Rispektim Marit​—⁠Presen God i Givim

“Olsem na dispela pasin i kamap. Man i save lusim papamama na i pas wantaim meri bilong en, na tupela i kamap wanpela bodi tasol.”​—⁠Stt. 2:⁠24.

1. I gat wanem as na i stret yumi rispek long Jehova?

 GOD JEHOVA, em Man i kamapim marit, na i stret yumi rispek long em. Em Man Bilong Wokim yumi, King, na Papa long heven, olsem na i stret Baibel i kolim em olsem Man bilong givim “olgeta presen i gutpela tru.” (Jem. 1:17; KTH 4:11) Dispela i kamapim ples klia bikpela pasin laikim bilong em. (1 Jo. 4:⁠8) Olgeta samting em i bin skulim yumi long en, olgeta samting em i askim yumi long mekim, na olgeta samting em i bin givim long yumi, ol dispela samting i bilong helpim yumi na yumi stap gut.​—⁠Ais. 48:⁠17.

2. Jehova i givim wanem tok long tupela namba wan marit?

² Baibel i tok marit i wanpela bilong ol dispela “gutpela” presen i kam long God. (Rut 1:9; 2:12) Taim Jehova i wokim namba wan marit, em i tokim tupela marit, Adam na Iv, long ol samting ol i mas mekim na bai ol i ken stap gut. (Ritim Matyu 19:​4-6.) Sapos ol i bin bihainim tok bilong God, bai ol i stap amamas oltaim oltaim. Tasol ol i sakim tok bilong God na bikpela hevi i painim ol.​—⁠Stt. 3:​6-13, 16-19, 23.

3, 4. (a) Planti manmeri long nau i mekim wanem samting i soim olsem ol i no rispek long marit na long God Jehova? (b) Long dispela stadi bai yumi skelim wanem samting?

³ Olsem dispela tupela namba wan marit, planti man long nau i no tingim ol tok bilong Jehova taim ol i wokim ol disisen insait long marit bilong ol. Sampela i sindaun nating wantaim na ol i no laik marit, na sampela i laik senisim ol lo bilong marit bambai ol i ken inapim ol laik bilong ol. (Ro. 1:​24-32; 2 Ti. 3:​1-5) Ol i no laik tingim marit i olsem presen God i givim, na taim ol i mekim pasin i kamapim olsem ol i no rispektim dispela presen, dispela i soim olsem ol i no rispektim Man i givim dispela presen, em God Jehova.

⁴ Na sampela taim lain bilong God tu ol i no tingim moa tingting bilong Jehova long marit. Sampela marit Kristen ol i lusim poroman marit bilong ol, o ol i katim marit bilong ol, maski i no gat as bilong katim marit olsem Baibel i makim. Tupela marit i mas mekim wanem na bai i no gat dispela hevi? Olsem wanem tok bilong God long Stat 2:​24 inap helpim ol marit Kristen long strongim marit bilong ol? Na olsem wanem ol Kristen husat i tingting long marit ol i ken redi long ol samting bilong marit? Nau bai yumi skelim 3-pela marit i bin i stap gut long taim bilong ol man i bin raitim Baibel, na i soim olsem pasin bilong rispek long Jehova i bikpela samting bilong marit i ken stap longpela taim.

Kisim Pasin Bilong Stap Gut Long Poroman

5, 6. Wanem samting inap traim pasin bilong Sekaraia na Elisabet long stap gut long narapela narapela? God i givim wanem gutpela pe long tupela?

⁵ Sekaraia na Elisabet i bin mekim ol samting i stret long mekim. Tupela i bin makim poroman husat i laikim tru Jehova. Sekaraia i save mekim gut wok bilong em olsem pris, na tupela wantaim i save bihainim gut Lo bilong God. I gat planti samting ol inap tenkyu long en. Tasol sapos yu bin go long haus bilong ol long Juda, bai yu luksave olsem i gat wanpela samting i no stap. Ol i no gat pikinini. Elisabet i no inap karim pikinini, na tupela i lapun pinis.​—⁠Lu. 1:​5-7.

