Yu Redi Long Abrusim Bagarap?

“Mi lukim yu wanpela tasol yu stap stretpela man namel long olgeta manmeri bilong graun. Olsem na yu wantaim olgeta lain famili bilong yu i mas i go insait long sip.”​—⁠STAT 7:⁠1.

1. Jehova i wokim wanem rot long ol man i ken abrusim bagarap long taim bilong Noa?

JEHOVA ‘i mekim bikpela tait i kamap long ol manmeri i bin givim baksait long God’ long taim bilong Noa, tasol em i wokim tu rot bilong ol man i ken abrusim bagarap. (2 Pita 2:⁠5) Trupela God i stori gut long Noa long olsem wanem em i mas wokim sip bilong ol man i ken abrusim bagarap long wanpela bikpela tait em bai kamap long olgeta hap. (Stat 6:​14-16) Noa em i wanpela gutpela wokman bilong Jehova, olsem na em “i mekim olgeta samting olsem God i tokim em.” Wanpela as na yumi stap laip long nau, em long wanem Noa i bin bihainim tok bilong God.​—⁠Stat 6:⁠22.

2, 3. (a) Ol manmeri i stap long taim bilong Noa ol i ting olsem wanem long wok Noa i mekim? (b) Noa i bilip long wanem samting na em i go insait long sip?

² Em i wanpela bikpela hatwok tru long wokim sip. Ating planti manmeri i kirap nogut long ol samting Noa na famili bilong em i wok long mekim. Tasol dispela i no mekim na ol manmeri i bilip olsem bilong abrusim bagarap ol i mas i go insait long sip. Nogat. Bihain, God i no inap isi moa long ol man nogut.​—⁠Stat 6:3; 1 Pita 3:⁠20.

³ Taim Noa na famili bilong em i bin mekim bikpela wok inap planti yia pinis, Jehova i tokim Noa: “Mi lukim yu wanpela tasol yu stap stretpela man namel long olgeta manmeri bilong graun. Olsem na yu wantaim olgeta lain famili bilong yu i mas i go insait long sip.” Ol i bilip tru long tok bilong Jehova na “Noa na meri bilong en i go insait long sip wantaim ol pikinini man bilong tupela na ol meri bilong ol.” Jehova i pasim dua bilong lukautim ol dispela man i lotuim em. Taim Bikpela Tait i kamap long graun, sip em i rot bilong God long lukautim ol man na ol i abrusim bagarap.​—⁠Stat 7:​1, 7, 10, 16.

Taim Bilong Yumi i Olsem Taim Bilong Noa

4, 5. (a) Jisas i tok taim em i kam i stap, dispela taim i wankain olsem taim bilong husat? (b) Wanem ol samting long taim bilong yumi i wankain olsem long taim bilong Noa?

⁴ “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap.” (Matyu 24:37) Long rot bilong dispela tok Jisas i mekim, em i kamapim olsem taim em i kam i stap, dispela taim bai i wankain olsem taim bilong Noa, na tru tumas em i bin olsem. Kirap long 1919 na i kam, lain bilong God i wok long autim wankain tok lukaut long olgeta lain manmeri olsem Noa i bin autim. Planti man i gat wankain tingting long dispela tok lukaut olsem tingting bilong ol manmeri long taim bilong Noa.

⁵ Long rot bilong Bikpela Tait, Jehova i bagarapim ol manmeri i “pait na bikhet tasol.” (Stat 6:13) Noa na famili bilong em i no insait long dispela kain pasin pait, nogat, ol i stap isi na wokim sip. Olgeta man husat i lukim ol, ol i luksave long wok ol i mekim. Dispela samting tu i wankain long taim bilong yumi. Ol man i gat gutpela bel ol inap lukim olsem “stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.” (Malakai 3:​18, NW ) Ol man i gat gutpela tingting ol i amamas long pasin bilong ol Witnes Bilong Jehova long mekim tok tru, mekim gut long ol narapela,  stap isi, na wok strong, em ol dispela pasin i soim olsem lain bilong God i narapela kain long ol manmeri bilong dispela graun. Ol Witnes i save givim baksait long olgeta kain pasin bilong pait na bagarapim man na ol i larim spirit bilong Jehova i stiaim ol. Long dispela as ol i gat bel isi na ol i wok strong long wokabaut long stretpela pasin.​—⁠Aisaia 60:⁠17.

6, 7. (a) Ol manmeri long taim bilong Noa i no tingim wanem samting? Olsem wanem ol manmeri long nau i wankain? (b) Wanem ol stori i soim olsem planti man i luksave olsem ol Witnes Bilong Jehova i narapela kain?

