Stap Singel​—⁠Yusim Gut Dispela Taim

“Man husat inap mekim olsem, gutpela em i mekim olsem.”​—⁠MT. 19:​12, NW.

1, 2. (a) Jisas, Pol, na sampela narapela i gat wanem tingting long pasin bilong i stap singel? (b) Wanem as na ating sampela i no ting pasin bilong i stap singel i olsem presen?

 MARIT em i wanpela gutpela presen tru God i givim long ol manmeri. (Snd. 19:14) Tasol planti singel Kristen ol tu i stap amamas. Harold, em wanpela brata i gat 95 krismas na em i no bin marit, em i tok: “Tru, mi amamas long stap wantaim ol narapela na singautim ol i kam long haus bilong mi, tasol taim mi wanpela i stap, mi no bel hevi long i stap wanpis. Mi ken tok mi amamas long i stap singel.”

² Jisas Krais na aposel Pol i tok pasin bilong stap singel em i wanpela presen God i givim, wankain olsem marit. (Ritim Matyu 19:​11, 12 a; 1 Korin 7:⁠7.) Tasol sampela, em i no  long laik bilong ol yet na ol i stap singel. Sampela taim i hatwok long painim gutpela poroman. O sampela i bin marit inap planti yia, tasol nau ol i stap singel, long wanem, ol i divos o poroman marit i dai. Orait, olsem wanem pasin bilong i stap singel i olsem presen? Na olsem wanem ol singel Kristen inap yusim gut dispela taim bilong i stap singel?

Narapela Kain Presen

3. Ol singel i winim ol marit long wanem samting?

³ Ol singel i gat bikpela hap taim moa na ol i stap fri long mekim planti samting moa winim ol marit. (1 Ko. 7:​32-35) Dispela i helpim ol long mekim planti wok moa bilong Jehova, tingim na laikim planti manmeri moa, na go klostu moa long Jehova. Olsem na planti Kristen i luksave long ol gutpela samting bilong i stap singel na ol i laik “mekim olsem,” inap long sampela hap taim. Ating sampela narapela i no bin tingting long i stap singel, tasol taim i luk olsem i no gat rot long ol i marit, ol i bin beten long dispela na ol i luksave olsem sapos Jehova i helpim ol, ol inap stap bel isi na no ken pilim olsem ol i mas marit. Long dispela rot ol i amamas long i stap singel.​—⁠1 Ko. 7:​37, 38.

4. I gat wanem as na ol singel Kristen i ken belgut taim ol i mekim wok bilong God?

⁴ Ol singel Kristen i save olsem Jehova i amamas long ol na ol inap mekim gutpela wok insait long oganaisesen bilong em. God i laikim yumi olgeta wan wan. (Mt. 10:​29-31) No gat wanpela man o wanpela samting inap pasim God long laikim yumi. (Ro. 8:​38, 39) Maski yumi marit o yumi singel, i gat as na yumi ken belgut taim yumi mekim wok bilong God.

5. Bilong yusim gut taim bilong stap singel, singel Kristen i mas mekim wanem?

⁵ Tasol bilong yusim gut taim bilong stap singel, singel Kristen i mas wok strong. Ol singel Kristen long nau​—⁠maski em brata o sista, yangpela o ol i gat bikpela krismas, o em laik bilong ol yet na ol i stap singel o i gat narapela as na ol i stap singel​—⁠olsem wanem ol i ken yusim gut dispela taim bilong i stap singel? Nau yumi ken skelim sampela gutpela eksampel bilong kongrigesen Kristen bilong bipo.

Stap Singel Taim Yu Yangpela

6, 7. Fopela pikinini meri bilong Filip i bin mekim wanem wok bilong God? (b) Olsem wanem Timoti i bin yusim gut taim bilong em long stap singel? Em i kisim wanem ol blesing?

⁶ Filip, man bilong autim gutnius, em i gat 4-pela pikinini meri ol i no marit na ol i bihainim pasin bilong papa bilong ol long givim bel long autim gutnius. (Ap. 21:​8, 9) Wok bilong autim tok profet em wanpela presen em holi spirit i as bilong en, na dispela 4-pela yangpela meri i bin yusim dispela presen na ol i truim tok bilong Joel 2:​28, 29.

