Yu Save Heitim Pasin Bilong Sakim Lo?
Yu Save Heitim Pasin Bilong Sakim Lo?
“Yu [Jisas] bin heitim tru pasin bilong sakim lo.”—HIB. 1:9.
1. Jisas i tok wanem long pasin laikim?
BILONG kamapim olsem pasin laikim em i bikpela samting, Jisas Krais i tokim ol disaipel bilong em: “Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela. Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:34, 35) Jisas i tokim ol disaipel bilong em long daunim sampela laik bilong ol yet na laikim ol narapela. Dispela pasin laikim bai stap olsem mak i kamapim klia olsem ol i disaipel tru bilong em. Na tu, Jisas i tokim ol: “Yupela i mas laikim yet ol birua bilong yupela na beten long ol man i save mekim nogut long yupela.”—Mat. 5:44.
2. Ol man i laik bihainim Krais i mas kisim pasin bilong heitim wanem samting?
2 Jisas i skulim ol disaipel bilong em long pasin laikim, na em i skulim ol tu long wanem ol samting ol i mas heitim. Baibel i tok long Jisas olsem: “Yu bin laikim tru stretpela pasin, na yu bin heitim tru pasin bilong sakim lo [pasin nogut].” (Hib. 1:9; Sng. 45:7) Dispela i soim olsem yumi mas kisim pasin bilong laikim stretpela pasin, na tu, yumi mas no laik tru long sin, o pasin bilong sakim lo. Aposel Jon i tokaut stret olsem: “Olgeta man husat i wokabaut long pasin bilong sin, ol i wokabaut tu long pasin bilong brukim lo, olsem na sin em i pasin bilong brukim lo.”—1 Jon 3:4.
3. Dispela stadi bai skelim wanem 4-pela hap bilong laip we yumi mas heitim pasin bilong sakim lo?
3 Yumi ol Kristen, olsem na i gutpela long askim yumi yet olsem, ‘Mi save heitim pasin bilong sakim lo?’ Yumi ken skelim 4-pela hap bilong laip we yumi ken kamapim klia olsem yumi heitim pasin nogut: (1) tingting bilong yumi long dring planti tumas, (2) tingting bilong yumi long wok bilong ol spirit nogut, (3) tingting bilong yumi long pasin pamuk, na (4) tingting bilong yumi long ol man i laikim pasin bilong sakim lo.
No Ken Kamap Wokboi Bilong Alkohol
4. Bilong wanem Jisas inap tokaut stret taim em i mekim tok lukaut long pasin bilong dring planti tumas?
4 Sampela taim Jisas i bin dring wain, em i save olsem em presen God i givim. (Sng. 104:14, 15) Tasol i no gat wanpela taim em i mekim nabaut long dispela presen na dring planti tumas. (Snd. 23:29-33) Olsem na Jisas inap tokaut stret taim em i tokim ol man long ol i no ken dring planti tumas. (Ritim Luk 21:34.) Pasin bilong dring planti tumas inap mekim na man i pundaun long ol arapela bikpela rong. Olsem na aposel Pol i tok: “Yupela i no ken dring planti wain na spak, dispela i save kamapim kain kain pasin nogut. Yupela i mas wok yet long larim holi spirit i pulap long yupela.” (Efe. 5:18) Na tu, em i tokim ol meri long kongrigesen husat i gat bikpela krismas long ol i no ken “kalabus long pasin bilong dring planti wain.”—Tai. 2:3.
5. Ol lain i save dring alkohol ol i ken givim wanem ol askim long ol yet?
5 Sapos yu laik dring alkohol, i gutpela long askim yu yet: ‘Mi gat wankain tingting olsem Jisas long pasin bilong dring planti? Sapos mi mas givim sampela tok long ol narapela long dispela pasin, mi stap fri long tokaut long dispela samting? Mi save dring alkohol bambai mi no ken tingim ol hevi bilong mi o mi no ken tingting planti? Mi save dring hamas alkohol long ol wan wan wik? Mi mekim wanem taim wanpela i tok, i luk olsem mi save dring planti tumas? Mi save bel kaskas o belhat long tok bilong em?’ Sapos yumi kalabus long dring planti alkohol, dispela inap mekim na yumi no wokim gut tingting na mekim ol gutpela disisen. Ol manmeri i bihainim Krais ol i wok strong long lukautim gut gutpela tingting na save bilong ol.—Snd. 3:21, 22.
Sakim Wok Bilong Ol Spirit Nogut
6, 7. (a) Jisas i mekim wanem long Satan na ol spirit nogut? (b) Bilong wanem wok bilong ol spirit nogut i go bikpela long nau?
