Kisim Strong Long Winim Kain Kain Hevi

“[Em] i save strongim mi, na long strong bilong em mi inap mekim olgeta samting.”​—⁠FL. 4:⁠13.

1. I gat wanem as na kain kain hevi i save painim ol manmeri bilong Jehova?

 KAIN kain hevi i bin painim ol manmeri bilong Jehova. As bilong sampela hevi em ol pasin kranki bilong yumi yet o pasin bilong dispela graun yumi stap long en. Na tu, i gat pasin birua i stap namel long ol man i lotuim God na ol man i no lotuim God. (Stt. 3:15) Kirap long bipo yet, God i bin helpim ol gutpela wokboi bilong em long sanap strong taim ol man i birua long ol, na long sakim ol wanlain i laik pulim ol, na long sanap strong na karim ol kain kain hevi. Holi spirit inap givim strong long yumi tu long mekim olsem.

Taim Ol Man i Birua

2. I gat wanem as na ol man i birua long lotu? Dispela pasin birua inap kamap long wanem ol rot?

² Pasin bilong birua long lotu, em pasin we ol man i putim hevi o mekim nogut long ol narapela, long wanem, ol i no laikim ol bilip bilong ol. Ol i mekim olsem bilong pinisim ol dispela bilip, pasim dispela bilip long i go bikpela, o mekim ol manmeri i lusim dispela bilip. Pasin birua i save kam long kain kain rot​—⁠sampela taim pasin birua i stap ples klia na sampela taim i hatwok long luksave long en. Baibel i tok pasin birua bilong Satan i kain olsem pasin bilong wanpela yangpela laion na snek nogut.​—⁠Ritim Song 91:⁠13.

3. Satan i mekim wanem kain pasin birua i olsem bilong laion? Na wanem kain pasin birua i olsem bilong snek?

³ Olsem wanpela laion nogut, planti taim Satan i bin pait long yumi long ples klia, olsem em i kirapim ol man long paitim yumi, kalabusim yumi, o putim tambu long wok bilong yumi. (Sng. 94:20) Long ol Yearbook i stori long ol Witnes Bilong Jehova long nau, i gat planti stori i kamapim ol dispela kain pasin Satan  i save mekim. Na i gat ol bikhetlain em sampela taim ol pris pasto o lain politik i go pas long ol, na ol i bin mekim nogut long ol manmeri bilong God long planti hap. Dispela kain pasin birua, olsem laion i save mekim, i bin mekim na sampela i pundaun. Na tu, olsem snek nogut, Satan i mekim nogut long ol man long rot i no stap ples klia, em i mekim olsem bilong paulim tingting bilong ol na giamanim ol long bihainim laik bilong em. Em i mekim kain pasin olsem bilong daunim o bagarapim bilip bilong yumi. Tasol long rot bilong holi spirit bilong God, yumi inap sanap strong taim yumi bungim ol dispela kain pasin birua.

4, 5. Wanem gutpela rot bilong redi long taim pasin birua i kamap? Bilong wanem i olsem? Stori long wanpela eksampel.

⁴ I no gutpela long tingim tingim wanem kain pasin birua bai kamap, dispela i no gutpela rot bilong redi long dispela samting. Yumi no inap long save wanem samting bai kamap long bihain, olsem na nogut yumi wari nating long samting, ating i no inap kamap. Tasol i gat sampela samting yumi inap mekim. Planti man husat i bin sanap strong taim ol man i bin birua long ol, ol i bin tingim tingim long bel gutpela piksa bilong ol man i bin holimpas bilip em Baibel i stori long ol. Na tu, ol i bin tingim ol tok na gutpela piksa bilong Jisas. Dispela i strongim pasin bilong ol long laikim tru Jehova. Na dispela pasin laikim i bin helpim ol long sakim olgeta traim i bin painim ol.

⁵ Tingim stori bilong tupela sista bilong Malawi. Ol bikhetlain i bin paitim ol na rausim klos bilong ol na tok long reipim ol sapos ol i no baim kat politik. Dispela lain i giaman na tok olsem sampela bilong famili Betel i baim pinis dispela kat. Ol sista i tok wanem? Ol i tok: “Mipela i mekim wok bilong God Jehova tasol. Olsem na sapos ol brata long brens ofis i bin baim dispela kat, em samting bilong ol. Mipela yet i no inap lusim bilip bilong mipela, maski sapos yupela kilim mipela i dai!” Taim tupela sista i strongim bel na mekim dispela tok, ol dispela bikhetlain i lusim ol i go.

6, 7. Olsem wanem Jehova i strongim ol wokboi bilong em taim ol man i birua long ol?

