Pasin Bilong Bihainim Tok i Winim Pasin Bilong Ofaim Abus

NAMBA wan king bilong Israel long bipo em Sol. Maski God yet i bin makim Sol, bihain em i bikhet.

Sol i mekim wanem ol pasin i no stret? Yu ting em inap abrusim ol dispela pasin? Pasin em i bin mekim inap skulim yumi olsem wanem?

Jehova i Kamapim Klia King Em i Makim

Paslain long Sol i kamap king, profet Samuel i stap olsem mausman bilong God long Israel. Nau Samuel i lapun, na ol pikinini bilong em ol i no stap gut long God. Na tu, ol birua i laik daunim ol Israel. Taim ol hetman bilong Israel i askim Samuel long makim wanpela king husat inap stap jas bilong ol na go pas long ol long pait, Jehova i tokim dispela profet long makim Sol olsem king bilong ol, em i tok: “Dispela man bai i helpim ol na kisim bek ol long strong bilong ol Filistia.”​—⁠1 Sml. 8:​4-7, 20; 9:⁠16.

Sol em i yangpela man na em i “luk naispela tru.” Na em i gat ol gutpela pasin tu. Em i gat pasin daun. Sol i askim Samuel: “Mi bilong lain Benjamin, na em i liklik lain tasol insait long ol lain bilong yumi Israel. Na lain bilong papa bilong mi i no gat nem namel long ol lain Benjamin. Olsem na bilong wanem yu mekim dispela kain tok long mi?” Maski papa bilong Sol, Kis, em i “gat planti samting na i gat nem namel long ol arapela man,” Sol i no hambak long dispela samting.​—⁠1 Sml. 9:​1, 2, 21.

Tingim tok Sol i mekim taim Samuel i tokaut long ol manmeri long husat Jehova i makim bilong stap king long Israel. Pastaim Samuel i kapsaitim oil long het bilong Sol taim tupela tasol i stap, em i tokim Sol: “God i stap wantaim yu bilong helpim yu . . . Wanem samting yu ting i gutpela bilong helpim ol manmeri, i orait yu ken mekim.” Bihain Samuel i singautim ol manmeri i kam bung na em i tokaut long ol long king em Jehova i makim. Tasol taim Samuel i tokaut olsem Sol em i king, ol i no inap painim Sol. Em i man bilong sem, olsem na em i hait. Jehova i tokaut long hap Sol i hait long en, na Samuel i tokim ol manmeri olsem Sol em i king.​—⁠1 Sml. 10:​7, 20-24.

Long Ples Bilong Pait

Ating sampela i bin i gat tingting olsem Sol i no gat save long mekim dispela wok, tasol i no long taim na em i soim olsem tingting bilong ol i no stret. Taim ol Amon i kam pait long ol Israel long wanpela taun, “spirit bilong God i kamap strong long [Sol].” Sol i singautim olgeta soldia  bilong Israel, tilim ol long tripela lain, na go pas long ol long winim pait. Tasol Sol i tok God i winim pait bilong ol, em i tok: “Long dispela de tasol Bikpela i bin kisim bek yumi Israel long han bilong ol birua.”​—⁠1 Sml. 11:​1-13.

Sol i gat ol gutpela pasin na God i blesim em. Na tu, em i save olsem em inap mekim ol samting long strong bilong Jehova tasol. Tasol sapos ol Israel na king bilong ol i laik bai sindaun bilong ol i gutpela yet, i gat wanpela bikpela samting ol i mas mekim. Samuel i tokim ol: “Sapos yupela wantaim king bilong yupela i stap aninit long God, Bikpela bilong yumi, na sapos yupela i lotuim em na harim tok na bihainim ol lo bilong en na bihainim em oltaim, orait bai God i givim yupela gutpela sindaun tru.” Sapos ol Israel i stap gut long God, ol inap bilip tru long wanem samting? Samuel i tok: “Laik bilong Bikpela tasol na em i bin makim yupela i kamap lain manmeri bilong en. Olsem na em i tingting long biknem na promis bilong en na em i no inap givim baksait long yupela.”​—⁠1 Sml. 12:​14, 22.

Long bipo ol man i mas bihainim tok bilong God bambai em i ken orait long ol, na i wankain long nau tu. Taim ol wokboi bilong Jehova i bihainim tok bilong em, em i save blesim ol. Tasol olsem wanem sapos ol i sakim tok bilong Jehova?

“Pasin Bilong Yu i Kranki Tru”

Nau samting Sol i mekim long ol Filistia i kirapim ol long strong moa long pait. Wanpela lain ami i gat “planti soldia tumas inap olsem wesan bilong nambis” i kam pait long Sol. “Ol Israel i pilim olsem ol i no inap winim pait. Olsem na sampela Israel i go hait long ol hul bilong graun na long ol bikpela hul long ol maunten, na sampela i hait namel long ol bikpela ston na sampela i hait insait long ol hul wara.” (1 Sml. 13:​5, 6) Sol bai mekim wanem?

Samuel i tokim Sol long bungim em long Gilgal we Samuel bai mekim ol ofa. Sol i wet i stap, tasol Samuel i no kam hariap, na ami bilong Sol ol i wok long go nabaut. Olsem na Sol i kirap na mekim ol ofa. Sol i mekim pinis ofa, na nau Samuel i kam kamap. Taim Samuel i harim olsem Sol i bin mekim ofa, em i tokim Sol: “Pasin bilong yu i kranki tru. Yu no bihainim tok God, Bikpela bilong yumi, i bin givim yu. Sapos yu bin bihainim tok bilong em, orait em inap larim yu wantaim ol lain bilong yu i bosim Israel oltaim. Tasol nau yu no inap i stap king longpela taim. Yu no bin bihainim tok bilong Bikpela, olsem na em i painim pinis wanpela gutpela man i save bihainim pasin Bikpela i laikim na em bai i putim dispela man i stap king bilong ol manmeri bilong en.”​—⁠1 Sml. 10:8; 13:​7, 8, 13, 14.

