“Kisim Ples Hait Long Nem Bilong Jehova”
“Kisim Ples Hait Long Nem Bilong Jehova”
“Ol manmeri bai mi larim ol i stap . . . ol i daunim ol yet. Na bai ol i kam long mi [olsem “kisim ples hait long nem bilong Jehova,” NW ].”—SEF. 3:12.
1, 2. Wanem bikpela win em klostu nau bai kamap?
OLSEM WANEM? I gat wanpela taim we win na ren i kamap na yu mas kisim ples hait aninit long wanpela diwai samting? Ating yu inap hait long win na ren aninit long diwai, tasol sapos em bikpela win na ren, orait diwai i no inap.
2 Tasol i gat narapela kain bikpela win i laik kam—em dispela win inap bagarapim olgeta lain man. Dispela win em “De bilong Bikpela” na em bai mekim sampela samting long olgeta manmeri. Tasol i gat ples hait we yumi inap go long en na stap gut. (Ritim Sefanaia 1:14-18.) Olsem wanem bai yumi inap i go long dispela ples hait long taim bilong dispela ‘De bilong belhat bilong God’ em klostu nau bai kamap?
Ol Bagarap Long Taim Bilong Baibel
3. Wanem kain ‘strongpela win na ren’ i bin painim 10-pela lain bilong Israel?
3 De bilong Jehova bai kirap taim olgeta lotu giaman i bagarap. Bilong save long olsem wanem yumi ken painim ples hait, yumi ken skelim stori bilong ol samting i bin painim lain bilong God long bipo tru. Aisaia, em i bin stap 800 yia samting paslain long Krais, em i tok kot bilong Jehova em bai painim 10-pela lain bilong Israel i bikhet, em i kain olsem ‘strongpela win na ren’ em ol man i no inap pasim. (Ritim Aisaia 28:1, 2.) Truim bilong dispela tok profet i bin kamap long 740 B.C.E. taim lain Asiria i go insait long graun bilong dispela lain.
4. Olsem wanem wanpela “De bilong Bikpela” i bin kamap long Jerusalem long 607 B.C.E.?
4 Long 607 B.C.E., bihain long dispela kot i painim lain Israel, wanpela “De bilong Bikpela” i painim Jerusalem na Juda. Dispela samting i bin kamap, long wanem, ol manmeri bilong Juda ol tu i bin tromoi lotu i tru. Ol Babilon em Nebukatnesar i bosim ol, ol i laik daunim Juda na biktaun bilong en Jerusalem. Ol Juda i askim ol Isip long helpim ol, ol i laik bai ol i kamap olsem ples hait bilong ol. Tasol olsem strongpela win na ren i kamapim bikpela bagarap, Babilon i kam na rausim dispela ‘ples hait’ bilong ol.—Ais. 28:14, 17.
5. Taim olgeta lotu giaman i bagarap, olsem wanem long lain bilong God?
5 De bilong Bikpela i bin painim Jerusalem, em i makim kot bai painim Kristendom, em lain i tromoi bilip i tru long taim bilong yumi. Na tu, ol arapela hap bilong ‘Bikpela Babilon,’ em olgeta lotu giaman, ol bai bagarap. Bihain ol narapela hap bilong dispela graun em Satan i bosim, ol bai bagarap na pinis olgeta. Tasol lain bilong God bai abrusim bagarap, long wanem, ol i go long Jehova olsem ples hait bilong ol.—KTH 7:14; 18:2, 8; 19:19-21.
Ples Hait
6. Olsem wanem lain bilong Jehova inap painim ples hait?
6 Olsem wanem lain bilong God inap painim ples hait nau long dispela taim bilong pinis? Yumi painim ples hait long sait bilong spirit long rot bilong beten na “tingting long [‘nem bilong God,’ NW ]” na givim bel long mekim wok bilong em. (Ritim Malakai 3:16-18.) Tasol yumi no ken tingting long nem bilong God na em tasol, nogat. Baibel i tok: “Olgeta manmeri i singaut long nem bilong Jehova, em bai kisim bek ol.” (Ro. 10:13, NW ) Man i mas singaut long nem bilong Jehova na bai em i ken kisim bek ol. Na planti man i gat gutpela bel inap lukim olsem ol Kristen tru, em ol i mekim wok olsem Witnes bilong God na ‘tingting long nem bilong em,’ ol i stap narapela kain long ol man husat i no mekim wok bilong God.
7, 8. Olsem wanem God i bin kisim bek ol Kristen long taim bilong ol aposel? Na wanem samting i wankain long dispela samting long nau?