⁶ Aposel Pol i lukim olsem taim ol Kristen long Tesalonaika i kisim tok bilong God, ‘planti hevi i kamap long ol,’ tasol ‘holi spirit i kirapim ol na ol i amamas.’ (1 Te. 1:⁠6) Tru tumas, planti Kristen long bipo na long nau, em pasin birua i bin painim ol na ol i winim dispela hevi, ol i tok olsem taim hevi i go bikpela tru, ol i pilim olsem bel bilong ol i stap isi, em wanpela pasin holi spirit i save kamapim. (Ga. 5:22) Na dispela bel isi i bin lukautim bel na tingting bilong ol. Yes, Jehova i save yusim holi spirit bilong em long givim strong long ol wokboi bilong em long karim ol hevi na bihainim savetingting taim hevi i kamap. a

⁷ Ol manmeri i bin kirap nogut long ol manmeri bilong God i strong long holimpas bilip bilong ol, maski ol man i birua nogut tru long ol. I olsem ol Witnes i gat narapela kain strong, na tru tumas, ol i gat. Aposel Pita i tok: “Yupela i holim nem bilong Krais, na sapos long dispela ol i tok nogut long yupela, orait yupela i ken amamas. Long wanem, yupela i save, Spirit bilong God, em Spirit i gat biknem na strong, em i stap long yupela.” (1 Pi. 4:14) Sapos ol man i birua long yumi, long wanem, yumi bihainim stretpela pasin, dispela i soim olsem God i orait long yumi. (Mt. 5:​10-12; Jo. 15:20) Na taim yumi lukim olsem Jehova i blesim yumi, dispela i givim bikpela amamas long yumi!

Taim Ol Wanlain i Laik Pulim Yumi

8. (a) Wanem samting i bin helpim Josua na Kalep long sakim ol wanlain i laik pulim ol? (b) Yumi kisim wanem skul long pasin bilong Josua na Kalep?

⁸ Wanpela pasin birua i painim ol Kristen na i no stap ples klia, em pasin bilong ol wanlain i pulim ol. Tasol spirit bilong Jehova i strong moa, winim spirit bilong dispela graun, olsem na yumi inap sakim ol man i tok bilas long yumi, sutim tok giaman long yumi, o traim long subim yumi long bihainim tingting na  pasin bilong ol. Wanem samting i bin helpim Josua na Kalep long sakim tingting bilong ol narapela 10-pela man bilong lukstil i bin go insait long graun bilong Kenan? Holi spirit i bin kirapim tupela long kisim ‘narapela tingting.’​—Ritim Namba 13:30; 14:​6-​10, 24.

9. I gat wanem as na ol Kristen i mas i stap narapela kain long ol narapela?

⁹ Na tu, holi spirit i bin strongim ol aposel bilong Jisas long bihainim tok bilong God na ol i no bihainim tok bilong ol man em planti manmeri i litimapim nem bilong ol olsem tisa bilong lotu i tru. (Ap. 4:​21, 31; 5:​29, 32) Klostu olgeta manmeri i no laik stap narapela kain, ol i laik mekim ol samting em ol narapela i save mekim na bai kros i no ken kamap. Tasol ol Kristen tru i mas strong long bihainim ol pasin em ol i save i stret long mekim. Strong ol i kisim long holi spirit i mekim na ol i no pret long stap narapela kain. (2 Ti. 1:⁠7) Tingim wanpela samting inap kamap we yumi no ken larim ol wanlain i pulim yumi.

10. Wanem wanpela hevi inap painim sampela Kristen?

¹⁰ Sampela yangpela i tingting planti taim ol i harim olsem wanpela pren bilong ol i bin insait long pasin nogut. Ating ol i pilim olsem sapos ol i askim ol elda long helpim pren bilong ol, pren bilong ol bai i no inap trastim ol moa. Ol i no gat stretpela tingting long dispela pasin bilong stap gut long pren, olsem na ol i no laik tokaut long samting pren i mekim. Na ating pren i strong long poroman bilong em i haitim rong bilong em. Tasol dispela kain hevi i no painim ol yangpela tasol, nogat. Sampela man i bikpela pinis ol tu i hatwok long go tokim ol elda bilong kongrigesen long wanpela rong em wanpela pren o wanblut i mekim. Orait, ol Kristen tru i mas mekim wanem taim kain samting olsem i kamap?

11, 12. I gutpela yu mekim wanem sapos wanpela bilong kongrigesen i tok yu no ken kamapim rong bilong em? Bilong wanem i gutpela long mekim olsem?