⁶ Ol manmeri i bin stap long taim bilong Noa, ol i no tingim olsem God i helpim Noa na Noa i mekim ol samting God i tokim em long mekim. Nogat. Olsem na ol i no tingim tumas tok Noa i autim na ol i no bihainim tok lukaut bilong em. Olsem wanem long nau? Planti man i pilim tru wok na pasin bilong ol Witnes Bilong Jehova, tasol planti bilong ol i no tingim tumas gutnius na tok lukaut bilong Baibel. Ating sampela neiba, o wanblut, o bos long ples wok i mekim tok amamas long ol gutpela pasin bilong ol Kristen tru, tasol ol i tokaut tu olsem, “Sapos ol i no Witnes Bilong Jehova, em bai gutpela tru!” Ol dispela man i no luksave olsem holi spirit bilong God i stiaim ol Witnes na long dispela as ol i kamapim ol kain pasin olsem pasin laikim, bel isi, pasin helpim, gutpela pasin, pasin isi, na bosim bel. (Galesia 5:​22-25) Dispela i mas kirapim ol man long bilip long tok ol Witnes i autim.

⁷ Ol Witnes Bilong Jehova i wok long sanapim wanpela Haus Kingdom long Rasia. Wanpela man i kam toktok wantaim wanpela wokman na em i tok: “Man! Dispela lain konstraksen i narapela kain tru​—⁠i no gat wanpela man i smok, tok swea, o spak! Ating yu wanpela Witnes Bilong Jehova, a?” Wokman i tokim em, “Sapos mi tok nogat, bai yu bilipim mi?” Kwiktaim man i tok, “Nogat.” Long narapela taun long Rasia, bikman bilong taun i kirap nogut tru taim em i lukim ol Witnes i wokim nupela Haus Kingdom bilong ol. Em i tok bipo em i bin ting olsem olgeta lotu i wankain, tasol taim em i lukim pasin bilong ol Witnes Bilong Jehova long ol i no save tingim ol yet, em i senisim tingting bilong em. Em tupela stori tasol i soim olsem lain bilong Jehova i narapela kain long ol man i no bihainim ol lo bilong Baibel.

8. Yumi mas mekim wanem bilong abrusim bagarap taim pasin nogut bilong dispela graun i pinis?

⁸ Paslain long taim “ol manmeri bilong bipo” i kisim bagarap long Bikpela Tait, Noa i stap “man bilong tokaut long stretpela pasin.” (2 Pita 2:⁠5) Long dispela taim bilong las de bilong pasin nogut bilong dispela graun, lain bilong Jehova i tokaut long ol stretpela lo bilong God na ol i autim gutnius olsem rot i op long ol man i ken abrusim bagarap na kisim laip long nupela taim. (2 Pita 3:​9-13) Noa na famili bilong em i daun long God na ol i stap insait long sip na abrusim bagarap, na olsem tasol ol man husat i gat bilip na i stap gut long oganaisesen bilong Jehova hia long graun, ol bai abrusim bagarap.

 Man i Mas i Gat Bilip Bilong Abrusim Bagarap

9, 10. Bilong wanem yumi mas i gat bilip bambai yumi ken abrusim bagarap long pinis bilong dispela graun Satan i bosim?

⁹ Man i mas mekim wanem bambai em i ken abrusim bagarap taim dispela graun em Satan i bosim i bagarap? (1 Jon 5:19) Pastaim em i mas luksave olsem i mas i gat samting bilong helpim em long abrusim bagarap. Orait nau em i mas mekim ol samting bilong kisim dispela helpim. Ol manmeri long taim bilong Noa i wok long mekim ol samting ol i save mekim long olgeta de na ol i no luksave olsem ol i mas i gat samting bilong helpim ol long abrusim dispela bikpela bagarap i laik kamap. Na i gat wanpela narapela samting tu ol i sot long en​—⁠ol i no bilip long God.

¹⁰ Tasol Noa na famili bilong em i luksave olsem ol i mas kisim samting bilong lukautim ol na kisim bek ol. Ol i bilip tu long King Bilong Heven na Graun, em God Jehova. Aposel Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” Pol i tok moa: “Noa i bilip long God, na God i toksave long em long samting bai i kamap bihain, em samting Noa i no lukim yet. Orait em i bilipim tok bilong God na em i wokim wanpela sip. Na em wantaim meri pikinini bilong en ol i go insait long sip na ol i stap gut, na ol i no bagarap. Long dispela bilip bilong en, Noa i kamapim ples klia pasin nogut bilong olgeta arapela manmeri bilong graun. Noa i bilip long God na God i kolim em stretpela man.”​—⁠Hibru 11:​6, 7.