⁷ Timoti i wanpela yangpela man i bin yusim  gut taim long stap singel. Kirap long taim em i stap liklik pikinini yet, mama bilong em Yunis, na tumbuna meri bilong em Lois, i bin lainim em long “tok bilong God.” (2 Ti. 1:5; 3:​14, 15) Tasol ol i no Kristen long dispela taim. Ol i kamap Kristen long taim Pol i kam namba wan taim long Listra, em asples bilong ol, long 47 C.E. Tupela yia bihain, taim Pol i mekim namba 2 raun long dispela hap, ating Timoti i bin i gat 19 o 20 krismas samting. Tasol maski em i yangpela man na em i nupela Kristen, ol Kristen elda long Listra na Aikoniam i save tok olsem “Timoti i gutpela man.” (Ap. 16:​1, 2) Olsem na Pol i singautim Timoti long raun wantaim em. (1 Ti. 1:18; 4:14) Yumi no save Timoti i bin marit long bihain o nogat. Tasol yumi save olsem taim em i yangpela man, em i bin amamas long go wantaim Pol, na inap planti yia em i bin amamas long mekim wok olsem wanpela singel misineri na wasman.​—⁠Fl. 2:​20-22.

8. Wanem samting i mekim na Jon Mak inap mekim planti wok bilong God? Em i kisim wanem ol blesing?

⁸ Taim Jon Mak i yangpela, em tu i bin yusim gut taim bilong em long stap singel. Em wantaim mama bilong em Maria, na kasen bilong em Barnabas, ol i bilong kongrigesen long Jerusalem. Ating famili bilong Mak i bin i gat gutpela sindaun, long wanem, ol i gat haus bilong ol yet long taun na wanpela wokmeri. (Ap. 12:​12, 13) Tasol maski Mak i gat ol dispela gutpela samting, na em i yangpela man, em i no tingim em yet tasol; em i no tingting long marit na stap tasol long dispela hap. Ating pasin bilong poroman wantaim ol aposel i bin kirapim laik bilong em long mekim wok misineri. Olsem na em i go wantaim Pol na Barnabas long namba wan raun bilong wok misineri bilong ol na helpim tupela. (Ap. 13:⁠5) Bihain, em i raun wantaim Barnabas, na bihain long dispela, em i wok wantaim Pita long Babilon. (Ap. 15:39; 1 Pi. 5:13) Hamas yia Mak i stap singel, yumi no save. Tasol em i kisim gutnem olsem man i redi long helpim ol arapela na mekim planti wok bilong God.

9, 10. Wanem rot i op long ol yangpela singel Kristen long nau long mekim bikpela wok bilong God? Stori long wanpela eksampel.

⁹ Planti yangpela long kongrigesen long nau ol i amamas long yusim dispela taim bilong ol long stap singel long mekim bikpela wok bilong God. Olsem Mak na Timoti, ol i save olsem taim ol i stap singel, dispela i givim rot long ol i ‘mekim wok bilong Bikpela oltaim, na i no gat wanpela samting i pulim nabaut tingting bilong ol.’ (1 Ko. 7:35) Rot i op long ol singel i mekim kain kain wok​—⁠wok painia, mekim wok long ol hap i sot long ol man bilong autim tok bilong Kingdom, lainim narapela tokples, helpim wok bilong sanapim Haus Kingdom o haus brens, go long Ministerial Trening Skul, na wok long Betel. Sapos yu yangpela yet na yu singel, yu inap insait long wanpela bilong ol dispela wok?

¹⁰ Wanpela brata nem bilong em Mark, i kirap mekim wok painia taim em i gat 18 krismas samting, na em i go long Ministerial Trening Skul, na em i bin mekim wok long ol narapela narapela kantri. Em i bin insait long fultaim sevis inap 25 yia, na em i tok: “Mi bin traim long strongim olgeta long kongrigesen, olsem wok wantaim ol long autim tok, mekim ol sepeding visit, singautim ol long kam kaikai wantaim mi long haus, na stretim rot bilong wokim ol bung we narapela i ken strongim narapela. Olgeta dispela samting i bin givim bikpela amamas long mi.” Tok bilong Mark i kamapim olsem pasin bilong givim samting i save kamapim bikpela amamas tru, na pasin bilong givim bel long mekim wok bilong God i gutpela rot long helpim gut ol narapela. (Ap. 20:35) Maski i gat sampela samting yu yet i gat laik long mekim, o yu gat save long mekim sampela wok o nogat, ol yangpela long nau i gat planti wok bilong Bikpela ol inap mekim.​—⁠1 Ko. 15:⁠58.

11. Wanem ol gutpela samting inap kamap sapos yu no marit hariap?

¹¹ Tru, klostu olgeta yangpela i laik marit long bihain, tasol i gat as na ol i no ken marit hariap. Pol i kirapim ol yangpela long wet inap long ol i abrusim dispela taim we laik bilong  mekim maritpasin i strong tumas. (1 Ko. 7:36) Pastaim yu mas save long ol laik na tingting bilong yu yet na kisim save long ol samting i kamap long laip, na dispela bai helpim yu long makim gutpela poroman marit. Tok promis bilong marit i bikpela samting, em samting bilong stap oltaim.​—⁠Sav. 5:​2-5.

