Kisim Strong Long Sakim Ol Traim na Daunim Bel Hevi

“Holi Spirit bai i kam i stap long yupela, na yupela bai i kisim strong.”​—⁠AP. 1:⁠8.

1, 2. Jisas i tok promis long givim wanem samting long ol disaipel? I gat wanem as na ol i mas kisim dispela samting?

 JISAS i save olsem long strong bilong ol yet ol disaipel i no inap bihainim olgeta tok em i bin givim long ol. Ol i mas mekim bikpela wok autim tok long olgeta hap, ol i man tasol bilong graun, na ol birua bilong ol i gat strong, olsem na i klia tru olsem ol disaipel i mas kisim strong i winim strong bilong yumi ol man. Olsem na paslain long Jisas i go antap long heven, em i tokim ol disaipel: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”​—⁠Ap. 1:⁠8.

² Dispela promis i stat long kamap tru long Pentikos 33 C.E. taim holi spirit i strongim ol disaipel bilong Jisas Krais long autim tok long olgeta hap bilong Jerusalem. I no gat wanpela samting inap pasim dispela wok. (Ap. 4:20) Long “olgeta de, i go inap long . . . pinis,” ol disaipel bilong Jisas, na yumi tu, i mas i gat dispela wankain strong em God i save givim.​—⁠Mt. 28:⁠20.

3. (a) Olsem wanem holi spirit na strong i narapela narapela? (b) Strong Jehova i givim long yumi inap helpim yumi long mekim wanem?

³ Jisas i tok promis long ol disaipel olsem taim ‘holi spirit i kam i stap long ol, ol bai kisim strong.’ Dispela tok “spirit” na “strong,” tupela i narapela narapela. Spirit bilong God, em strong bilong em i mekim wok na God i salim i go long ol man na ol samting bilong kamapim laik bilong em. Tasol dispela tok “strong” inap makim strong bilong mekim wanpela wok o kamapim wanpela samting, tasol em inap stap nating long man o long wanpela samting inap long taim em i mas mekim wanpela wok. Olsem na holi spirit i kain olsem pawa i sasim bateri na nau bateri i gat strong. Strong Jehova i givim long yumi ol wokboi bilong em long rot bilong holi spirit, em i inapim yumi olgeta wan wan long truim dediket bilong yumi na sakim ol samting i putim hevi long yumi.​—Ritim Maika 3:8; Kolosi 1:​29.

4. Bai yumi skelim wanem samting long dispela stadi, na bilong wanem?

⁴ Strong yumi kisim long holi spirit i kamap ples klia olsem wanem? Holi spirit inap kirapim yumi long mekim wanem? Taim yumi stap gut long mekim wok bilong God, kain kain hevi i painim yumi​—⁠em Satan, dispela graun em i bosim, o sin i stap long yumi, i as bilong en. Em i bikpela samting yumi winim ol dispela hevi bambai yumi inap stap yet olsem wanpela Kristen, autim tok oltaim, na pas gut wantaim Jehova. Orait nau yumi ken skelim olsem wanem holi spirit i helpim yumi long sakim ol traim na karim hevi bilong skin i les na bel hevi.

Kisim Strong Long Sakim Ol Traim

5. Olsem wanem beten inap givim strong long yumi?

⁵ Jisas i lainim ol disaipel long beten olsem: “Yu no ken larim ol traim i kamap long mipela, tasol yu ken kisim bek mipela long ol samting nogut.” (Mt. 6:13) Bai Jehova i no lusim ol gutpela wokboi husat i mekim dispela tok. Narapela taim Jisas i tok, “Papa bilong yupela i stap long heven em bai i amamas long givim Holi Spirit long ol man i askim em.” (Lu. 11:13) Em gutpela tru Jehova i promis long givim yumi dispela strong bilong helpim yumi long mekim  pasin i stret! Tasol dispela i no makim olsem Jehova bai pasim ol traim i laik kamap long yumi, nogat. (1 Ko. 10:13) Tasol taim traim i painim yumi, em taim bilong beten strong moa yet.​—⁠Mt. 26:⁠42.

