Yu Amamas Tru Long Ol Blesing Yu Kisim?

LONG rot bilong mirakel ol Israel i lusim wok kalabus long Isip. Pastaim ol i amamas long ol i stap fri na ol inap lotuim Jehova. (Kis. 14:29–15:​1, 20, 21) Tasol liklik taim bihain tingting bilong ol i senis. Ol i kirap toktok planti long sindaun bilong ol. Bilong wanem ol i toktok planti? Ol i no tingim moa ol samting Jehova i bin mekim bilong helpim ol, ol i kirap tingting long ol samting i givim hevi long ol long dispela ples wesan nating. Ol i tokim Moses: “Bilong wanem yupela i kisim mipela long Isip na bringim mipela i kam bilong i dai tasol long dispela ples wesan nating? I no gat kaikai long dispela hap, na mipela i les pinis long dispela rabis kaikai [mana].”​—⁠Nam. 21:⁠5.

Planti handet yia bihain, King Devit bilong Israel bilong bipo i singsing olsem: “Mi bilip bai yu marimari long mi oltaim. Na mi amamas long yu bai helpim mi. Yes, bai mi singim song bilong litimapim nem bilong Bikpela. Long wanem, em i bin mekim gut tru long mi.” (Sng. 13:​5, 6) Devit i no lusim tingting long pasin marimari Jehova i bin mekim long em. Planti taim em i tingim tingim dispela samting. (Sng. 103:⁠2) Jehova i mekim ol gutpela samting long yumi tu, olsem na nogut yumi ting ol dispela samting em i samting nating tasol. Orait nau yumi ken tingim sampela blesing God i givim long yumi long nau.

Stap “Pren Tru” Bilong Jehova

Man bilong raitim song i singsing: “God em i pren tru bilong ol manmeri i save stap aninit long em.” (Sng. 25:14) Em i gutpela samting tru long ol sinman inap kamap gutpela pren bilong Jehova! Tasol olsem wanem sapos yumi bisi tumas long ol samting bilong ol wan wan de na isi isi yumi lusim pasin bilong beten? Tingim samting inap kamap long gutpela pasin pren bilong yumi wantaim Jehova. Jehova em i pren bilong yumi, olsem na em i laik bai yumi trastim em na kamapim long beten olgeta tingting i stap long  bel bilong yumi, ol samting yumi pret long en, ol laik, na ol samting yumi wari long en. (Snd. 3:​5, 6; Fili. 4:​6, 7) Olsem na yumi mas tingting long mekim beten bilong yumi i kamap gutpela moa.

Taim yangpela Witnes, nem bilong em Paul, i tingim ol beten bilong em, em i luksave olsem em i mas mekim ol beten bilong em i kamap gutpela moa. a Em i tok: “Mi kisim pasin bilong kolim ol wankain tok long olgeta taim mi beten long Jehova.” Paul i mekim wok painimaut long ol tok i stori long beten long Watch Tower Publications Index, na em i kisim save olsem i gat klostu 180 beten i stap long Baibel. Long ol dispela beten ol wokboi bilong Jehova bilong bipo i kamapim tingting i stap long bel bilong ol. Paul i tok: “Mi tingim tingim long bel ol beten i stap long Baibel, na mi lain long kamapim stret tingting bilong mi taim mi beten. Dispela i helpim mi long kamapim long Jehova olgeta tingting i stap long bel bilong mi. Nau mi amamas long i go klostu long em long rot bilong beten.”

‘Kaikai Long Taim Stret’

Narapela blesing Jehova i givim long yumi em ol tok i tru bilong Baibel. Yumi gat planti kaikai bilong spirit, olsem na i gat as tru na ‘bel bilong yumi i pulap long amamas na yumi singim ol song bilong amamas.’ (Ais. 65:​13, 14) Tasol yumi mas was gut long ol samting nogut em inap pulim yumi na yumi no amamas moa long tok i tru. Olsem: Tok bilong ol apostet inap paulim tingting bilong yumi na yumi no luksave moa olsem ol kaikai bilong spirit em Jehova i givim long “taim stret” long rot bilong “gutpela wokboi,” dispela i bikpela samting.​—⁠Mat. 24:​45-47.

Inap planti yia André i mekim wok bilong Jehova, tasol em i karim hevi taim em i larim tingting bilong ol apostet i pulim em. Em i ting olsem sapos em i lukluk liklik tasol long wanpela Web-sait bilong ol apostet, dispela i no inap bagarapim em. Em i tok: “Pastaim, mi laik kisim save long ol tok bilong ol apostet em ol yet i kolim olsem tok i tru. Mi wok long skelim ol tok bilong ol na isi isi mi kisim tingting olsem i stret mi lusim oganaisesen bilong Jehova. Tasol bihain, taim mi mekim wok painimaut long ol tok ol apostet i mekim long ol Witnes Bilong Jehova, mi luksave long pasin trik bilong ol dispela tisa giaman. Ol i kisim ol hap hap tok long ol bikpela tok bilong ol Witnes Bilong Jehova, na ol i yusim ol dispela hap tok bilong sutim tok long yumi. Olsem na mi kirap gen long ritim ol buk na nius bilong yumi na go long ol miting. I no longtaim na mi luksave olsem mi bin lusim planti gutpela samting.” Gutpela tru André i kam bek long kongrigesen.

