Askim

Bilong wanem Moses i kros long tupela pikinini man bilong Aron, em Eleasar na Itamar, taim tupela brata bilong ol, Nadap na Abihu, i dai pinis? Na wanem samting i mekim na kros bilong em i pinis?​—⁠Wkp. 10:​16-20.

Bihain liklik long taim ol i kirapim wok pris, Jehova i kilim i dai tupela pikinini man bilong Aron, em Nadap na Abihu, long wanem, tupela i bin putim paia long plet bilong kamapim smok i gat gutpela smel na ol i ofaim long Jehova, tasol Jehova i no bin tokim tupela long mekim olsem. (Wkp. 10:​1, 2) Moses i tok strong long tupela pikinini man bilong Aron i stap laip yet, olsem ol i no ken krai sori long tupela brata bilong ol i dai pinis. I no longtaim bihain long dispela na Moses i kros long Eleasar na Itamar, long wanem, tupela i no bin kaikai meme ol i bin mekim ofa long en bilong rausim sin. (Wkp. 9:⁠3) Bilong wanem Moses i kros long dispela?

Ol lo Jehova i bin givim long Moses i tok, pris i bin ofaim abus bilong rausim sin em i mas kaikai hap mit bilong en insait long banis bilong haus lotu sel. Taim pris i mekim olsem, dispela i makim olsem Jehova i lusim sin bilong ol man i bin mekim dispela ofa. Tasol sapos pris i bin kisim hap blut bilong ofa i go insait long Rum Tambu, em namba wan rum bilong haus lotu sel, pris i no ken kaikai mit bilong ofa. Em i mas kukim olgeta long paia.​—⁠Wkp. 6:​24-26, 30.

I luk olsem, taim Nadap na Abihu i dai, Moses i strong long ol pris i mas bihainim olgeta lo Jehova i bin givim long ol. Taim Moses i save pinis olsem ol i bin kukim long paia dispela meme bilong ofa bilong rausim sin, em i kros. Ol i no bin ofaim blut bilong en long Jehova insait long Rum Tambu, olsem na Moses i kros na askim ol bilong wanem tupela i no bin kaikai mit bilong meme olsem Lo i tok.​—⁠Wkp. 10:​17, 18.

Aron yet i bekim askim bilong Moses, long wanem, i luk olsem em i bin orait long samting Eleasar na Itamar i bin mekim. Jehova i bin kilim i dai tupela pikinini man bilong Aron long dispela de, olsem na ating Aron i tingting, ating i no gat wanpela pris inap kaikai mit bilong ofa bilong rausim sin long dispela de na bel i no gat tok long dispela. Ating em i tingting, nogut ol i kaikai na Jehova i no amamas long ol, maski ol yet i no gat asua long rong em Nadap na Abihu i bin mekim.​—⁠Wkp. 10:⁠19.

Na ating Aron i bin tingting tu olsem: Long dispela de, em namba wan taim bilong famili bilong em i mekim wok pris bilong ol, ol i mas was gut tru na bai ol i mekim olgeta samting God i laikim. Tasol Nadap na Abihu i bin bagarapim nem bilong Jehova, na belhat bilong God i painim tupela. Olsem na ating Aron i bin tingting olsem, famili bilong lain pris em bikpela sin olsem i bin kamap insait long en, ol i no ken kaikai mit bilong wanpela ofa holi.

I luk olsem Moses i orait long bekim bilong brata bilong em, long wanem, laspela ves i tok: “Moses i harim dispela na em i ting tok bilong Aron i gutpela. Olsem na bel bilong en i stap isi.” (Wkp. 10:20) Na i luk olsem Jehova tu i orait long bekim bilong Aron.