6. Jisas i kisim we ol tok bilong bekim tok long Satan?

⁶ Taim Satan i traim Jisas, Jisas i kamapim ol tok bilong Baibel. Jisas i tingim Tok Bilong God taim em i bekim tok long Satan. Em i tok: “Buk bilong God i gat tok olsem . . . Buk bilong God i tok moa olsem . . . Satan, yu klia. Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” Pasin bilong laikim Jehova na Tok bilong em, i bin kirapim Jisas long sakim ol samting Satan i yusim bilong pulim em. (Mt. 4:​1-10) Jisas i sakim ol traim, na Satan i lusim em.

7. Olsem wanem Baibel i helpim yumi long sakim ol traim?

⁷ Jisas i kamapim ol tok bilong buk bilong God long sakim Satan, olsem na yumi mas strong moa yet long mekim olsem. Bilong sakim Satan na ol lain bilong em, pastaim yumi mas tingting strong long save gut long ol lo bilong God na bihainim tru. Planti manmeri i bin stadi long Baibel na pilim tru savetingting na stretpela pasin bilong God na dispela i bin kirapim ol long bihainim ol tok na lo bilong Baibel. Tru tumas, “tok bilong God” i wok strong i stap na inap “save gut tru long olgeta tingting na laik bilong bel bilong yumi.” (Hi. 4:12) Man i save ritim na tingim tingim ol tok bilong Baibel, em inap save moa yet long tok tru bilong Jehova. (Dan. 9:13) Olsem na i gutpela long tingim tingim long bel ol tok bilong Baibel i stret long sampela pasin kranki bilong yumi yet.

8. Olsem wanem yumi inap kisim holi spirit?

⁸ Jisas inap sakim ol traim, long wanem, em i save long ol tok bilong buk bilong God, na tu, ‘holi spirit i pulap long em.’ (Lu. 4:⁠1) Bilong kisim kain save na strong olsem Jisas i bin kisim, yumi mas i go klostu long Jehova long rot bilong mekim wok long olgeta samting em i givim bilong helpim yumi long kisim holi spirit. (Jem. 4:​7, 8) Em ol samting olsem stadi bilong yu yet long Baibel, beten, na bung wantaim ol wanbilip. Na tu, planti bratasista i save olsem i gutpela long bisi long mekim ol wok Kristen, dispela i helpim yumi long tingting long ol gutpela samting bilong strongim yumi.

9, 10. (a) Wanem ol traim i save painim planti man long hap bilong yu? (b) Pasin bilong beten na tingim tingim long bel ol samting, olsem wanem dispela inap strongim yu long sakim ol traim maski skin i les?

⁹ Wanem ol samting inap pulim yu na yu gat wok long sakim? I gat sampela taim we yu bin tingting long tok gris wantaim wanpela i no poroman marit bilong yu? Sapos yu no marit, i gat sampela taim we yu bin tingting long prenim wanpela i no wanbilip bilong yu? Sampela taim, taim Kristen i lukim TV o yusim Intenet, wantu wanpela piksa nogut inap kamap na bel bilong em i kirap long lukim. Dispela samting i bin painim yu, na sapos em i bin painim yu, orait yu bin mekim wanem? I gutpela long tingim olsem sapos yu mekim liklik rong, dispela inap mekim na bihain yu bai mekim bikpela rong. (Jem. 1:​14, 15) Tingim, pasin yu mekim inap givim bel hevi long Jehova, kongrigesen, na famili bilong yu. Tasol taim yu bihainim ol stiatok bilong God, bel bilong yu bai i no gat tok. (Ritim Song 119:37; Sindaun 22:⁠3.) Taim ol kain traim olsem i painim yu, yu mas tingting strong long beten askim God long givim strong long yu long sakim ol dispela traim.

¹⁰ I gat narapela samting tu long ol traim bilong Satan em yumi mas tingim. Satan i kam bungim Jisas bihain long Jisas i bin tambu long kaikai inap 40 de long ples drai nating. Ating Satan i ting em i gutpela “taim” long traim pasin bilong Jisas long stap gut long God. (Lu. 4:13) Satan i wok long painim gutpela taim bilong traim yumi tu. Olsem na em i bikpela samting long yumi stap strong long sait bilong spirit. Planti taim Satan i traim yumi taim em i lukim olsem yumi no gat strong. Olsem na taim skin i les o yumi bel hevi, yumi mas wok strong moa yet long beten askim God long  helpim yumi na givim holi spirit long yumi.​—⁠2 Ko. 12:​8-10.

Taim Skin i Les o Yumi Bel Hevi

11, 12. (a) I gat wanem as na bel hevi i daunim planti man long nau? (b) Wanem samting inap strongim yumi long daunim bel hevi?