“Olgeta Wanbilip”

Yumi insait long wanpela bikpela lain brata i stap wanbel na narapela i laikim narapela, dispela i wanpela blesing bilong Jehova. (Sng. 133:⁠1) I gat gutpela as na aposel Pita i tok: “Yupela i mas . . . laikim tru olgeta wanbilip bilong yupela.” (1 Pita 2:17) Yumi insait long bikpela lain brata Kristen, olsem na yumi amamas long kisim gutpela helpim long ol wanbilip i stap olsem papa, mama, brata, na susa bilong yumi.​—⁠Mak 10:​29, 30.

 Tasol kain kain samting inap mekim na sampela taim i hatwok long yumi pas gut wantaim ol bratasista bilong yumi. Em i isi long pasin kranki bilong narapela i skrapim bel bilong yumi na nau yumi gat tingting nogut long em. Sapos kain samting olsem i kamap, i gutpela long tingim olsem Jehova i save laikim ol wokboi bilong em, maski ol i gat pasin kranki. Na tu, “sapos yumi tok: ‘Yumi no gat sin,’ orait yumi giamanim yumi yet na tok i tru i no stap long yumi.” (1 Jon 1:⁠8) Yumi mas ‘wok yet long karim hevi narapela i putim long yumi na amamas long fogivim narapela.’​—⁠Kol. 3:⁠13.

Wanpela yangpela nem bilong em Ann, em i bin kisim hevi long pasin em i mekim na dispela i lainim em olsem pasin bilong bung wantaim ol wanbilip Kristen em i bikpela samting. Em i mekim pasin olsem bilong dispela pikinini i lusim papa long tok piksa bilong Jisas, na isi isi em i lusim kongrigesen Kristen. Bihain em i kisim bek stretpela tingting na kam bek long tok i tru. (Luk 15:​11-24) Ann i kisim wanem skul long samting i bin painim em? Em i tok: “Mi kam bek pinis long oganaisesen bilong Jehova na mi tingim olgeta brata na sista bilong mi ol i gutpela samting, maski ol i gat ol pasin kranki. Bipo mi save kirap kwik long toktok planti long samting ol i mekim. Tasol nau mi wok strong long no ken larim wanpela samting i tekewe ol blesing mi save amamas long en namel long ol wanbilip. I no gat wanpela samting bilong dispela graun i gutpela tru inap long kirapim mi long lusim paradais bilong spirit yumi stap long en.”

Amamas Oltaim Long Ol Blesing Bilong Yu

Yumi bilip olsem Kingdom Bilong God em rot bilong stretim bek olgeta hevi bilong ol man, na dispela samting yumi wet long en em i nambawan gutpela samting tru. Namba wan taim yumi kisim save long dispela samting, bel bilong yumi i pilim tru! Yumi bin pilim wankain olsem bisnisman long tok piksa bilong Jisas, em i “salim olgeta samting bilong en” bilong baim “wanpela bis i dia tumas.” (Mat. 13:​45, 46) Jisas i no tok olsem bihain dispela bisnisman i les long dispela bis, nogat. Na olsem tasol yumi no ken lusim amamas bilong yumi long dispela gutpela samting yumi wet long en.​—⁠1 Tes. 5:8; Hib. 6:⁠19.

Tingim Jean, em i bin mekim wok bilong Jehova winim 60 yia. Em i tok: “Samting i bin helpim mi long tingting oltaim long Kingdom Bilong God, em pasin bilong toktok wantaim ol narapela long en. Taim mi lukim pes bilong ol i lait taim ol kisim save long Kingdom em i wanem samting, dispela i mekim mi amamas. Taim mi lukim olsem tok i tru bilong Kingdom i helpim ol Baibel sumatin, dispela i kirapim mi long tingting olsem, ‘Man! Mi gat ol gutpela tok tru bilong tokim ol narapela long en!’ ”

I gat gutpela as na yumi ken amamas long ol planti blesing yumi kisim. Maski yumi gat ol hevi olsem ol man i birua long yumi, sik, lapun, bel hevi, wanpela long famili i dai, na hevi bilong mani, yumi save ol dispela hevi i bilong sotpela taim tasol. Aninit long Kingdom Bilong God bai yumi kisim sampela blesing moa. Ol pen na hevi yumi karim long nau em bai pinis long nupela taim i kamap bihain.​—⁠Rev. 21:⁠4.

Tasol long nau yet yumi mas amamas long ol blesing yumi kisim pinis, na kamapim olsem yumi pilim wankain olsem man bilong raitim song, em i singsing olsem: “God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru. Sapos mi autim tok long ol man na tokim ol long wok na tingting bilong yu, olaman! Dispela i moa moa yet! Mi no inap kaunim ol samting yu bin mekim bilong helpim mipela.”​—⁠Sng. 40:⁠5.

[Futnot]

[Piksa long pes 18]

Yumi gat ol gutpela helpim long taim bilong hevi, dispela i wanpela blesing