⁶ Long Israel bilong bipo, i bikpela samting long ol meri i mas karim pikinini, na planti meri i gat planti pikinini. (1 Sml. 1:​2, 6, 10; Sng.  128:​3, 4) Long dispela taim bipo, sampela man Israel i save katim marit sapos meri i no inap karim pikinini. Tasol Sekaraia i stap gut long Elisabet. Em i no painim rot bilong lusim meri bilong em, na meri tu i no mekim olsem. Maski ol i bel hevi long ol i no gat pikinini, tupela i mekim yet wok bilong Jehova wantaim. Bihain, Jehova i givim gutpela pe long tupela, em i wokim mirakel na meri i karim pikinini man maski tupela i lapun pinis.​—⁠Lu. 1:​8-14.

7. Elisabet i stap gut long man bilong em long wanem narapela rot?

⁷ Elisabet i stap gut long man bilong em long narapela rot tu. Taim pikinini bilong em Jon i bon, maus bilong Sekaraia i pas na em i no inap toktok, long wanem, em i no bin bilipim tok bilong ensel bilong God. Tasol long sampela rot Sekaraia i tokim meri bilong em olsem ensel bilong Jehova i bin tok ol i mas kolim nem bilong pikinini, “Jon.” Ol wanples na ol wanlain i laik givim nem bilong papa long pikinini. Tasol Elisabet i bihainim tok bilong man bilong em na long dispela pasin em i stap gut long em. Elisabet i tok: “Nogat. Yumi mas kolim nem bilong en Jon.”​—⁠Lu. 1:​59-63.

8, 9. (a) Olsem wanem pasin bilong stap gut long poroman inap strongim marit? (b) Wanem sampela rot we man na meri marit i ken soim pasin bilong stap gut long narapela?

⁸ Olsem Sekaraia na Elisabet, ol marit long nau tu i gat sampela hatwok na bel hevi. Sapos pasin bilong stap gut long narapela i no stap insait long marit, marit i no inap wok gut. Pasin bilong tok gris, ponografi, adaltri, na kain pasin olsem inap mekim na narapela i no trastim moa narapela. Na taim narapela i no trastim narapela, pasin laikim tu i wok long dai. Pasin bilong stap gut long narapela i kain olsem wanpela banis i lukautim famili na bai ol samting bilong bagarapim marit i no ken kam insait. Olsem na taim narapela i stap gut long narapela, ol i no wari olsem wanpela samting bai bagarapim marit bilong ol, na tu, narapela inap kamapim bel na tingting bilong em long narapela, na pasin laikim bilong ol bai go bikpela. Tru tumas, pasin bilong stap gut long narapela em i bikpela samting tru.

⁹ Jehova i tokim Adam: “Man i save lusim papamama na i pas wantaim meri bilong en.” (Stt. 2:24) Wanem mining bilong dispela? Tupela marit i mas senisim sampela pasin bilong ol long pas wantaim ol pren na ol wanblut bilong ol. Narapela i mas i gat taim long stap wantaim poroman na tingim em pastaim. Tupela i mas tingim marit bilong ol pastaim, na famili na ol pren bilong ol i mas i stap nambatu. Na taim tupela i gat sampela disisen long mekim o sampela hevi, tupela i no ken larim papamama i bosim ol. Tupela marit i mas pas wantaim. Dispela em laik bilong God.