¹¹ Yumi gat sin, olsem na sampela taim yumi save bel hevi. Dispela tok i stret tru long nau, long wanem, haptaim yumi stap long en i gat planti samting moa yet i givim hevi long yumi. Yumi stap long wanpela haptaim we i gat planti hevi nogut tru, winim bipo. (2 Ti. 3:​1-5) Armagedon i wok long kam klostu, olsem na hevi bilong mani, ol samting i bagarapim bel na tingting, na ol narapela hevi i wok long i go bikpela moa. Olsem na yumi no kirap nogut olsem sampela i pilim hatwok moa long inapim wok bilong ol long tingim na lukautim famili. Ol i pilim taiet, skin i les, na strong i pinis. Sapos dispela tok i stret long yu, yu ken mekim wanem bilong karim ol dispela hevi?

¹² Tingim, Jisas i tokim ol disaipel olsem em bai givim wanpela helpim long ol​—⁠em holi spirit bilong God. (Ritim Jon 14:​16, 17.) Em nambawan bikpela strong long heven na graun. Long rot bilong en, Jehova inap givim strong long yumi inap tru long helpim yumi long winim ol traim na sanap strong. (Ef. 3:20) Aposel Pol i tok, long rot bilong holi spirit bai yumi kisim “bikpela strong” maski ‘ol kain kain hevi i kamap long yumi.’ (2 Ko. 4:​7, 8) Jehova i no tok promis long tekewe ol samting i givim hevi long yumi, tasol em i tok olsem long rot bilong holi spirit bilong em, em bai givim strong long yumi inap long yumi ken karim dispela hevi.​—⁠Fl. 4:⁠13.

13. (a) Olsem wanem wanpela yangpela meri i bin kisim strong long karim wanpela bikpela hevi? (b) Yu save long sampela stori moa olsem?

¹³ Tingim Stephanie, em wanpela painia oltaim i gat 19 krismas. Taim em i gat 12-pela krismas, em i kisim sik strok na ol dokta i tok em i gat buk nogut long kru bilong em. Kirap long dispela taim na i kam, em i bin kisim tupela operesen, kisim rediesen bilong kukim dispela buk, na tupela taim gen em i kisim sik strok na nau sait bilong en long han kais i dai na ai i no inap lukluk gut. Stephanie i mas yusim strong em i gat long mekim ol samting i bikpela samting long em, olsem go long ol miting Kristen na autim tok. Tasol em i save olsem long planti rot Jehova i helpim em long sanap strong. Stori bilong ol wanbilip Kristen i stap long ol buk na nius bilong Baibel i bin helpim em taim bel hevi i daunim em. Ol bratasista i bin strongim em long rot bilong salim ol pas long em o mekim gutpela tok long em paslain  na bihain long ol miting. Na tu, ol man i gat laik long harim tok ol i save go long haus bilong Stephanie bilong kisim skul bilong Baibel, na long dispela rot ol i soim olsem ol i amamas long ol tok em i skulim ol long en. Stephanie i tenkyu tru long Jehova long ol dispela gutpela samting. Song 41:3 em i feiveret skripsa bilong em, na em i pilim olsem dispela skripsa i bin kamap tru long em.

14. Taim hevi i daunim yumi, yumi mas abrusim wanem kain tingting? Bilong wanem i olsem?

¹⁴ Taim skin bilong yumi i les o hevi i daunim yumi, yumi no ken ting olsem yumi mas lusim sampela wok bilong lotu na dispela bai helpim yumi. Dispela em tingting kranki tru. Bilong wanem? Long wanem, ol samting olsem Baibel stadi bilong yumi yet na bilong famili, autim tok, na go long ol miting em ol rot we yumi kisim holi spirit bilong strongim yumi. Ol wok Kristen i save givim nupela strong long yumi. (Ritim Matyu 11:​28, 29.) Planti bratasista i kam long ol miting ol i taiet, tasol taim miting i pinis i olsem ol i kisim strong gen!

15. (a) Olsem wanem? Jehova i tok promis olsem laip bilong Kristen bai i no gat hatwok bilong en? Yusim Baibel na stori long dispela. (b) God i mekim wanem tok promis long yumi? Dispela i kirapim yumi long tingim wanem askim?