7 Tru, God i save lukautim yumi long sait bilong spirit, tasol em i tok promis long lukautim lain bilong em long sait bilong skin tu. Samting i makim dispela em samting i bin kamap long 66 C.E. taim ami bilong Rom, em Sestius Galus i bosim, i kam pait long Jerusalem. Jisas i bin tok profet olsem God bai “sotim taim” bilong dispela bikpela hevi. (Mt. 24:15, 16, 21, 22) Dispela samting i bin kamap taim ol ami bilong Rom i bin lusim dispela taun wantu tasol, na dispela i opim rot long sampela “manmeri,” em ol Kristen tru, i no ken “lus.” Ol i ranawe lusim dispela taun na long ol hap i stap klostu. Sampela i brukim wara Jordan na painim ples hait long ol maunten i stap long hap is bilong dispela wara.
8 Samting i bin kamap long ol dispela Kristen i wankain long samting em bai painim ol manmeri bilong God long nau. Ol Kristen long taim bilong ol aposel i bin kisim ples hait, na ol wokboi bilong God long nau ol tu bai mekim olsem. Tasol ol Kristen tru long nau ol bai i no ranawe i go long wanpela ples tru, long wanem, ol i stap long olgeta hap bilong graun. Tasol lain Kristen, em “ol manmeri [God] i makim pinis” na ol gutpela poroman bilong ol, ol i bin mekim Jehova na oganaisesen bilong em i stap olsem ples hait bilong ol, olsem na ol bai abrusim bagarap taim Kristendom, lain i tromoi bilip i tru, i bagarap.
9. Husat i bin mekim wok bilong haitim nem bilong Jehova? Stori long dispela.
9 I stret Kristendom i bagarap, long wanem, ol i no bin helpim ol manmeri long kisim ol stretpela save bilong God na long ol stiatok bilong em, na tu, ol i no laik tru long yusim nem bilong God. Inap planti handet yia bipo long Yurop, ol manmeri i save long nem bilong God. Dispela nem, em fopela leta Hibru (Tetragramaton) i makim na ol i tanim olsem YHWH (o JHVH), em i stap long sampela koin, poret bilong sampela haus, long planti buk na Baibel, na tu, long sampela haus lotu bilong ol Katolik na ol Talatala. Tasol long nau, ol man i no save putim nem bilong God long ol Baibel ol i tanim na ol i no putim long ol narapela hap tu. Wanpela pas bilong Misin Katolik bilong Jun 29, 2008, i tok ol i mas tanim Tetragramaton olsem “Bikpela.” Vatiken i tok ol Katolik i no ken yusim o kolim nem bilong God long ol singsing na ol beten ol i mekim long taim ol i mekim lotu. Na ol hetman bilong ol narapela lotu insait na ausait long Kristendom ol tu i no bin kamapim klia long planti milion manmeri long husat i God i tru.
God i Lukautim Ol Man i Mekim Holi Nem Bilong Em
10. Olsem wanem ol man i givim ona long nem bilong God long nau?
10 Tasol ol Witnes Bilong Jehova i no save mekim olsem ol arapela lotu i mekim long nem bilong God, nogat. Ol i save givim ona na glori long nem bilong God. Ol i mekim nem bilong em i stap holi. Jehova i amamas long ol man husat i bilip long em, na em i kamap wanem wanem kain em i mas kamap bilong blesim na lukautim lain bilong em. “Em i save kamap olsem ples hait bilong ol manmeri bilong en, na em i helpim ol manmeri i save go long em.”—Nah. 1:7; Ap. 15:14.
11, 12. Namel long ol man Juda bilong bipo, husat i stap gut long nem bilong Jehova, na husat i bin mekim olsem long taim bilong yumi?
11 Maski planti man long Juda bilong bipo i bin tromoi lotu i tru, i gat sampela i bin mekim nem bilong Jehova i stap olsem ples hait bilong ol—ol i bin ‘kam long em na askim em long helpim ol.’ (Ritim Sefanaia 3:12, 13.) Yes, taim God i givim strafe long ol Juda i no bin stap gut long em na larim ol Babilon i kam na daunim ol na kisim ol i go kalabus, sampela, olsem Jeremaia, Baruk, na Ebetmelek, i no lus. Ol i bin “stap long Jerusalem” namel long dispela lain i bin tromoi lotu i tru. Sampela narapela i stap gut long God long taim ol i stap kalabus. Long 539 B.C.E., ol Midia na Persia aninit long Sairus, ol i daunim Babilon. Bihain liklik Sairus i putim wanpela lo i larim ol Juda i go bek long ples.