10. Wanem samting bai helpim ol marit long kisim pasin bilong stap gut long narapela?

¹⁰ Maski tupela marit i no wanlotu, pasin bilong stap gut long poroman i save kamapim gutpela samting. Wanpela sista em man bilong em i no Witnes, i tok: “Mi tenkyu tru long Jehova i bin skulim mi long stap daun long man bilong mi na rispek tru long em. Pasin bilong stap gut long poroman i bin strongim pasin laikim na rispek inap 47 yia.” (1 Ko. 7:​10, 11; 1 Pi. 3:​1, 2) Olsem na wok long helpim poroman bilong yu long pilim olsem bai yu no lusim em. Long ol tok na pasin bilong yu, painim ol rot bilong helpim poroman long save gut olsem em i nambawan bikpela samting long yu. Mekim olgeta samting yu inap mekim bambai wanpela man o wanpela samting i no ken kam namel long yu na poroman bilong yu. (Ritim Sindaun 5:​15-​20.) Ron na Jeannette, ol i bin marit inap 35 yia na ol i stap amamas, ol i tok: “Mipela i save mekim olgeta samting God i laik bai mipela i mekim, olsem na marit bilong mipela i stap gut na mipela i stap amamas.”

Pasin Wanbel i Strongim Marit

11, 12. Olsem wanem Akwila na Prisila i bin wok wantaim long mekim ol wok long (a) haus, (b) wok mani, na (c) ol wok Kristen?

¹¹ Taim aposel Pol i stori long tupela gutpela pren bilong em, Akwila na Prisila, em i save kolim nem bilong tupela wantaim. Pasin bilong tupela i stap gutpela piksa long samting God i bin tingting long en taim em i tok man na meri  i mas kamap “wanpela bodi.” (Stt. 2:24) Tupela i save wok wantaim long mekim ol wok long haus, wok mani, na mekim ol wok Kristen. Olsem: Namba wan taim Pol i kam long Korin, Akwila na Prisila i singautim em long kam stap long haus bilong ol, em haus Pol i save stap long en inap sampela taim, taim em i raun mekim wok bilong em. Bihain, long Efesus, haus bilong ol i stap olsem ples bilong mekim ol miting bilong kongrigesen na tupela i wok wantaim long helpim ol nupela man, olsem Apolos, long kamap strong. (Ap. 18:​2, 18-26) Taim tupela i go stap long Rom, long dispela hap tu haus bilong ol i kamap ples bilong mekim ol miting bilong kongrigesen. Bihain, ol i go bek long Efesus, na strongim ol brata.​—⁠Ro. 16:​3-5.

¹² Inap sampela taim, Akwila na Prisila i wok wantaim Pol long wokim ol haus sel, em wanpela wok mani 3-pela wantaim i save mekim. Long dispela wok tu, tupela marit i wok gut wantaim na ol i no kros pait na narapela i no traim long winim narapela. (Ap. 18:⁠3) Tasol samting i bin helpim ol long pas gut wantaim Jehova, em taim tupela i mekim ol wok lotu wantaim. Maski ol i stap long Korin, Efesus, o Rom, planti man i save long tupela olsem ol i ‘wanwok bilong Krais Jisas.’ (Ro. 16:⁠3) Ol i save wok wantaim long autim tok bilong Kingdom long wanem wanem hap ol i stap long en.

13, 14. (a) Wanem ol samting inap mekim na tupela marit i hatwok long i stap wanbel? (b) Ol marit i ken mekim wanem bilong strongim pasin bilong i stap olsem “wanpela bodi”?

¹³ Tru tumas, pasin bilong wanbel long winim ol mak na mekim ol wok wantaim, dispela i save strongim marit. (Sav. 4:​9, 10) Tasol sori tru, planti marit long nau i no save mekim tumas ol samting wantaim poroman marit bilong ol. Tupela i save lusim planti aua long narapela narapela wok mani bilong ol. Long sampela marit, poroman i wok mani i mas raun raun planti taim o em yet i mas go sindaun long narapela kantri na mekim wok bilong salim mani i go bek long famili. Na long haus tu, sampela marit i pilim olsem ol i stap wanpis, long wanem, poroman i lusim bikpela hap taim long lukim TV o Intenet, mekim sampela wok bilong em yet, insait long spot, o pilaim vidio gem. Olsem wanem? Marit bilong yu i gat dispela pasin i stap? Sapos olsem, yu ting yu inap mekim sampela senis na bai yu inap lusim bikpela hap taim moa long stap wantaim poroman bilong yu? Yu ting yu inap wok wantaim poroman long redim kaikai, wasim ol kap plet samting, o mekim wok long gaden? O wok wantaim long lukautim ol pikinini o helpim ol lapun papamama?