11. Pasin bilong Jehova long helpim ol man long bipo long abrusim bagarap i lainim yumi long wanem samting?

¹¹ Bilong abrusim bagarap taim pasin nogut bilong dispela graun i pinis, yumi mas bilip olsem dispela samting bai kamap. Na tu, yumi mas kamapim bilip bilong yumi​—⁠yumi mas mekim ol samting bilong kisim dispela helpim God i givim yumi bilong abrusim bagarap. Na yumi mas bilip long ofa bilong Pikinini Bilong God, Jisas Krais, long baim bek ol man. (Jon 3:​16, 36) Tasol yumi mas tingim olsem ol man i stap insait long sip bilong Noa, ol tasol i abrusim bagarap long Bikpela Tait. Na ol taun bilong hait long Israel bilong bipo i lukautim man husat i popaia na kilim i dai narapela, tasol bilong taun i ken lukautim kain man olsem, pastaim em i mas i go long dispela taun na stap insait long en i go inap long taim hetpris i dai. (Namba 35:​11-32) Long namba 10 bikpela hevi i painim Isip long taim bilong Moses, ol namba wan pikinini bilong ol Isip i dai, tasol namba wan pikinini bilong Israel i no dai. Bilong wanem i olsem? Jehova i bin tokim Moses: “Ol [Israel] i mas  kisim sampela blut bilong abus [pikinini sipsip ol i ofaim long Pasova] na penim long tupela pos bilong dua bilong haus ol i laik kaikai dispela abus long en. Na ol i mas penim tu long hap plang bilong banis i slip antap long dua. . . . Na yupela olgeta i mas i stap insait long haus na i no ken i go ausait inap long moningtaim.” (Kisim Bek 12:​7, 22) I no gat wanpela pikinini bilong lain Israel i laik sakim dispela tok bilong God na lusim haus i gat blut long tupela pos bilong dua na long plang i stap antap long dua.

12. Yumi olgeta wan wan i mas mekim wanem askim long yumi yet? Bilong wanem yumi mas mekim?

¹² Olsem na i gat as na yumi mas skelim gut i stap bilong yumi. Olsem wanem? Yumi stap insait long ol samting Jehova i mekim bilong lukautim yumi long ol samting bilong lotu i tru? Taim pasin nogut bilong graun i pinis long taim bilong bikpela hevi tru, aiwara bilong amamas bai pundaun long pes bilong ol man husat i bin mekim ol samting bambai Jehova i ken lukautim ol. Ol narapela man bai krai sori na bel hevi.

Ol Senis i Redim Yumi

13. (a) Ol senis insait long oganaisesen i bin kamapim wanem samting? (b) Stori long sampela senis i bin kamap.

¹³ Jehova i bin kamapim sampela senis insait long oganaisesen bilong em long graun. Ol dispela senis i bin mekim ol rot bilong God long lukautim yumi long ol samting bilong lotu i kamap gutpela na strong moa. Kirap long 1870 i go inap long 1932, ol bratasista long kongrigesen i votim ol elda na dikon. Long 1932, ol bratasista i no votim moa ol elda, ol i votim wanpela sevis komiti bilong helpim wanpela sevis dairekta, em oganaisesen i bin makim. Long 1938, ol i stretim rot long makim olgeta wokman insait long kongrigesen long pasin tiokratik. Kirap long 1972, Gavening Bodi Bilong Ol Witnes Bilong Jehova i stretim rot na ol kongrigesen i toksave long brens long nem bilong ol brata i winim mak bilong kamap wasman o kongrigesen sevan, na sapos brens i tok orait, bihain kongrigesen i kisim pas i makim ol brata. Insait long planti yia, wok bilong Gavening Bodi i bin go bikpela moa na ol i bin mekim sampela senis bilong ol i ken inapim ol dispela wok.

14. Wanem skul i kirap long 1959?

¹⁴ Long 1950, ol i skelim gut tok bilong Song 45:16 na dispela i kirapim wok bilong skulim ol brata. Dispela ves i tok: “Yu, king, bai yu gat planti pikinini man, na bai ol i senisim ol tumbuna bilong yu. Bai yu givim bikpela namba long ol, na bai ol i bosim ol manmeri long olgeta hap bilong graun.” Ol elda long nau i go pas long kongrigesen ol i kisim skul bilong mekim ol wok bilong God long nau na bihain long Armagedon. (KTH 16:​14, 16) Skul Bilong Wok Kingdom i kirap long 1959. Long dispela taim bipo, ol i skul inap wanpela mun bilong lainim ol wasman siaman, em bipo ol i kolim ol olsem kongrigesen-seven. Nau dispela skul i bilong lainim olgeta wasman na kongrigesen sevan. Ol dispela brata i go pas long skulim ol wan wan Witnes Bilong Jehova long kongrigesen bilong ol. Olsem na olgeta i kisim helpim long ol samting bilong lotu na bilong mekim gut moa wok bilong ol long autim gutnius bilong Kingdom.​—⁠Mak 13:⁠10.

