol dispela hevi i wok long i go sotpela.” Em i toktok long “ol samting nogut inap painim olgeta kantri, olsem pasin teroris, ol man i bagarapim win na wara, na bikpela hevi bilong mani.” Schwab i tok: “Long nau, winim olgeta taim bipo, i gat ol bikpela hevi i painim ol lain man, olsem na ol i mas wanbel wantaim na wokim ol bikpela disisen bilong stretim ol dispela hevi.” Ol yia i wok long i kam na i go pinis, na i luk olsem i no gat gutpela samting bai painim yumi ol man long bihain.

¹⁰ Yumi amamas tru long save olsem Jehova i bin kamapim wanpela samting em inap long stretim olgeta hevi bilong ol manmeri​—⁠em Kingdom Bilong God long han bilong Mesaia! Long rot bilong en, God tru bai “mekim i dai pait” na ol manmeri bai “sindaun gut wantaim.” (Song 46:9; Aisaia 2:⁠4) King God i bin makim, Jisas Krais, ‘em bai helpim ol rabisman, ol manmeri i sot long ol samting, na ol man i no gat strong em ol man nogut i daunim na bagarapim ol.’ (Song 72:​12-14) Taim Kingdom i bosim graun, ol man bai i no sot long kaikai. (Song 72:16) Jehova ‘bai i mekim drai wara i stap long ai bilong yumi. Na bai yumi no i dai moa, na bel hevi moa na krai moa, na bai yumi no inap kisim pen gen. Ol dispela samting bilong bipo ol i pinis olgeta.’ (KTH 21:⁠4) Kingdom i kamap pinis long heven na klostu nau em bai mekim ol samting bilong stretim olgeta hevi i stap long graun.​—⁠Daniel 2:44; KTH 11:⁠15.

11, 12. (a) Yu ting pasin bilong painim amamas i helpim man long i stap belgut tru? Stori long dispela. (b) Wanem samting i helpim man long i stap belgut tru?

¹¹ Yumi save long rot bilong stap belgut. Wanem samting i mekim na man i stap belgut? Wanpela saveman i tok pasin bilong stap belgut i gat tripela hap bilong en​—⁠amamas, pasin bilong insait long ol samting (olsem wok na famili), na laip i gat as tru bilong en (em bilong helpim ol narapela). Em i tok, long ol dispela tripela samting, amamas i no bikpela samting tumas na em i tok moa: “Dispela em i samting bilong tingim, long wanem, planti manmeri i tingting tasol long painim amamas.” Orait Baibel i tok wanem long dispela samting?

¹² King Solomon bilong Israel bilong bipo i tok: “Mi bin tingting long traim olkain pasin bilong amamas. Na mi ting long pinisim laik bilong mi. Tasol dispela pasin tu i no gat as bilong en. Mi bin painimaut olsem, pasin bilong lap em i longlong pasin tasol. Na pasin bilong amamas i no save helpim yumi liklik.” (Saveman 2:​1, 2) Baibel i tok, amamas i helpim yumi long i stap belgut, tasol em bilong liklik taim tasol. Olsem wanem long pasin bilong insait long sampela wok? Yumi gat nambawan gutpela wok bilong insait long en​—⁠wok bilong autim tok bilong Kingdom na kamapim ol disaipel. (Matyu 24:14; 28:​19, 20) Taim  yumi autim tok bilong Baibel olsem God bai kisim bek ol man, yumi insait long wanpela wok em inap mekim na God i kisim bek yumi na ol man i harim tok yumi autim. (1 Timoti 4:16) Yumi “wanwok bilong God,” olsem na yumi save olsem “amamas bilong man i givim samting long ol arapela man, dispela i winim amamas bilong man i kisim samting bilong em yet.” (1 Korin 3:9; Aposel 20:35) Dispela wok i mekim na laip bilong yumi i gat as tru bilong en na i helpim Man Bilong Wokim yumi long bekim tok long Satan, em man i sutim tok long Em. (Sindaun 27:11) Tru tumas, Jehova i soim yumi olsem pasin bilong givim bel tru long God i helpim yumi long i stap belgut tru inap oltaim.​—⁠1 Timoti 4:⁠8.