¹⁵ Tasol dispela i no makim olsem pasin bilong mekim ol wok Kristen i no gat hatwok bilong en, nogat. Bilong i stap gutpela Kristen yumi mas taitim bun tru. (Mt. 16:​24-26; Lu. 13:24) Tasol long rot bilong holi spirit Jehova inap givim strong long man em skin bilong em i les. Profet Aisaia i tok: “Ol manmeri i bilip long Bikpela na i wetim em i helpim ol, ol bai i stap strong oltaim. Na bai ol i flai olsem ol tarangau. Bai ol i ran na ol i no inap sotwin, na bai ol i wokabaut na ol i no inap les.” (Ais. 40:​29-31) Olsem na i gutpela long askim yumi yet, Wanem as tru na yumi pilim olsem ol wok Kristen i mekim na skin bilong yumi i les?

16. Sapos yumi taiet na bel hevi, yumi ken mekim wanem?

¹⁶ Tok Bilong Jehova i kirapim yumi long “skelim gut wanem ol samting i bikpela samting moa.” (Fl. 1:​10, NW ) Pol i tok wok bilong stap olsem wanpela Kristen i kain olsem man i ran long wanpela longpela resis. Holi spirit i kirapim em long tok: “Yumi mas lusim olgeta kain samting i mekim yumi i no inap ran strong . . . Yumi mas strongim bel na ran strong long dispela resis God i bin makim bilong yumi ran long en.” (Hi. 12:⁠1) Tok bilong Pol i makim olsem yumi mas abrusim olgeta kain wok i no bikpela samting na i save pinisim nating strong bilong yumi. Ating sampela bilong yumi i gat planti wok pinis na ol i traim long mekim sampela wok moa. Olsem na sapos planti taim yu pilim taiet na ol hevi i daunim yu, ating i gutpela long yu skelim strong yu lusim long mekim wok mani, hamas taim yu save raun long sampela hap bilong kisim amamas, na pasin bilong yu long givim bel long pilai spot o sampela arapela amamas. Stretpela tingting na pasin daun i mas kirapim yumi long luksave long ol samting yumi no inap mekim, na lusim ol wok i no bikpela samting.

17. Ating i gat wanem as na sampela i bel hevi? Tasol Jehova i mekim wanem tok promis long dispela samting?

¹⁷ Ating sampela bilong yumi i bel hevi, long wanem, pinis bilong pasin nogut bilong nau i no kamap kwik olsem yumi bin tingim. (Snd. 13:12) Man husat i pilim olsem, em i ken kisim strong long tok i stap long Habakuk 2:​3, em i tok: “Taim bilong ol dispela samting i mas kamap, em i no yet. Olsem na yu mas raitim dispela tok na putim i stap. Tasol i no longtaim na  dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” Jehova i tok promis olsem pinis bilong ol pasin nogut bilong nau bai kam stret long taim em i bin makim!

18. (a) Wanem ol tok promis i save strongim yu? (b) Stadi i kamap bihain bai helpim yumi olsem wanem?

¹⁸ Tru tumas, olgeta gutpela wokman bilong Jehova i wetim dispela taim we pasin bilong skin i les na bel hevi bai no stap moa, taim olgeta bai kamap “yangpela” gen. (Jop 33:25) Tasol long nau yet, taim yumi insait long ol wok lotu, holi spirit inap mekim bel bilong yumi i stap strong. (2 Ko. 4:16; Ef. 3:16) No ken larim pasin bilong skin i les i pasim yumi long kisim ol blesing bilong stap oltaim oltaim. Olgeta traim​—⁠maski em i kam long rot bilong samting i pulim yumi, skin i les, o bel hevi​—⁠olgeta bai pinis. Sapos ol i no pinis long nau, orait long nupela taim God bai kamapim, ol bai pinis. Long stadi i kamap bihain bai yumi skelim olsem wanem holi spirit i strongim ol Kristen long sanap strong taim ol man i birua, na long sakim ol wanlain i pulim ol, na long karim ol narapela hevi.

Bai Yu Bekim Olsem Wanem?

• Olsem wanem pasin bilong ritim Baibel i strongim yumi?

• Olsem wanem pasin bilong beten na tingim tingim ol samting long bel i strongim yumi?

• Yumi ken mekim wanem bilong daunim bel hevi?

[Askim Bilong Stadi]

[Piksa long pes 24]

Ol miting Kristen inap strongim yumi