15. I gat wanem tupela samting i helpim kongrigesen Kristen long i stap klin?

¹⁵ Ol man i laik insait long kongrigesen Kristen ol i mas inapim sampela mak. Ol man i tok bilas long lain bilong God ol i no ken insait long kongrigesen, wankain olsem ol man bilong tok  bilas long bipo ol i no inap i go insait long sip bilong Noa. (2 Pita 3:​3-7) Kirap long 1952, ol Witnes Bilong Jehova i kliagut moa long wanpela pasin bilong lukautim kongrigesen, em pasin bilong rausim ol man i mekim rong na i no tanim bel. Long gutpela pasin ol brata bai helpim ol man i mekim rong na i tanim bel tru, long “wokabaut long ol stretpela rot.”​—⁠Hibru 12:​12, 13; Sindaun 28:13; Galesia 6:⁠1.

16. Lain bilong Jehova i stap gut olsem wanem?

¹⁶ Ol tok bilong Jehova long skulim lain bilong em i olsem gutpela kaikai ol i kisim, tasol yumi no kirap nogut long dispela na dispela samting i no bin kamap nating. Long rot bilong profet Aisaia, Jehova i tok: “Ol wokman bilong mi bai ol i gat planti kaikai na wara. Tasol yupela ol lain i save givim baksait long mi, bai yupela i stap hangre na bai yupela i no gat wara bilong dring. Ol lain bilong mi, ol bai i amamas, tasol yupela bai i sem nogut tru. Bel bilong ol wokman bilong mi bai i pulap long amamas na bai ol i singim ol song bilong amamas. Tasol bel bilong yupela bai i pulap long sori na tingting bilong yupela bai i pas na yupela bai i krai strong tru.” (Aisaia 65:​13, 14) Jehova i wok long givim yumi planti gutpela tok i olsem kaikai long taim stret bambai yumi ken stap strong.​—⁠Matyu 24:⁠45.

Redi Long Abrusim Bagarap

17. Wanem samting bai helpim yumi long redim yumi yet long abrusim bagarap?

¹⁷ Long dispela taim nau, winim olgeta taim bipo, em i taim bilong “tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, . . . yumi wan wan i mas wok strong moa long strongim bel bilong ol arapela.” (Hibru 10:​23-25) Sapos yumi pas gut na wok wantaim wanpela bilong 98,000 kongrigesen bilong ol Witnes Bilong Jehova, dispela bai helpim yumi long redim yumi yet long abrusim bagarap. Ol wanbilip bai helpim yumi taim yumi wok strong long kamap “nupela manmeri” na givim bel long helpim ol narapela man long kisim save long ol samting Jehova i mekim bilong helpim ol man long abrusim bagarap.​—⁠Efesus 4:​22-24; Kolosi 3:​9, 10; 1 Timoti 4:⁠16.

18. Bilong wanem yu tingting strong long pas gut wantaim kongrigesen Kristen?

¹⁸ Satan na lain nogut bilong em i gat bikpela laik long pulim yumi na yumi lusim kongrigesen Kristen. Tasol yumi inap i stap insait long en na abrusim bagarap i laik painim pasin nogut bilong dispela graun. Gutpela sapos pasin bilong yumi long laikim Jehova na amamas long ol samting em i givim yumi, i kirapim yumi long tingting strong tru long sakim ol samting Satan i mekim bilong pulim yumi. Pasin bilong tingim tingim long bel ol gutpela samting yumi kisim long nau bai strongim dispela tingting. Stadi i kamap bihain long dispela bai skelim sampela bilong ol dispela gutpela samting.

Wanem Bekim Bilong Yu?

• Olsem wanem taim bilong yumi i wankain olsem taim bilong Noa?

• Man i mas i gat wanem pasin bambai em inap abrusim bagarap?

• Wanem ol senis i bin strongim ol samting Jehova i mekim bilong helpim yumi long abrusim bagarap?

• Yumi yet inap mekim wanem bilong abrusim bagarap?

[Askim Bilong Stadi]

[Piksa long pes 22]

Ol manmeri i bin stap long taim bilong Noa i no tingim tok em i autim

[Piksa long pes 23]

Pasin bilong tingim tru tok lukaut bilong God bai karim gutpela kaikai

[Piksa long pes 24]

Skul Bilong Wok Kingdom i bilong mekim wanem?

[Piksa long pes 25]

Nau em taim bilong pas gut wantaim kongrigesen Kristen