Bilip bilong Sol i sot na em i bikhet na sakim tok bilong God long wetim Samuel i kam mekim ofa. Pasin Sol i mekim i narapela kain tru long pasin Gideon i mekim, bipo Gideon em i komanda bilong ol ami bilong Israel. Jehova i bin tokim Gideon long daunim namba bilong ami bilong en, pastaim ol inap olsem 32,000 na em i mas daunim namba i go 300, na Gideon i bihainim tok. Bilong wanem Gideon i mekim olsem? Long wanem, em i bilip long Jehova. God i helpim em na em i daunim 135,000 soldia long ami bilong Midian. (Het. 7:​1-7, 17-22; 8:10) Na Jehova inap helpim Sol tu. Tasol Sol i sakim tok, olsem na ol Filistia i daunim ol Israel.​—⁠1 Sml. 13:​17, 18.

Taim yumi gat ol hevi, olsem wanem bai yumi makim ol samting yumi mas mekim? Ol man i no gat strongpela bilip, ating ol inap pilim olsem ol stiatok bilong God i no inap helpim ol. Taim Samuel i no bin i stap, ating Sol i ting samting em i mekim, em i savepasin. Ol man i laik bai God i orait long ol, ol i save olsem pasin bilong bihainim ol stiatok bilong Baibel, dispela tasol em i stretpela rot long bihainim.

Jehova i Givim Baksait Long Sol

Taim Sol i mekim pait wantaim ol Amalek, em i mekim narapela bikpela rong. God i tok ol Amalek i gat asua, long wanem, ol i kirapim nating pait long ol Israel taim ol i lusim Isip na i kam. (Kis. 17:8; Lo 25:​17, 18) Na tu, long taim bilong ol Hetman, ol Amalek i bung wantaim ol arapela na pait long lain God i makim. (Het. 3:​12, 13; 6:​1-3, 33) Olsem na Jehova i kotim ol  Amalek na tokim Sol long kilim ol i dai.​—⁠1 Sml. 15:​1-3.

Sol i no bihainim tok bilong Jehova na pinisim ol Amalek na bagarapim olgeta samting bilong ol, nogat. Em i holimpasim king bilong ol, na tu, em i kisim ol gutpela animal bilong ol. Wanem samting i kamap taim Samuel i kamapim asua bilong em? Sol i putim asua i go long ol narapela, em i tok: “Ol soldia bilong mi i bin . . . kilim ol sipsip na bulmakau, tasol ol i kisim ol gutpela gutpela bilong mekim ofa long God, Bikpela bilong yumi.” Yumi no save, Sol i bin tingting long mekim ofa long ol dispela animal o nogat, tasol em i bin sakim tok bilong God. Sol i no ting moa olsem em yet i “samting nating.” Olsem na profet bilong God i tokim em stret olsem em i sakim tok bilong God. Orait Samuel i tok: “Bikpela i laikim wanem pasin? Ating em i laikim olkain ofa tasol, a? O ating em i laikim yumi bihainim tok bilong en? Harim. Pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol. . . . Yu bin givim baksait long tok bilong Bikpela, olsem na em i givim baksait long yu na yu no ken i stap king moa.”​—⁠1 Sml. 15:​15, 17, 22, 23.

Taim Jehova i tekewe holi spirit bilong em long Sol na em i no blesim moa Sol, wanpela “spirit nogut” i kirap bosim namba wan king bilong Israel. Pasin bilong Sol i senis na em i kirap jeles na saspek nating long Devit​—⁠em man bihain Jehova bai givim wok king long em. Planti taim liklik, Sol i traim long kilim i dai Devit. Baibel i tok Sol i save olsem “Bikpela i stap wantaim Devit,” olsem na “Sol i stap birua bilong en oltaim.” Sol i wok long painim Devit, na tu, em i tokim wanpela wokman long kilim i dai 85 pris na sampela narapela man. Yumi no kirap nogut long Jehova i givim baksait long Sol!​—⁠1 Sml. 16:14; 18:​11, 25, 28, 29; 19:​10, 11; 20:​32, 33; 22:​16-19.

Taim ol Filistia i kam pait gen long Israel, Sol i go lukim wanpela glasmeri, tasol dispela i no inap helpim em. De bihain, Sol i kisim bikpela bagarap long pait na em i kilim i dai em yet. (1 Sml. 28:​4-8; 31:​3, 4) Baibel i stori long namba wan king bilong Israel husat i bin sakim tok, olsem: “Sol i dai, long wanem, em i no bihainim tok bilong Bikpela. Nogat. Em i sakim ol lo bilong Bikpela. Na em i askim tewel bilong man i dai pinis long soim em wanem rot em i mas bihainim na em i no askim Bikpela long soim em.”​—⁠1 Sto. 10:​13, 14.

Pasin nogut bilong Sol i kamapim klia olsem pasin bilong bihainim tok bilong Jehova i winim pasin bilong givim ofa long Em. Aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:⁠3) Yumi no ken tru lusim tingting long dispela bikpela tok i tru: Bilong i stap pren bilong God, yumi mas bihainim tok bilong em.

[Piksa long pes 21]

Pastaim Sol em i wanpela king i gat pasin daun

[Piksa long pes 23]

Bilong wanem Samuel i tokim Sol olsem ‘pasin bilong bihainim tok em i namba wan, na ofaim ol gutpela abus em i namba 2 tasol’?