12 Ol bai stretim bek lotu i tru, na Sefanaia i tok profet olsem Jehova bai lukautim na amamas long ol. (Ritim Sefanaia 3:14-17.) Dispela samting i bin kamap long taim bilong yumi tu. Taim Kingdom Bilong God i kirap mekim wok long heven, Jehova i kisim bek ol Kristen em i bin makim, em ol i stap kalabus long Bikpela Babilon. Na em i save amamas long ol i kam inap long nau.
13. Ol manmeri bilong olgeta lain i no stap kalabus moa long wanem samting?
13 Ol manmeri i tingting long stap laip oltaim long graun, ol tu i bin lusim Bikpela Babilon na ol i no stap kalabus moa long ol bilip giaman. (KTH 18:4) Olsem na Sefanaia 2:3 i gat bikpela truim long taim bilong yumi. “Yupela ol manmeri i no save bikhet na sakim tok bilong Bikpela, yupela i mas i kam long em.” Maski ol i bilong i go long heven o stap oltaim long graun, ol manmeri i no save bikhet na ol i bilong olgeta lain, long nau ol i mekim nem bilong Jehova i stap olsem ples hait bilong ol.
Nem Bilong God i No Olsem Wanpela Paspas Samting
14, 15. (a) Sampela i bin yusim wanem ol samting i kain olsem paspas bilong lukautim ol? (b) Yumi no ken yusim wanem samting olsem paspas bilong lukautim yumi?
14 Sampela Israel i bin ting tempel bai lukautim ol long ol birua wankain olsem man i ting wanpela paspas bai lukautim em. (Jer. 7:1-4) Paslain long dispela, ol Israel i bin tingim Bokis Kontrak bai lukautim ol long pait. (1 Sml. 4:3, 10, 11) Bikpela Konstantin i bin penim hap plang ol soldia bilong em i holim, tupela leta Grik khi na rho, em namba wan na namba tu leta bilong biknem “Krais” long tok Grik, em i ting dispela bai lukautim ol soldia bilong em long pait. Na ol i ting King Gustav Adolph II bilong Swiden husat i bin insait long Pait Bilong 30 Yia, em i bin werim siot ain em piksa bilong en i stap long pes 7. Lukim, nem Iehova i stap long fran bilong dispela siot.
15 Sampela bilong lain bilong Jehova, em ol spirit nogut i bin mekim nogut long ol, ol i bin kisim ples hait long rot bilong singaut strong long nem bilong Jehova. Tasol samting em nem bilong God i stap long en, yumi no ken tingim o yusim dispela samting olsem paspas samting i gat strong bilong lukautim man. Yumi no kisim ples hait long nem bilong Jehova long dispela rot, nogat.
Kisim Ples Hait Long Nau
16. Long sait bilong spirit, olsem wanem yumi inap kisim ples hait long nau?
16 Yumi kisim ples hait long nau namel long ol manmeri bilong God ol i stap gut long sait bilong spirit. (Sng. 91:1) Long rot bilong “wokboi i gat gutpela tingting” na ol elda long kongrigesen, yumi kisim tok lukaut long ol pasin em ol man i kirap bihainim na em inap bagarapim yumi long sait bilong spirit. (Mt. 24:45-47; Ais. 32:1, 2) Planti taim yumi bin kisim tok lukaut long pasin bilong laikim tumas mani kago samting. Tingim olsem wanem ol dispela tok lukaut i bin lukautim yumi long sait bilong spirit. Na tingim hevi inap kamap long man em i save les tasol na ting em i save pinis long olgeta samting. Dispela pasin inap mekim na yumi no mekim moa wok bilong Jehova. Baibel i tok: “Ol manmeri i no gat gutpela tingting, ol i save givim baksait long mi, na dispela pasin bilong ol i save kilim ol yet i dai. Ol man i ting ol i save pinis long olgeta samting, ol i olsem ol longlong man. Dispela tingting bilong ol bai i bagarapim ol yet. Tasol ol manmeri i putim yau gut long tok bilong mi, bai ol i stap gut.” (Snd. 1:32, 33) Taim yumi wok strong long stap klin long pasin bilong yumi, dispela tu i helpim yumi long stap gut long sait bilong spirit.
17, 18. Wanem samting i helpim planti milion manmeri long kisim ples hait long nem bilong Jehova long nau?