13. (a) Olsem wanem na Skul Tiokratik Bilong Autim Tok i wanpela gutpela samting yumi ken amamas tru long en? (b) Skul Tiokratik Bilong Autim Tok i bin helpim yu olsem wanem?

¹³ Yumi gat gutpela program bilong skulim yumi. Gerhard i mekim wok elda long wanpela kongrigesen bilong ol Witnes Bilong Jehova. Em i tingim bek taim em i yangpela yet na i tok: “Taim mi yangpela yet, mi gat bikpela hevi long mi no inap toktok gut. Sampela taim mi hatwok tru long kolim klia ol tok na maus bilong mi i kirap guria. Mi pilim olsem mi samting nating na mi bel hevi. Papamama bilong mi i kisim mi i go long wanpela kos i helpim ol man long toktok gut, tasol dispela i no helpim mi. As bilong dispela hevi long mi no inap toktok gut i stap long tingting bilong mi. Tasol i gat wanpela gutpela samting tru i kam long Jehova​—⁠em Skul Tiokratik Bilong Autim Tok. Taim mi go insait long dispela skul, dispela i strongim bel bilong mi. Mi wok strong long bihainim ol samting mi kisim save long en. Na dispela i helpim mi! Mi inap toktok klia, mi no bel hevi moa, na mi no pret long autim tok. Nau mi save mekim ol pablik tok. Mi tenkyu tru long Jehova long em i bin mekim i stap bilong mi i kamap gutpela moa long rot bilong dispela skul.” Yumi amamas tru long pasin bilong Jehova long skulim yumi long mekim wok bilong em, a?

14, 15. Long taim bilong bikpela hevi, oltaim yumi inap kisim wanem helpim? Stori long dispela.

¹⁴ Yumi pas gut wantaim Jehova na kisim helpim long lain brata i stap wanbel long olgeta hap. Katrin i sindaun long Jemani, em i wari tru taim em i harim ol ripot long sunami em bikpela guria i bin kamapim long saut-is Esia. Pikinini meri bilong em i raun long Tailan taim dispela bikpela bagarap i kamap. Inap 32 aua Katrin i no save pikinini meri bilong em i stap laip o em i wanpela bilong ol man i kisim bagarap em namba bilong ol i wok long i go bikpela hariap. Katrin i amamas tru taim em i kisim toksave olsem pikinini meri bilong em i stap orait!

¹⁵ Wanem samting i bin helpim Katrin long ol dispela aua em i tingting planti i stap? Em i tok: “Mi lusim klostu olgeta dispela aua long beten long Jehova. Planti taim mi luksave olsem dispela i strongim mi tru na i givim bel isi long mi. Na tu, ol bratasista bilong kongrigesen i kam lukim mi na i strongim bel bilong mi.” (Filipai 4:​6, 7) Katrin bai stap nogut tru sapos em i no bin beten long Jehova insait long ol dispela aua em i tingting planti i stap na sapos ol brata i no bin kam na mekim gut bel bilong em! Yumi pas gut wantaim Jehova na Pikinini bilong em na yumi inap bung wantaim ol bratasista Kristen. Dispela em i  wanpela gutpela samting tru em yumi mas pilim tru long bel!