Stap Singel Gen

12. (a) Ana i mekim wanem taim senis i kamap long laip bilong em? (b) Em i kisim wanem gutpela pe?

¹² Ana, em gutnius bilong Luk i stori long en, ating em i bin bel hevi tru taim man bilong em i dai. Ol i bin marit 7-pela yia tasol. Tupela i gat pikinini o nogat, o em i laik marit gen, em yumi no save. Tasol Baibel i tok taim Ana i gat 84 krismas, em i stap wido yet. Baibel i helpim yumi long save olsem taim dispela senis i bin kamap long laip bilong Ana, em i yusim dispela taim long i go klostu moa long Jehova. Em “i no save lusim tempel. Em i save tambu long kaikai na i beten i stap, na em i holim wok bilong God long san na long nait.” (Lu. 2:​36, 37) Olsem na wok lotu i stap nambawan bikpela samting long laip bilong em. Bilong mekim olsem, em i mas wok strong, tasol em i kisim gutpela pe. Em i lukim pikinini Jisas na em i tokim ol narapela olsem long rot bilong dispela Mesaia, God bai kisim bek ol man.​—⁠Lu. 2:⁠38.

13. (a) Wanem samting i soim olsem Dorkas i bin mekim bikpela wok insait long kongrigesen? (b) Dorkas i kisim wanem pe long gutpela pasin bilong em?

¹³ Wanpela meri, nem bilong em Dorkas, o Tabita, i stap long Jopa, em wanpela taun bilong bipo i stap long nambis, long hap not-wes long Jerusalem. Baibel i no stori long man bilong em, olsem na yumi ken ting olsem em i no marit long dispela taim. Dorkas “i save mekim ol gutpela pasin na em i save helpim ol manmeri i sot long ol samting.” Em i save samapim planti klos bilong ol wido na ol narapela i sot long ol samting, olsem na ol i laikim em tru. Olsem na taim em i kisim sik na i dai, kongrigesen olgeta i singautim Pita long kam na kirapim bek dispela gutpela susa bilong ol. Taim stori bilong kirap bek bilong em i go nabaut long olgeta hap bilong Jopa, planti manmeri i kirap na bilip long Bikpela. (Ap. 9:​36-42) Long rot bilong gutpela pasin bilong em, ating Dorkas yet i bin helpim sampela bilong ol dispela man.

14. Wanem samting i kirapim ol singel Kristen long i go klostu moa long Jehova?

¹⁴ Olsem Ana na Dorkas, planti long ol kongrigesen long nau ol i stap singel. Ating sampela i no bin painim poroman i stret long ol. Na sampela i bin divos o man o meri bilong ol i dai. Ol i no gat poroman marit bilong toktok wantaim ol, olsem na ol singel Kristen i strong moa yet long kamapim tingting bilong ol long Jehova. (Snd. 16:⁠3) Wanpela singel sista em i ting dispela em i gutpela samting, em Silvia, em i bin mekim wok long Betel inap 38 yia. Em i tok: “Sampela taim mi les long strongim mi yet. Na mi save tingting, ‘Husat bai strongim mi?’ ” Tasol em i tok moa: “Taim mi bilip strong olsem Jehova i save gut moa long wanem samting bai helpim mi, dispela i helpim mi long go klostu moa long em. Oltaim em i save strongim mi, na sampela taim em long wanpela rot mi no bin tingim.” Yes, taim yumi go klostu moa long Jehova, oltaim em i save helpim gut yumi.

15. Olsem wanem ol singel Kristen inap ‘givim bel moa yet’ long laikim ol narapela?

¹⁵ Pasin bilong stap singel i opim rot long ‘givim bel moa yet’ long laikim ol narapela. (Ritim 2 Korin 6:​11-​13.) Jolene, wanpela singel sista husat i stap long fultaim sevis inap 34 yia, em i tok: “Mi wok strong long pas gut tru wantaim ol narapela, na i no long ol wankrismas tasol, nogat. Mi save poroman wantaim olgeta kain lain. Pasin bilong stap singel em i gutpela rot bilong mekim ol wok bilong Jehova, na helpim famili, ol bratasista, na ol neiba bilong yu tu. Krismas bilong mi i go antap na mi amamas moa long mi stap singel.” Ol lapun, ol lain i gat sik, ol papa o mama wanpis, ol yangpela, na ol narapela long kongrigesen i amamas tru long pasin bilong ol singel long daunim sampela laik bilong ol yet na helpim ol. Tru tumas, taim yumi mekim pasin laikim long ol narapela,  yumi save amamas. Yu ting yu inap ‘givim bel moa yet’ long laikim ol narapela?