17 Na tingim tu ol gutpela tok yumi kisim long lain gutpela wokboi bilong kirapim yumi long bihainim tok bilong Jisas na autim gutnius bilong Kingdom long olgeta hap bilong graun. (Mt. 24:14; 28:19, 20) Sefanaia i kolim wanpela samting bilong helpim ol manmeri long mekim nem bilong God i stap olsem ples hait bilong ol. “Long dispela taim bai mi givim wanpela gutpela tok ples long ol man, bambai olgeta i ken singaut long nem bilong Jehova na wok gut wantaim long mekim wok bilong em.”—Sef. 3:9, NW.
18 Dispela gutpela tokples em wanem samting? Dispela gutpela tokples em stretpela save long God Jehova na ol samting em i tingting pinis long mekim, olsem em i kamapim long Baibel. Taim yu helpim ol narapela long kisim stretpela save long Kingdom Bilong God na tokim ol olsem wanem Kingdom bai mekim holi nem bilong em, i olsem yu mekim dispela tokples. Na tu, yu mekim dispela tokples taim yu tokaut long God i gat rait long i stap King, na taim yu amamas long toktok long ol blesing ol manmeri i stap gut long God bai kisim inap oltaim oltaim. Planti manmeri i wok long mekim dispela tok ples, olsem na lain i “singaut long nem bilong Jehova” na “wok gut wantaim long mekim wok bilong em,” dispela lain i go bikpela moa. Yes, planti manmeri long nau long olgeta hap bilong graun ol i wok long kisim ples hait long Jehova.—Sng. 1:1, 3.
19, 20. Olsem wanem samting Israel i bin bilip long en i no bin helpim ol long i stap gut?
19 Ol manmeri bilong dispela graun ol i gat planti hevi i luk olsem i no gat rot long stretim. Ol i gat bikpela laik long stretim ol hevi bilong ol, olsem na planti i bilip long ol man tasol bilong helpim ol. O ol i bilip olsem ol lain politik inap helpim ol, olsem lain Israel long bipo i bin mekim sampela taim. Ol i bin ting ol kantri i stap klostu long ol inap helpim ol na ol i pasim tok long wok bung wantaim ol. Tasol yu save olsem dispela i no bin helpim Israel. Na long nau tu, wanpela gavman o Yunaitet Nesen i no inap stretim olgeta hevi bilong man. Olsem na i no gat as na man i ken ting gavman o wok bung bilong ol gavman inap stap olsem ples hait, a? Baibel i tok ol i no ples hait tru. I stret yu gat tingting olsem, long wanem, olgeta man husat i bilip long ol gavman samting, ol bai bel hevi tru.—Ritim Aisaia 28:15, 17.
20 I no longtaim na de bilong Jehova bai kamap long graun olsem traipela win ren i save kamap. Ol samting ol man i mekim bai i no inap lukautim ol man; mani na ol hul bilong hait long bom nuklia ol tu i no inap mekim olsem. Aisaia 28:17 i tok: “Bai mi mekim taim nogut i kamap long yupela. Na bai yupela i bagarap olsem ol man i save bagarap long taim bilong bikpela tait, na bai yupela i no gat ples moa bilong i go na hait long en.”
21. Olsem wanem tok bilong yiateks bilong 2011 inap helpim yumi?
21 Long nau na long taim de bilong Jehova i kamap, lain bilong God bai painim ples hait tru long God bilong yumi Jehova. Mining bilong nem bilong Sefanaia em “Jehova i bin haitim,” na i makim husat tru bai lukautim yumi. Olsem na yiateks bilong 2011 i olsem: Nem bilong Jehova em ples hait bilong yumi. (Sef. 3:12) Nau yet yumi mas mekim nem bilong Jehova i stap olsem ples hait bilong yumi, yumi mas bilip tru long em. (Sng. 9:10) Long olgeta de yumi mas tingim dispela promis: “Bikpela [“nem bilong Jehova,” NW ] i olsem wanpela strongpela haus. Ol stretpela man i ken ran i go long en na i stap gut.”—Snd. 18:10.
Yu Inap Tingim?
• Olsem wanem yumi ken mekim nem bilong Jehova i stap olsem ples hait bilong yumi long nau?
• I gat wanem as na yumi no ken bilip long ol gavman samting?
• Bai yumi gat wanem ples hait long bihain?
[Askim Bilong Stadi]
[Rait long pes 6]
Yiateks bilong 2011: Nem bilong Jehova em ples hait bilong yumi.—Sef. 3:12.
[Piksa Kredit Lain long pes 7]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”