6 Taim Jisas i stap long graun, em i strong tru long sakim Satan na ol spirit nogut. Em i bin sakim Satan taim Satan i traim pasin bilong em long stap gut long God. (Luk 4:1-13) Na tu, Jisas inap luksave na sakim ol samting Satan i mekim long pasin hait bilong stiaim tingting bilong em na ol samting em i laik mekim. (Mat. 16:21-23) Jisas i bin helpim ol gutpela man em ol spirit nogut i bosim ol.—Mak 5:2, 8, 12-15; 9:20, 25-27.
7 Bihain long Jisas i kamap King long 1914, em i rausim Satan na ol spirit nogut long heven. Olsem na long nau—winim olgeta taim bipo—Satan i strong tru long “giamanim olgeta manmeri bilong graun.” (Rev. 12:9, 10) Dispela i as na yumi no kirap nogut olsem wok bilong ol spirit nogut i kirapim tru tingting bilong planti manmeri moa long olgeta hap. Yumi inap mekim wanem bilong banisim yumi yet long dispela samting?
8. I gutpela yumi skelim wanem ol askim long ol samting yumi laik mekim bilong kisim amamas?
8 Baibel i mekim tok lukaut long ol samting nogut inap kamap taim man i mekim wok bilong ol spirit nogut. (Ritim Lo 18:10-12.) Long nau Satan na ol spirit nogut i stiaim tingting bilong ol man long rot bilong ol muvi, ol buk, na ol kompiuta gem em wok bilong ol spirit nogut i insait long en. Olsem na taim yumi mekim sampela samting bilong amamas tasol, yumi wan wan i mas askim yumi yet: ‘Insait long ol mun i go pinis, mi bin lukim sampela muvi, o pilaim kompiuta gen, o ritim ol buk samting em wok bilong ol spirit nogut i insait long en? Mi kliagut olsem em i bikpela samting long sakim ol samting em ol spirit nogut i as bilong en, o mi ting dispela i no inap bagarapim mi? Mi save tingim tu olsem Jehova bai pilim olsem wanem long samting mi makim bilong kisim amamas long en? Sapos mi bin opim rot long ol spirit nogut i stiaim tingting bilong mi, pasin bilong laikim Jehova na ol stretpela stiatok bilong em bai kirapim mi long kirap hariap long pasim dispela rot?’—Apo. 19:19, 20.
Bihainim Tok Bilong Jisas Long Sakim Pasin Pamuk
9. Man i mekim wanem na em i strongim dispela laik bilong sakim lo?
9 Jisas i bin bihainim lo bilong Jehova i tambuim pasin pamuk. Em i tok: “Ating yupela i no ritim tok olsem man husat i bin wokim ol long pastaim tru, em i bin wokim ol i kamap man na meri? Na ating yupela i no bin ritim tok bilong em olsem: ‘Long dispela as man bai lusim papa na mama bilong en na pas wantaim meri bilong en, na tupela bai kamap wanpela bodi’? Tupela i no stap olsem tupela moa, ol i kamap wanpela bodi tasol. Olsem na samting God i pasim pinis, man i no ken katim.” (Mat. 19:4-6) Jisas i save olsem samting yumi lukim long ai, em inap mekim sampela samting long bel bilong yumi. Long Bikpela Tok Long Maunten, em i tok: “Yupela i harim pinis dispela tok: ‘Yu no ken mekim pasin adaltri.’ Tasol mi tokim yupela olsem man husat i wok long lukluk long wanpela meri na aigris long em, long bel em i mekim pinis pasin adaltri.” (Mat. 5:27, 28) Ol man husat i sakim tok lukaut bilong Jisas, ol i strongim dispela laik bilong sakim lo.
10. Stori long wanpela ekspiriens i soim olsem man inap long lusim dispela pasin bilong lukim ponografi.
10 Satan i kirapim laik bilong mekim pasin pamuk long rot bilong ponografi. Long nau dispela pasin i bikpela tru. Ol man husat i lukim ponografi ol i hatwok tru long rausim long tingting ol piksa nogut ol i bin lukim. Ol inap kalabus long lukim ponografi. Tingim samting i bin painim wanpela Kristen. Em i tok: “Mi bin hait na lukim ponografi. Mi pilim olsem em samting bilong mi yet, na wok bilong Jehova mi mekim em narapela samting. Mi save olsem pasin mi mekim i no stret, tasol mi tok long mi yet olsem God i orait yet long wok bilong em mi mekim.” Wanem samting i mekim na brata i senisim tingting? Em i tok: “Maski i hatwok tru long mekim, mi bin go tokim ol elda long hevi bilong mi.” Bihain dispela brata i bin lusim dispela pasin nogut. Em i tok: “Taim mi lusim pinis dispela sin, nau mi pilim olsem maus bilong bel bilong mi i stap klin.” Ol man husat i heitim pasin bilong sakim lo, ol i mas lain long heitim ponografi.
