Laikim Stretpela Pasin Long Bel Olgeta

“Yu save laikim stretpela pasin.”​—⁠SNG. 45:⁠7.

1. Wanem samting bai helpim yumi long bihainim “gutpela rot”?

 LONG rot bilong Tok bilong em na holi spirit, Jehova i save bringim lain bilong em long “gutpela rot.” (Sng. 23:⁠3) Tasol yumi gat sin, olsem na sampela taim yumi lusim dispela rot. Bilong kirap gen long mekim pasin i stret, yumi mas wok strong. Wanem samting bai helpim yumi? Olsem Jisas, yumi mas i gat laik tru long mekim pasin i stret.​—⁠Ritim Song 45:⁠7.

2. Dispela “gutpela rot” i makim wanem samting?

² Wanem dispela “gutpela rot”? Dispela rot i makim wokabaut bilong man em stretpela pasin bilong Jehova i as bilong en. Long tok Hibru na tok Grik, “stretpela pasin” i makim pasin bilong bihainim tru ol gutpela stiatok. Jehova i “olsem ples ol [man] i ken i go long en na i stap gut tru,” olsem na ol man i lotu long em ol i amamas long larim em i makim stretpela rot ol i mas bihainim.​—⁠Jer. 50:⁠7.

3. Olsem wanem yumi inap kisim save moa long stretpela pasin bilong God?

³ Pasin bilong givim bel olgeta long bihainim ol stretpela lo bilong God, dispela tasol em i rot bilong God i ken amamas long yumi. (Lo 32:⁠4) Bilong mekim olsem, pastaim yumi mas wok strong long kisim save long God Jehova long rot bilong Baibel. Taim yumi wok long kisim save moa long em, na go klostu moa long em long olgeta de, bai yumi laikim moa yet stretpela pasin bilong em. (Jems 4:⁠8) Na tu, yumi mas larim Tok Bilong God i stiaim yumi long taim yumi gat wok long mekim ol bikpela disisen.

Wok Long Painim Stretpela Pasin Bilong God

4. Wanem samting i insait long wok bilong painim stretpela pasin bilong God?

⁴ Ritim Matyu 6:33. Bilong painim stretpela pasin bilong God, yumi mas autim gutnius bilong Kingdom, na tu, i gat sampela samting moa yumi mas mekim. Sapos yumi laik bai Jehova i orait long lotu bilong yumi, wokabaut bilong yumi long ol wan wan de i mas stret wantaim ol lo bilong em. Ol manmeri i wok long painim stretpela pasin bilong Jehova, ol i mas mekim wanem? Ol i mas “kisim nupela pasin em laik bilong God yet i as bilong en na i poroman wantaim stretpela pasin na pasin bilong stap gut long narapela.”​—⁠Efe. 4:24.

5. Wanem samting inap helpim yumi long daunim bel hevi?

⁵ Taim yumi wok strong long bihainim ol stretpela lo bilong God, sampela taim ol popaia bilong yumi i mekim na yumi bel hevi. Wanem samting inap helpim yumi long daunim bel hevi na lain long laikim na bihainim stretpela pasin? (Snd. 24:10) Oltaim yumi mas beten na go klostu long Jehova “wantaim gutpela bel, na yumi ken bilip tru olsem yumi ken mekim olsem.” (Hib. 10:​19-22) Maski yumi Kristen God i bin makim o yumi wet long kisim laip oltaim long graun, yumi save bilip long ofa bilong Jisas Krais bilong baim bek ol man na long ol wok bilong em olsem Hetpris bilong yumi. (Rom 5:8; Hib. 4:​14-​16) Namba wan nius Wastaua ol i wokim i stori long wok bilong blut bilong Jisas long helpim yumi. (1 Jon 1:​6, 7) Wastaua i tok: “Long ai bilong lait, taim yu yusim retpela glas bilong lukim wanpela retpela samting, dispela retpela samting bai luk olsem waitpela. Olsem na maski ol sin bilong yumi i olsem retpela kala, taim God i lukim ol dispela sin long rot bilong blut bilong Krais, ol i olsem waitpela.” (Julai 1879, p. 6) Samting Jehova i bin mekim bilong helpim yumi long rot bilong ofa bilong Pikinini  bilong em, dispela em i wanpela gutpela samting tru!​—⁠Ais. 1:⁠18.