Stap Singel Long Laip Olgeta

16. (a) I gat wanem as na Jisas i stap singel long laip olgeta? (b) Olsem wanem Pol i bin yusim gut taim bilong stap singel?

¹⁶ Jisas i no marit; em i mas redi long mekim wok God i givim long em na inapim dispela wok. Em i raun long planti hap na mekim wok kirap long bikmoning i go inap long nait, na bihain em i givim laip bilong em olsem sakrifais. Em i singel na em inap mekim ol dispela wok. Aposel Pol i raun inap planti tausen kilomita na em i karim planti hevi taim em i mekim wok bilong em. (2 Ko. 11:​23-27) Yumi no save, pastaim Pol i bin marit o nogat, tasol taim em i kisim wok olsem wanpela aposel, em i laik stap singel. (1 Ko. 7:7; 9:⁠5) Long helpim wok bilong autim tok, Jisas na Pol i strongim ol narapela long bihainim pasin bilong tupela sapos ol inap mekim. Tasol tupela i no tok ol wokman bilong God i no ken marit, nogat.​—⁠1 Ti. 4:​1-3.

17. Olsem wanem sampela long nau i bin bihainim lek mak bilong Jisas na Pol? Olsem wanem yumi ken save olsem Jehova i tingim ol lain i mekim olsem?

¹⁷ Long nau, sampela i bin pasim tok long bel long stap singel na bai ol inap mekim gut moa wok bilong ol long autim tok. Harold, em yumi stori pinis long em, em i bin amamas long mekim wok long Betel inap 56 yia. Em i tok: “Taim mi stap 10-pela yia pinis long Betel, mi bin lukim planti marit ol i lusim Betel, long wanem, ol i sik o ol i mas go lukautim lapun papamama. Papamama bilong mi i dai pinis. Tasol mi laikim tru Betel, olsem na mi no laik marit, nogut dispela i pasim mi long stap long Betel.” Na Margaret, wanpela sista i mekim wok painia longpela taim, em i tok: “I gat rot long mi inap marit, tasol mi no mekim. Mi singel, olsem na mi stap fri moa na mi inap mekim bikpela wok moa long autim tok, na dispela i bin givim bikpela amamas long mi.” Yumi save olsem Jehova i no inap lusim tingting long ol lain i daunim sampela laik bilong ol yet na bai ol ken mekim wok bilong lotu i tru.​—⁠Ritim Aisaia 56:​4, 5.

Yusim Gut Dispela Taim

18. Olsem wanem ol narapela inap strongim na helpim ol singel Kristen?

¹⁸ I stret yumi strongim na tok amamas long olgeta singel Kristen husat i wok strong long mekim wok bilong Jehova. Yumi laikim ol wan wan na yumi amamas long bikpela wok ol i mekim insait long kongrigesen. Sapos yumi stap olsem “brata o susa o mama o papa o pikinini” bilong ol, bai ol i no pilim olsem ol i stap wanpis.​—⁠Ritim Mak 10:​28-​30.

19. Olsem wanem yu inap yusim gut taim bilong stap singel?

¹⁹ Sapos long laik bilong yu yet yu singel o i gat narapela as na yu stap singel, ol dispela stori bilong ol man long Baibel na bilong nau tu, i ken strongim yu olsem yu inap stap amamas na mekim ol gutpela wok long laip bilong yu. Sampela taim yu kisim presen yu bin wetim, na sampela taim yu kisim presen em yu no bin ting yu bai kisim. Sampela presen yu laikim wantu, na sampela presen yu no tingim tumas taim yu kisim, tasol bihain yu laikim tru. Olsem na tingting bilong yumi i bikpela samting. Olsem wanem yu inap yusim gut taim bilong stap singel? Yu ken go klostu moa long Jehova, bisi long mekim wok bilong God, na givim bel moa yet long laikim ol narapela. Olsem marit, pasin bilong stap singel inap kamapim ol gutpela samting taim yumi bihainim tingting bilong God long stap singel na yusim gut dispela presen.

[Futnot]

Yu Inap Tingim?

• Olsem wanem pasin bilong stap singel i olsem wanpela presen?

• Olsem wanem pasin bilong i stap singel taim yu yangpela i gutpela samting?

• Wanem ol rot i op long ol singel Kristen long i go klostu moa long Jehova na givim bel moa long laikim ol narapela?

[Askim Bilong Stadi]

[Ol Piksa long pes 18]

Yu yusim gut taim bilong yu long mekim wok bilong God?