¹⁴ Bikpela samting moa yet, olgeta taim yupela i mas wok wantaim long mekim ol wok i helpim lotu bilong Jehova. Pasin bilong mekim teks bilong de na Famili Lotu em i nambawan gutpela rot bilong helpim famili long i stap wanbel long tingting na long ol mak famili i laik winim. Na tu, mekim wok bilong autim tok wantaim. Sapos inap, mekim wok painia wantaim, maski yupela i mekim inap long wanpela mun o wanpela yia tasol. (Ritim 1 Korin 15:58.) Wanpela sista i painia wantaim man bilong em, i tok: “Wok autim tok em wanpela rot we mitupela inap lusim bikpela taim wantaim na toktok gut wantaim. Mitupela i gat wankain tingting long helpim ol narapela long save long God, olsem na mi pilim olsem mitupela i  poroman gut long mekim wok. Mi pilim olsem mi pas gut wantaim em olsem wanpela gutpela pren, na i no olsem poroman marit tasol.” Taim yupela i wok wantaim long mekim ol gutpela wok, isi isi ol laik bilong yupela, ol samting i bikpela samting long yupela, na ol pasin bilong yupela bai wok long kamap wankain. Olsem Akwila na Prisila, bai yupela i kamap olsem “wanpela bodi” long pasin bilong wokim tingting, pilim ol samting, na mekim ol wok.

Larim God i Stap Insait Long Marit

15. Wanem samting i olsem nambawan rot bilong helpim marit long i stap gut? Stori long dispela.

¹⁵ Jisas i save olsem em i bikpela samting long larim God i stap namba wan insait long marit. Em i lukim Jehova i wokim namba wan marit. Em i luksave olsem Adam na Iv i amamas taim ol i bihainim tok bilong God, na em i lukim tu hevi i kamap taim ol i sakim tok. Olsem na taim Jisas i skulim ol narapela, em i mekim wankain tok olsem Papa bilong em i bin mekim long Stat 2:24. Na Jisas i tok moa olsem: “Samting God i pasim pinis, em man i no ken katim.” (Mt. 19:⁠6) Olsem na pasin bilong rispek tru long Jehova i stap yet olsem nambawan rot bilong helpim marit long i stap gut na stap amamas. Papamama bilong Jisas, em Josep na Maria, tupela i stap gutpela piksa long dispela samting.

16. Olsem wanem Josep na Maria i bin soim olsem ol samting bilong lotu i bikpela samting long famili bilong ol?

¹⁶ Josep i mekim gutpela pasin long Maria na rispek long em. Taim Josep i save olsem Maria i gat bel, em i laik marimari long em, maski ensel i no bin stori yet long em long samting i bin kamap long Maria. (Mt. 1:​18-20) Tupela i save bihainim lo bilong Sisar na Lo Bilong Moses tu. (Lu. 2:​1-5, 21, 22) Maski ol man tasol i mas i go long ol bikpela bung bilong lotu i kamap long Jerusalem, Josep na Maria, wantaim ol pikinini bilong ol, i save go long olgeta yia. (Lo 16:16; Lu. 2:41) Long ol dispela samting na long ol narapela rot tu, dispela tupela marit i wok strong long amamasim Jehova na ol i soim rispek long ol samting bilong lotu. Olsem na i gat as na Jehova i bin makim tupela long lukautim Pikinini bilong em taim em i kamap long graun.

17, 18. (a) Long wanem ol rot ol marit inap larim God i stap namba wan insait long marit bilong ol? (b) Olsem wanem dispela bai helpim ol?