Skelim Klos Pait Bilong Yu

6. Bilong wanem i bikpela samting long yumi skelim klos pait bilong yumi?

⁶ Long olgeta taim, yumi mas “pasim stretpela pasin olsem siot kapa long bros,” long wanem, em hap bilong klos pait i kam long God. (Efe. 6:​11, 14) Maski nau tasol yumi dediket long Jehova o yumi bin mekim wok bilong em inap planti yia pinis, em i bikpela samting long yumi skelim klos pait bilong yumi long olgeta de. Bilong wanem? Long wanem, Satan na ol ensel bilong em ol i stap pinis long graun. (Rev. 12:​7-12) Satan i belhat, na em i save olsem taim bilong em i sot. Olsem na em i strong moa long pait long ol manmeri bilong God. Olsem wanem? Yumi kliagut olsem i bikpela samting long yumi pasim “stretpela pasin olsem siot kapa long bros”?

7. Taim yumi luksave olsem yumi mas “pasim stretpela pasin olsem siot kapa long bros,” bai yumi mekim wanem?

⁷ Olsem siot kapa i save lukautim bros, stretpela pasin i save lukautim bel bilong yumi. Yumi gat sin, olsem na bel bilong yumi inap giamanim yumi. (Jer. 17:⁠9) Bel bilong yumi i save kirapim yumi long mekim pasin nogut, olsem na i bikpela samting long yumi mas skulim na stretim bel bilong yumi. (Stt. 8:21) Sapos yumi luksave olsem yumi mas “pasim stretpela pasin olsem siot kapa long bros,” bai yumi no rausim dispela siot kapa inap sotpela taim, olsem insait long ol amamas em God i nolaik tru long en o tingting long insait long ol pasin nogut. Na tu, bai yumi no tromoi nating bikpela hap taim long lukim televisen. Nogat. Bai yumi wok strong yet long mekim ol samting Jehova i laikim. Na sapos inap liklik taim yumi pundaun long ol laik nogut bilong skin, bai yumi kirap gen​—⁠Jehova bai helpim yumi long mekim olsem.​—Ritim Sindaun 24:⁠16.

8. Bilong wanem yumi mas pasim “bilip olsem hap plang”?

⁸ Narapela hap bilong klos pait yumi mas kisim, em “bilip olsem hap plang.” Em bai helpim yumi long “mekim i dai olgeta spia paia bilong Satan.” (Efe. 6:16) Na bilip na pasin bilong laikim Jehova long bel olgeta bai helpim yumi long bihainim stretpela pasin na stap yet long rot i go long laip oltaim. Taim yumi lain long laikim moa yet Jehova, bai yumi laikim moa yet stretpela pasin bilong em. Tasol olsem wanem long maus bilong bel bilong yumi? Olsem wanem dispela i helpim yumi long laikim stretpela pasin?

Maus Bilong Bel i Mas i Stap Klin

9. Taim maus bilong bel i stap klin, dispela i helpim yumi olsem wanem?

⁹ Taim yumi kisim baptais, yumi askim God long mekim ‘maus bilong bel bilong yumi i stap klin.’ (1 Pita 3:21) Yumi bilip long pe bilong baim bek man, olsem na blut bilong Jisas i karamapim ol sin bilong yumi na nau yumi stap klin long ai bilong God. Tasol bilong God i ken orait yet long yumi, yumi mas lukautim gut maus bilong bel na bai em i stap klin. Sapos sampela taim maus bilong bel i kotim yumi na i mekim tok lukaut, yumi ken amamas em i wok gut. Taim maus bilong bel i mekim wok olsem, dispela i makim olsem maus bilong bel i pilim ol stretpela pasin bilong Jehova. (1 Tim. 4:⁠2) Tasol  maus bilong bel inap mekim narapela wok tu bilong helpim ol man i gat laik long laikim stretpela pasin.

10, 11. (a) Kamapim wanpela stori i kamapim klia as na yumi mas bihainim maus bilong bel em Baibel i skulim pinis. (b) I gat wanem as na pasin bilong laikim stretpela pasin inap mekim man i amamas tru?

¹⁰ Taim yumi mekim ol pasin i no stret, maus bilong bel inap kotim yumi. Wanpela yangpela man i bin lusim rot bilong stretpela pasin. Em i kalabus long lukim ponografi na em i kirap smokim mariwana. Taim em i go long ol miting, bel bilong em i gat tok na taim em i go autim tok em i pilim olsem em i man bilong tupela maus, olsem na em i lusim ol dispela wok Kristen. Em i tok: “Mi no bin save olsem maus bilong bel bai kotim mi long ol pasin mi mekim.” Em i tok moa: “Mi mekim dispela longlong pasin inap 4-pela yia.” Bihain em i kirap tingting long kam bek long tok i tru. Em i no ting Jehova bai harim beten bilong em, tasol em i beten na askim Jehova long fogivim em. Tenpela minit bihain, mama bilong em i kam lukim em na kirapim em long kam bek long ol miting. Dispela man i go long Haus Kingdom na askim wanpela elda long stadi wantaim em. Bihain em i kisim baptais na em i amamas tru long Jehova i bin lukautim laip bilong em.