11, 12. Long sait bilong musik, olsem wanem yumi ken soim olsem yumi heitim pasin bilong sakim lo?
11 Musik na ol tok bilong en i gat bikpela strong inap long stiaim tingting na bel bilong yumi. Musik em presen i kam long God, na kirap long bipo yet em i gat wok bilong en insait long lotu i tru. (Kis. 15:20, 21; Efe. 5:19) Tasol ol man bilong dispela graun bilong Satan, ol i kamapim ol musik i litimapim pasin pamuk. (1 Jon 5:19) Olsem wanem yu inap save olsem musik yu harim i mekim yu i kamap doti o nogat?
12 Pastaim yu ken askim yu yet: ‘Ol singsing mi harim ol i litimapim pasin bilong kilim man i dai, pasin adaltri, pasin pamuk, na tok nogut? Sapos mi ritim ol tok bilong sampela singsing mi laikim long wanpela man, em bai kisim tingting olsem mi heitim pasin bilong sakim lo, o em bai ting olsem bel na tingting bilong mi i doti pinis?’ Yumi no ken tok olsem yumi heitim pasin bilong sakim lo, na long wankain taim yumi putim yau long ol singsing i litimapim dispela pasin. Jisas i tok: “Ol samting i kamaut long maus i save kam long tingting bilong bel, na ol dispela samting i save mekim man i kamap doti. Olsem, ol samting i kam long tingting bilong bel em ol tingting nogut, pasin bilong kilim man i dai, pasin adaltri, pasin pamuk, stil, giaman, na tok nogut.”—Mat. 15:18, 19; skelim Jems 3:10, 11.
Kisim Tingting Bilong Jisas
13. Jisas i gat wanem tingting long ol man i strong long bihainim pasin bilong sin?
13 Jisas i tok em i kam bilong kirapim ol sinman, o ol man bilong sakim lo, long tanim bel. (Luk 5:30-32) Tasol em i gat wanem tingting long ol man i strong long bihainim pasin bilong sin? Jisas i givim strongpela tok lukaut long yumi no ken larim ol kain man olsem i pulim yumi. (Mat. 23:15, 23-26) Na tu, em i tok: “I no olgeta man husat i kolim mi, ‘Bikpela, Bikpela,’ bai i go insait long Kingdom bilong heven, nogat. Man i bihainim laik bilong Papa bilong mi long heven, em tasol bai i go insait. Long dispela de [taim bilong God i givim strafe] planti bai tokim mi: ‘Bikpela, Bikpela, mipela i bin mekim tok profet long nem bilong yu, na rausim ol spirit nogut long nem bilong yu, na mekim ol strongpela wok long nem bilong yu.’ ” Tasol em bai givim baksait long ol man bilong sakim lo em ol i no tanim bel, em bai tokim ol: “Yupela klia long mi.” (Mat. 7:21-23) Bilong wanem ol bai kisim dispela strafe? Long wanem, ol kain man olsem i daunim nem bilong God na bagarapim ol narapela long ol pasin bilong ol long sakim lo.
14. I gat wanem as na kongrigesen i mas rausim man i mekim sin na i no tanim bel?
14 Baibel i tok olsem man i mekim sin na i no tanim bel, kongrigesen i mas rausim em. (Ritim 1 Korin 5:9-13.) I gat tripela as na kongrigesen i mas mekim olsem: (1) bai ol man i no ken tok bilas long nem bilong Jehova, (2) bilong helpim kongrigesen long i stap klin, na (3) bilong helpim sinman long tanim bel.
15. Bilong stap gut long Jehova, i gat wanem ol bikpela askim yumi mas givim long yumi yet?
15 Yumi gat wankain tingting olsem Jisas long ol man i strong long bihainim pasin bilong sakim lo? Yumi mas tingim ol dispela askim: ‘Long laik bilong mi yet, mi save poroman wantaim wanpela husat i raus long kongrigesen o em i bin rausim em yet long kongrigesen Kristen? Olsem wanem sapos man i raus em wanpela wanblut husat i no stap moa long haus wantaim famili?’ Dispela samting inap traim tru pasin bilong yumi long laikim stretpela pasin na stap gut long God. a
16, 17. Wanem samting i bin givim hatwok long wanpela mama Kristen? Wanem samting i helpim em long bihainim tok bilong Jehova long pasin bilong rausim man i bin mekim rong na i no tanim bel?
16 Tingim ekspiriens bilong wanpela sista, pastaim bikpela pikinini man bilong em i bin laikim Jehova. Tasol bihain, pikinini i kirap bihainim pasin bilong sakim lo na em i no tanim bel. Olsem na kongrigesen i rausim em. Sista bilong yumi i laikim Jehova, tasol em i laikim tu pikinini bilong em na em i pilim hatwok tru long bihainim ol tok bilong Baibel long no ken poroman wantaim dispela pikinini.