¹¹ Tingim dispela samting. Alex, wanpela yangpela brata, i kisim save olsem Steve, wanpela pren bilong em insait long kongrigesen, i save lukim ponografi. Alex i tokim Steve olsem em i wari long samting Steve i mekim. Tasol Steve i no laik harim. Taim Alex i strong long Steve i go tokim ol elda long dispela samting, Steve i tok olsem sapos tupela i pren tru, orait Alex i no ken tokim ol elda. Yu ting Alex i mas pret, nogut Steve bai i no stap pren bilong em moa? O ating Alex i tingting olsem, sapos em i go lukim ol elda na Steve i tok em i no bin mekim dispela pasin, orait ol elda bai bilipim tok bilong husat? Tasol sapos Alex i pasim maus, dispela i no inap kamapim gutpela samting. Dispela inap mekim na Steve i no pas gut moa wantaim Jehova. I gutpela sapos Alex i tingim dispela tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.” (Snd. 29:25) Alex inap mekim wanem narapela samting? Ating long gutpela pasin em i ken go gen long Steve na toktok wantaim em long dispela hevi. Em i mas strongim bel long  mekim olsem. Ating nau Steve bai amamas long toktok long hevi bilong em. Alex i mas kirapim gen Steve long go toktok wantaim ol elda, na tokim em olsem sapos em i no hariap liklik long mekim, orait Alex yet bai toktok wantaim ol.​—⁠Wkp. 5:⁠1.

¹² Sapos kain samting olsem i painim yu, ating pastaim pren bilong yu i no amamas long yu laik helpim em. Tasol bihain ating em bai luksave olsem yu mekim dispela samting bilong helpim em. Sapos man i mekim rong i amamas long kisim helpim, ating olgeta taim bihain em bai tingim pasin bilong yu, olsem yu bin strongim bel na i no pret na yu bin stap gut long em. Tasol sapos em i kros yet long yu, yu laik bai dispela kain man i stap pren bilong yu? Pasin bilong amamasim nambawan gutpela Pren bilong yumi, em Jehova, dispela pasin i stret long mekim long olgeta taim. Taim yumi putim Jehova i go pas, ol narapela husat i laikim tru em ol bai rispek long yumi bin stap gut long Jehova na ol bai kamap pren tru bilong yumi. Yumi no ken opim dua long Satan i kam insait long kongrigesen Kristen. Sapos yumi mekim olsem, bai yumi givim bel hevi long holi spirit bilong Jehova. Tasol taim yumi wok long helpim kongrigesen long i stap klin, yumi mekim pasin i stret wantaim wok bilong holi spirit.​—⁠Ef. 4:​27, 30.

Long Karim Kain Kain Hevi

13. Wanem kain hevi i save painim ol manmeri bilong Jehova? Bilong wanem i gat planti kain hevi olsem?

¹³ Kain kain hevi inap kamap​—⁠olsem hevi bilong mani, pinisim yumi long wok skin, ol bagarap olsem guria o sunami samting, wanpela long famili i dai, na bikpela sik samting. Yumi stap long taim bilong “planti hevi nogut tru,” olsem na yumi ken save olsem yumi olgeta bai kisim sampela kain hevi. (2 Ti. 3:⁠1) Taim hevi i kamap, no ken pret na tingting planti. Holi spirit inap givim strong long yumi na yumi inap karim kain kain hevi.

14. Wanem samting i strongim Jop long karim ol hevi bilong em?

¹⁴ Planti hevi i bin painim Jop. Olgeta animal samting bilong em i dai, ol pikinini i dai, ol pren i lusim em, em i kisim bikpela sik, na meri bilong em i no bilip strong moa long Jehova. (Jop 1:​13-19; 2:​7-9) Tasol i gat wanpela man i mekim gut bel bilong Jop, em Elihu. Tok bilong Elihu, wantaim tok Jehova i givim long Jop, i olsem: “Jop, yu mas stap isi na putim yau gut na kisim tingting long ol kain kain strongpela wok God i save mekim.” (Jop 37:14) Wanem samting i helpim Jop long karim ol hevi bilong em? Na wanem samting inap helpim yumi long karim ol hevi bilong yumi? Yumi mas tingim tingim long bel ol samting i kamapim klia strong bilong Jehova na wok bilong holi spirit bilong em. (Jop 38:​1-41; 42:​1, 2) Ating yumi wan wan i ken tingim wanpela taim long laip bilong yumi yet we ol samting i bin kamap i soim olsem God i tingim yumi. Na em i tingim yet yumi wan wan.