¹¹ Yumi save amamas tru taim yumi mekim ol pasin i stret. Taim yumi lain long laikim stretpela pasin na mekim moa yet dispela pasin, bai yumi amamas moa yet long mekim ol samting Papa bilong yumi long heven i laikim. Na tingim! Wanpela taim bai kamap na maus bilong bel bilong olgeta man bai i stap isi tasol; ol bai bihainim tru olgeta pasin bilong God. Olsem na long nau yumi mas putim pasin bilong laikim stretpela pasin long bel bilong yumi na mekim Jehova i amamas.​—⁠Snd. 23:​15, 16.

12, 13. Yumi mas mekim wanem bilong skulim maus bilong bel?

¹² Yumi mas mekim wanem bilong skulim maus bilong bel? Taim yumi stadi long Baibel na long ol buk na nius em Baibel i as bilong en, em bikpela samting long tingim olsem “stretpela man i save tingting gut pastaim, na bihain em i bekim tok long arapela man.” (Snd. 15:28) Tingim olsem wanem dispela tok bai helpim yumi long taim yumi gat sampela askim long sait bilong wok skin. Sapos em i klia olsem sampela wok skin i no stret wantaim ol lo bilong Baibel, orait klostu olgeta bilong yumi bai bihainim kwik ol tok yumi kisim long rot bilong gutpela wokboi i gat savetingting. Tasol taim yumi no klia tumas olsem wanpela wok i stret long mekim o nogat, yumi mas skelim ol stiatok bilong Baibel na beten long dispela. a Dispela i makim tu ol stiatok i kamapim olsem yumi no ken mekim ol samting i bagarapim maus bilong bel bilong narapela. (1 Kor. 10:​31-33) Na moa yet yumi mas tingim ol stiatok i helpim yumi long pas gut wantaim God. Sapos yumi tingim Jehova olsem em man i stap tru, yumi mas askim yumi yet, ‘Sapos mi mekim dispela wok, dispela bai mekim Jehova i bel hevi?’​—⁠Sng. 78:​40, 41.

¹³ Taim yumi redim Wastaua o Baibel Stadi Bilong Kongrigesen, yumi mas tingim olsem yumi gat wok long tingim tingim long bel ol tok  yumi ritim. Olsem wanem? Yu save hariap na makim nating bekim bambai yu ken go long narapela paragraf? Kain pasin bilong stadi i no inap strongim pasin bilong yumi long laikim stretpela pasin o helpim maus bilong bel bilong yumi long wok gut. Bilong laikim stretpela pasin, yumi mas stadi gut tru na tingim tingim long bel ol tok yumi ritim long Baibel. Bilong lain long laikim stretpela pasin long bel olgeta, yumi mas wok strong, i no gat narapela rot!

Hangre Long Stretpela Pasin

14. God Jehova na Jisas Krais i laik bai yumi pilim olsem wanem long wok lotu bilong yumi?

¹⁴ God Jehova na Jisas Krais i laik bai yumi amamas taim yumi mekim wok lotu bilong yumi. Wanem samting bai helpim yumi long i stap amamas? Em pasin bilong laikim stretpela pasin! Taim Jisas i mekim Bikpela Tok Long Maunten, em i tok: “Ol man i hangre long stretpela pasin, ol i ken amamas, long wanem, God bai inapim ol tru long en.” (Mat. 5:⁠6) Olsem wanem dispela tok em i bikpela samting long ol man i gat laik long laikim stretpela pasin?

15, 16. Olsem wanem God bai inapim ol man i hangre long ol samting bilong spirit?

¹⁵ Satan i bosim dispela graun yumi stap long en. (1 Jon 5:19) Long ol niuspepa bilong olgeta kantri i gat ol stori i soim olsem pasin bilong pait na mekim nogut long narapela i kamap bikpela tru. Pasin bilong man long mekim nogut long narapela i save bagarapim bel na tingting bilong ol stretpela man. (Sav. 8:⁠9) Yumi ol manmeri i laikim tumas Jehova, yumi save olsem em tasol i gat strong long inapim hangre bilong ol man long ol samting bilong spirit, em ol man i gat laik long lain long stretpela pasin. I no longtaim God bai rausim ol man nogut, na ol man i laikim stretpela pasin bai ol i no kisim hevi moa long pasin nogut bilong ol man bilong sakim lo. (2 Pita 2:​7, 8) Em bai gutpela samting tru!

