Lukim Nem i Stap Long Ples Daun

ST. MORITZ. Ating yu bin harim dispela nem? Ating yu bin harim, long wanem, em wanpela ples malolo i gat nem na i stap long wanpela ples daun bilong Swiselan, em Engadine Valley. St. Moritz em wanpela ples i save pulim ol man long kam long dispela ples daun i stap namel long ol maunten Alps long hap saut-is bilong Swiselan klostu long boda bilong Itali. Na tu, long dispela ples daun, Swis Nesenel Pak i stap, we i gat ol diwai na kain kain plaua na animal na ol dispela samting i litimapim nem bilong Bikpela Man Bilong Wokim olgeta samting, em Jehova. (Sng. 148:​7-10) Na wanpela pasin tumbuna bilong dispela ples, em ol i kirap mekim long yia 1600 samting, dispela pasin tu i save i litimapim nem bilong Jehova.

Wanpela narapela kain samting i stap long planti haus long dispela ples daun bai pulim ai bilong yu. Yu inap lukim nem bilong God ol i raitim long fran bilong planti haus, olsem long hap  antap long ol bikpela dua. Bipo em pasin bilong ol long bilasim ausait bilong ol haus long ol rait, ol i penim, o raitim long simen, o katim long ol ston. Long hia yu lukim piksa bilong wanpela haus long liklik taun Bever. Dispela tok ol i raitim em olsem: “Ol i wokim haus long 1715. Jehova em i kirap bilong ol samting, na Jehova em i pinis bilong ol samting. Long strong bilong God ol man inap mekim olgeta samting, na man i no inap mekim wanpela samting sapos God i no helpim em.” Dispela olpela rait i yusim nem bilong God 2-pela taim.

Long liklik taun Madulain, yu inap lukim wanpela rait i olpela moa. Dispela rait i tok: “Song 127. Sapos Jehova i no wokim haus, ol kamda i wok hat nating. Lucius Rumedius. Ol i wokim haus long yia 1654.”

Bilong wanem ol i raitim nem bilong God long planti haus long dispela ples daun? Taim lotu Talatala i kamap, ol i wokim Baibel long tokples Romans, em wanpela tokples i kam long tok Latin na ol i save mekim long Engadine. Baibel em namba wan buk ol i tanim long dispela tokples. Tok ol i bin ritim long Baibel i kirapim planti asples long raitim ol tok long ausait bilong ol haus bilong ol, olsem na ol i no raitim tasol nem bilong ol yet, nogat, ol i raitim tu sampela tok bilong Baibel em nem bilong God i insait long en.

I kam inap long nau, ol dispela rait i tokaut long nem bilong Jehova na i givim biknem long em, em planti handet yia bihain long namba wan taim ol i bin raitim long ol haus. Ol visita na ol asples bilong dispela ples daun ol inap kisim sampela save moa long dispela gutpela God Jehova taim ol i go long narapela haus em nem bilong God i stap long en​—⁠em Haus Kingdom bilong ol Witnes Bilong Jehova long liklik taun Bever.

[Piksa Kredit Lain long pes 7]

© Stähli Rolf A/age fotostock