17 Bai yu givim wanem gutpela stiatok long dispela sista? Wanpela elda i bin helpim em long save olsem Jehova i pilim bel hevi bilong em. Brata i kirapim em long tingim pen Jehova i bin pilim taim sampela pikinini bilong em, ol ensel, i bin bikhet. Elda i helpim em long kliagut olsem, maski Jehova i save dispela samting i save kamapim bikpela pen, em i tok ol sinman i no tanim bel, kongrigesen i mas rausim ol. Sista i pilim dispela tok na stap gut long Jehova na bihainim ol tok bilong em long pasin i stret long mekim long man i raus. b Kain pasin olsem bilong stap gut long Jehova, dispela i mekim em i belgut.—Snd. 27:11.
18, 19. (a) Taim yumi no poroman moa wantaim man bilong sakim lo, dispela i kamapim klia yumi no laik tru long wanem samting? (b) Wanem samting inap kamap taim yumi stap gut long God na bihainim tok bilong em long pasin bilong rausim man?
18 Sapos kain hevi olsem i painim yu, plis tingim olsem Jehova i pilim hevi bilong yu. Taim yu no poroman moa wantaim man em kongrigesen i rausim o em i rausim em yet, yu soim olsem yu no laik tru long tingting na pasin man i mekim na em i raus. Tasol yu soim tu olsem yu laikim dispela man o meri i mekim rong na yu laik helpim em. Pasin bilong yu long stap gut long Jehova inap kirapim man o meri i kisim dispela kain skul bilong stretim em, long tanim bel na kam bek long Jehova.
19 Wanpela meri husat i bin raus na bihain kongrigesen i kisim bek em, em i tok: “Mi amamas olsem Jehova i laikim ol manmeri bilong em na em i stretim rot na bai oganaisesen bilong em i ken i stap klin. Ating long ol man i no wanbilip, pasin bilong rausim man i olsem hatpela pasin, tasol em samting kongrigesen i mas mekim na i kamapim pasin laikim.” Yu ting dispela meri inap kisim dispela tingting sapos ol bratasista long kongrigesen, na famili bilong em, i bin poroman na toktok wantaim em taim em i bin raus long kongrigesen? Taim yumi bihainim tok bilong Baibel long pasin bilong rausim man, dispela i kamapim klia yumi laikim stretpela pasin na yumi save olsem Jehova i gat rait long kamapim ol lo em ol man i mas bihainim.
‘No Laikim Pasin Nogut’
20, 21. Bilong wanem em i bikpela samting long lain long heitim pasin bilong sakim lo?
20 Pita i tok: “Yupela i mas holimpas gutpela tingting na was i stap.” Bilong wanem em i tok olsem? Long wanem “Satan, dispela birua bilong yupela, em i raun olsem wanpela laion i singaut strong na i painim ol man bilong kaikai.” (1 Pita 5:8) Yu bai kamap olsem man laion i kisim? Bilong sakim dispela laion, em i bikpela samting long yu mas lain long heitim pasin bilong sakim lo.
21 I hatwok long kisim pasin bilong heitim pasin nogut. Yumi gat sin pinis taim mama i karim yumi, na yumi stap namel long ol manmeri bilong graun em ol i save kirapim yumi long bihainim ol laik nogut bilong bel. (1 Jon 2:15-17) Taim yumi bihainim pasin bilong Krais Jisas na kisim pasin bilong laikim tru God Jehova, yumi inap tru long heitim pasin bilong sakim lo. Yumi mas strong long ‘no laikim pasin nogut,’ na yumi bilip tru olsem Jehova “i save lukautim gut ol manmeri bilong en na kisim bek ol long han bilong ol man nogut.”—Sng. 97:10.
[Ol Futnot]
a Bilong kisim sampela save moa long dispela, lukim Wastaua, Februeri 1, 1982, pes 18-23.
b Lukim tu Wastaua, Janueri 15, 2007, pes 17-20.
Bai Yu Bekim Olsem Wanem?
• Wanem samting bai helpim yumi long skelim tingting bilong yumi long alkohol?
• Yumi ken mekim wanem bilong banisim yumi yet long ol wok bilong ol spirit nogut?
• Olsem wanem ponografi inap kamapim bikpela hevi?
• Taim kongrigesen i rausim wanpela em yumi laikim tumas, olsem wanem yumi ken soim olsem yumi heitim pasin bilong sakim lo?
[Askim Bilong Stadi]
[Piksa long pes 29]
Sapos yu laik dring alkohol, yu mas tingim wanem samting?
[Piksa long pes 30]
Lukaut long pasin bilong Satan long stiaim tingting bilong yumi
[Piksa long pes 31]
Man i lukim ponografi em i strongim pasin bilong laikim wanem samting?