¹⁶ Yumi ol wokboi bilong Jehova na disaipel bilong Jisas Krais, yumi save olsem God “bai inapim” olgeta man i hangre long stretpela pasin. God bai inapim ol tru long rot bilong nupela skai na nupela graun we “stretpela pasin tasol bai i stap long en.” (2 Pita 3:13) Olsem na yumi no ken bel hevi o kirap nogut olsem pasin bilong daunim man na pait i bin mekim na stretpela pasin i no stap long dispela graun Satan i bosim. (Sav. 5:⁠8) Jehova, God Antap Tru, em i save long ol samting i wok long kamap na klostu nau em bai kisim bek ol man i laikim stretpela pasin.

Laikim Stretpela Pasin, Dispela i Helpim Yumi

17. Wanem sampela gutpela samting i kamap long ol man i laikim stretpela pasin?

¹⁷ Song 146:8 i stori long wanpela gutpela samting tru i painim man i bihainim stretpela pasin. Man bilong raitim song i singsing olsem: “Bikpela i save laikim tru ol stretpela manmeri bilong en.” Tingim dispela! King bilong heven na graun i laikim yumi, long wanem, yumi laikim stretpela pasin. Jehova i laikim yumi, olsem na yumi bilip tru olsem em bai lukautim yumi long taim yumi putim ol samting bilong Kingdom i stap namba wan samting long laip bilong yumi. (Ritim Song 37:25; Sindaun 10:⁠3.) Bihain, dispela graun olgeta bai stap olsem ples bilong ol manmeri i laikim stretpela pasin. (Snd. 13:22) Pe bilong bihainim stretpela pasin em klostu olgeta manmeri bilong God bai kisim, em ol bai stap amamas tru na kisim laip oltaim long wanpela gutpela ples paradais. Long nau tu, ol man i laikim stretpela pasin ol i kisim gutpela samting, bel bilong ol i stap isi na dispela i helpim famili bilong ol na kongrigesen long i stap wanbel.​—⁠Fili. 4:​6, 7.

18. Taim yumi wetim de bilong Jehova, yumi inap mekim wanem ol gutpela samting?

 ¹⁸ Taim yumi wet long bikpela de bilong Jehova bai kamap, yumi mas wok yet long mekim pasin i stret. (Sef. 2:​2, 3) Olsem na yumi mas kamapim olsem yumi laikim tru ol stretpela pasin bilong God Jehova. Yumi mas pasim strong “stretpela pasin olsem siot kapa long bros” bilong lukautim gut bel bilong yumi. Na tu, maus bilong bel i mas i stap klin, dispela bai mekim yumi i amamas na mekim God bilong yumi i belgut tru.​—⁠Snd. 27:⁠11.

19. Yumi mas strong long mekim wanem? Bai yumi stori long wanem samting long stadi i kamap bihain?

¹⁹ Jehova i “save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.” (2 Sto. 16:⁠9) Dispela tok i mekim gut bel bilong yumi taim yumi mekim pasin i stret long dispela taim we ol hevi, pasin bilong pait, na pasin nogut bilong dispela graun i wok long i go bikpela! Ol manmeri i stap longwe long God ol i kirap nogut long stretpela pasin yumi save bihainim. Tasol taim yumi bihainim stretpela pasin bilong Jehova, dispela i helpim yumi. (Ais. 48:17; 1 Pita 4:⁠4) Olsem na yumi mas strong long laikim yet stretpela pasin long bel olgeta bilong yumi na bihainim, dispela bai givim amamas long yumi. Tasol bilong laikim stretpela pasin long bel olgeta, yumi mas heitim pasin bilong sakim lo. Stadi i kamap bihain long dispela bai stori long dispela samting.

[Futnot]

Bai Yu Bekim Olsem Wanem?

• Bilong laikim stretpela pasin, bilong wanem yumi mas pilim tru wok bilong pe bilong baim bek man?

• Bilong wanem em i bikpela samting long yumi pasim “stretpela pasin olsem siot kapa long bros”?

• Olsem wanem yumi inap skulim maus bilong bel bilong yumi?

[Askim Bilong Stadi]

[Piksa long pes 26]

Maus bilong bel em Baibel i skulim pinis bai helpim yumi long save olsem wanpela wok skin i stret long mekim o nogat