¹⁷ Olsem wanem? Yupela tu i larim tingting bilong Jehova i stiaim famili bilong yupela? Paslain long yupela i mekim ol bikpela disisen, yupela i save skelim ol stiatok bilong Baibel, beten long dispela samting, na kisim tingting long ol strongpela Kristen? O yupela i save stretim ol hevi long rot bilong bihainim tingting bilong yupela yet o bilong famili na ol pren bilong yupela? Yupela i save wok strong long bihainim ol gutpela tok long marit na famili, em gutpela wokboi i kamapim? O yupela i save bihainim tasol ol kastam bilong ples o tingting bilong ol man? Yupela i save beten na stadi wantaim, putim ol mak bilong spirit em famili i laik winim, na toktok long ol samting em bikpela samting long famili?

¹⁸ Ray na meri bilong em i marit 50 yia na tupela i stap amamas, Ray i tok: “Olgeta taim mipela inap stretim ol hevi bilong mipela, long wanem, mipela i save larim Jehova i stap insait long marit bilong mipela, na dispela i mekim na marit i stap olsem wanpela ‘baklain i gat tripela string.’ ” (Ritim Saveman 4:​12.) Danny na Trina i wanbel long tok bilong Ray. Tupela i tok: “Mipela mekim wok bilong God wantaim na dispela i strongim marit bilong mipela.” Tupela i bin marit inap 34 yia, na ol i stap amamas. Sapos oltaim yupela i larim Jehova i stap namba  wan insait long marit bilong yupela, em bai helpim marit bilong yupela long i stap gut na givim planti blesing long yupela.​—⁠Sng. 127:⁠1.

Rispektim Yet Presen God i Givim

19. Bilong wanem God i bin givim marit olsem wanpela presen?

¹⁹ Long planti manmeri long nau, namba wan bikpela samting long ol em amamas bilong ol yet. Tasol ol wokman bilong Jehova i gat narapela tingting. Ol i save olsem God i bin givim marit olsem wanpela presen bilong kamapim samting em i tingting pinis long mekim. (Stt. 1:​26-28) Sapos Adam na Iv i bin rispektim dispela presen, graun olgeta bai stap olsem wanpela paradais we i gat ol wokman bilong God i stap amamas na bihainim stretpela pasin.

20, 21. (a) Bilong wanem yumi mas tingim marit olsem samting i holi? (b) Neks wik bai yumi stori long wanem presen?

²⁰ Na bikpela samting moa, ol wokman bilong God i mas tingim marit olsem wanpela rot bilong givim biknem long Jehova. (Ritim 1 Korin 10:31.) Olsem yumi stori pinis, pasin bilong stap gut long poroman, pasin wanbel, na larim God i stap namba wan long marit, ol i gutpela pasin Jehova i laikim na i save strongim marit. Olsem na maski yumi tingting long marit, o yumi laik strongim marit, o lukautim marit na bai marit i no ken bruk, namba wan samting yumi mas tingim i olsem: Marit em samting i holi na God i as bilong en. Taim yumi tingim dispela, yumi bai wok strong long larim Tok Bilong God i stiaim yumi taim yumi mas wokim ol disisen long ol samting bilong marit. Long dispela rot yumi soim rispek long marit, na long Man i givim dispela presen, em God Jehova.

²¹ Tru, Jehova i givim marit olsem presen, tasol i gat ol narapela presen tu em i givim; na i no marit tasol i rot bilong i stap amamas. Long stadi i kamap bihain, bai yumi skelim narapela gutpela presen God i givim​—⁠em presen bilong stap singel.

Bai Yu Bekim Olsem Wanem?

• Pasin bilong stap gut long poroman i mas mekim wanem long ol marit Kristen?

• Olsem wanem pasin bilong stap wanbel na wok wantaim i strongim marit?

• Wanem sampela rot we ol marit i ken larim God i stiaim ol?

• Olsem wanem yumi ken soim rispek long Jehova, em Man i kamapim marit?

[Askim Bilong Stadi]

[Piksa long pes 15]

Taim tupela marit i wok wantaim, dispela i helpim ol long i stap wanbel