15. Wanem samting i strongim Pol long karim ol hevi?

¹⁵ Bilip bilong aposel Pol i as na em i bin karim planti hevi na klostu em i dai. (2 Ko. 11:​23-28) Olsem wanem tingting na bel bilong em i stap stret taim ol dispela hevi i painim em? Em i beten na bilip long Jehova i helpim em. Taim ol hevi i painim em paslain long ol i kilim em i  dai, Pol i tok: “Bikpela yet i bin sambai long mi na givim strong long mi. Olsem na mi autim gutnius inap tru, na olgeta lain haiden i harim. Na God i bin kisim bek mi long maus bilong laion.” (2 Ti. 4:17) Olsem na long rot bilong ol samting i painim em yet, Pol inap strongim ol wanbilip olsem ol i no ken “wari long wanpela samting.”​—⁠Ritim Filipai 4:​6, 7, 13.

16, 17. Stori long olsem wanem Jehova i strongim lain bilong em long karim ol hevi i painim ol long nau.

¹⁶ Wanpela painia, em Roxana, em i luksave olsem Jehova i save lukautim ol manmeri i lotu long em. Taim em i bin askim bosman bilong em long larim em long kisim malolo na go long kibung, bos i kros na tok long pinisim em long wok sapos em i go long kibung. Tasol Roxana i go long kibung, na em i beten strong olsem bos i no ken pinisim em long wok. Bihain long dispela em i pilim bel isi. Na olsem bos i bin tok, long de bihain long kibung, em Mande, em i pinisim Roxana long wok. Roxana i tingting planti. Maski em i no kisim bikpela pe long dispela wok, em i nidim dispela wok, long wanem, em i mas lukautim famili bilong em. Na em i beten gen, na em i tingim olsem Jehova i bin lukautim em long ol samting bilong spirit long kibung, olsem na Em bai lukautim em tu long samting bilong skin. Taim Roxana i wokabaut i go long haus em i lukim wanpela sain bilong wanpela kampani, ol i laikim wokman husat i gat save long yusim ol masin bilong faktori bilong samapim ol samting, na em i putim aplikesen bilong kisim wok. Maneja i luksave olsem Roxana i no gat save long mekim dispela wok, tasol em i givim dispela wok long em, na pe em i kisim i antap, klostu dabol long pe em i bin kisim long bipo. Roxana i pilim olsem Jehova i harim beten bilong em. Tasol bikpela blesing tru em i bin kisim i olsem, em inap long autim gutnius long sampela wanwok bilong em. Na faivpela bilong ol, na maneja i wanpela bilong ol, ol i kisim tok i tru na bihain ol i baptais.

¹⁷ Sampela taim, i luk olsem Jehova i no harim beten bilong yumi​—⁠ating em i no mekim samting hariap o em i no mekim samting yumi ting em bai mekim. Sapos olsem, i mas i gat as na em i mekim olsem. Yumi no save long dispela as, tasol Jehova i save​—⁠na ating bihain yumi inap kliagut. Tasol yumi ken save gut olsem, God i no inap lusim ol manmeri i stap gut long em.​—⁠Hi. 6:⁠10.

Winim Ol Hevi na Traim

18, 19. (a) I gat wanem as na yumi ken save olsem ol hevi na traim bai painim yumi? (b) Wanem samting inap helpim yumi long winim ol hevi?

¹⁸ Lain bilong Jehova i no kirap nogut long taim ol traim i painim ol, o sampela taim ol i bel hevi, o ol man i birua long ol, o ol wanlain i pulim ol. Ol manmeri bilong graun i save birua long yumi. (Jo. 15:​17-19) Tasol holi spirit inap strongim yumi long karim olgeta kain hevi i painim yumi taim yumi mekim wok bilong God. Jehova i no inap larim wanpela traim i kamap i winim strong bilong yumi. (1 Ko. 10:13) Em i no inap tru long lusim yumi o larim yumi i stap nating. (Hi. 13:⁠5) Pasin bilong bihainim Tok bilong em i save lukautim na strongim yumi. Na tu, spirit bilong God inap kirapim ol wanbilip long helpim yumi taim yumi mas kisim helpim.

¹⁹ Yumi olgeta i mas wok yet long kisim holi spirit long rot bilong beten na stadi long Baibel. Yumi laik bai ‘God i ken givim olgeta kain strong long yumi, bai yumi inap sanap strong na karim olgeta hevi, na bai yumi i stap isi na wetim taim ol hevi i pinis. Na bai yumi i amamas.’​—⁠Kl. 1:⁠11.

[Futnot]

Bai Yu Bekim Olsem Wanem?

• Yumi ken mekim wanem bilong redi long taim pasin birua i kamap?

• Yu mas mekim wanem sapos wanpela i tokim yu long no ken kamapim rong bilong em?

• Maski wanem kain hevi i painim yumi, yumi ken bilip tru long wanem samting?

[Askim Bilong Stadi]

[Piksa long pes 28]

Yumi kisim wanem skul long Josua na Kalep?

[Piksa long pes 29]

Olsem wanem yu ken helpim pren husat i mekim rong?