16. Stori long wanpela ekspiriens i kamapim klia kirap bek em i bikpela samting.

¹⁶ Yumi bilip na wet long lukim gen ol famili i dai pinis. (Jon 5:​28, 29) Matthias i wanpela yangpela man i kamap bikpela insait long lain Witnes Bilong Jehova. Tasol em i no luksave long ol gutpela samting em i holim, na isi isi em i lusim kongrigesen Kristen taim em i yangpela. Nau em i tok: “Mi no bin toktok gut wantaim papa bilong mi long ol bikpela samting. Mitupela papa i bin tok pait planti taim. Tasol maski i olsem, papa i laik bai sindaun bilong mi i kamap gutpela. Em i laikim mi tru, em samting mi no bin luksave long en taim mi yangpela. Long 1996, taim mi sindaun klostu long bet bilong em, mi holim han bilong em na krai nogut tru i stap, na mi tokim em long mi sori stret long olgeta samting mi bin mekim na mi laikim em tumas. Tasol em i no inap harim tok bilong mi. Em i bin sik inap sotpela taim, na nau em i dai pinis. Sapos mi stap laip na lukim papa bilong mi long taim bilong kirap bek, bai mipela i mekim ol samting bipo mipela i no bin mekim wantaim. Na em bai amamas tru long harim olsem nau mi wanpela elda na mi wantaim meri bilong mi i mekim wok painia.” Kirap bek em i wanpela gutpela samting tru yumi ken wet long en!

‘I No Givim Hevi Long Yumi’

17. Pasin bilong tingim tingim long bel ol gutpela samting Jehova i givim long yumi i mas kirapim yumi long mekim wanem?

¹⁷ Jisas Krais i tok long Papa bilong em long heven olsem: “Em i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu.” (Matyu 5:45) Sapos God Jehova i givim ol gutpela samting long ol man nogut na ol man i mekim pasin i no stret, em bai givim moa yet long ol man i wokabaut stret! Song 84:11 i tok: ‘Bikpela i no save pasim wanpela gutpela samting long ol manmeri i save wokabaut stret.’ Taim yumi tingim tingim long bel ol gutpela pasin em i save mekim bilong lukautim ol man i laikim em, yumi amamas na tok tenkyu tru!

18. (a) Olsem wanem yumi ken tok ol gutpela samting i kam long Jehova i no save givim hevi long yumi? (b) Bilong wanem planti man i stap gut long God i karim pen na hevi?

¹⁸ “Bikpela yet i givim yumi planti gutpela samting”​—⁠dispela i mekim na lain bilong em i stap gut long ol samting bilong lotu i tru. Na yumi save olsem ‘em i no givim hevi long yumi.’ (Sindaun 10:22) Tasol bilong wanem ol traim i save painim planti wokman bilong God, na ol dispela traim i save givim bikpela pen na hevi long ol? I gat tripela as na ol hevi na traim i save painim yumi. (1) Sin i stap long skin bilong yumi. (Stat 6:5; 8:21; Jems 1:​14, 15) (2) Satan na ol spirit nogut. (Efesus 6:​11, 12) (3) Ol man nogut bilong dispela graun. (Jon 15:19) Jehova i larim ol samting nogut i painim yumi, tasol em i no as bilong ol dispela samting nogut. Nogat. “Olgeta gutpela samting yumi save kisim na olgeta presen i gutpela tru, em olgeta i save kam long heven. Papa i bin mekim kamap olgeta lait bilong skai, em i save salim dispela ol samting i kam daun long yumi.” (Jems 1:17) Ol gutpela samting i kam long Jehova i no save givim hevi long yumi.

19. Wanem samting bai painim ol man i wokabaut stret?

¹⁹ Bilong stap gut long ol samting bilong lotu i tru, yumi mas i go klostu long God. Taim yumi pas gut wantaim em, yumi ‘bungim planti samting bilong helpim yumi long bihain, na yumi bai kisim dispela laip em i laip tru’​—⁠em laip oltaim. (1 Timoti 6:​12, 17-19) Long nupela taim God bai kamapim, bai yumi pas gut wantaim God na stap gut long ol samting bilong skin tu. Olgeta man i “bihainim tok bilong God” ol bai kisim dispela laip em i laip tru. (Lo 28:⁠2) Gutpela sapos yumi tingting strong long amamas long wokabaut stret.

Yu Lainim Wanem Samting?

• Bilong wanem i no gutpela long tingting tumas long taim bihain?

• Yumi kisim wanem ol gutpela samting long nau?

• Bilong wanem ol gutpela wokman bilong God i karim pen na hevi?

[Askim Bilong Stadi]