Askim

Olsem wanem? Taim Jisas Krais i salim 12-pela aposel i go autim tok, em i bin tokim ol long karim stik wokabaut na pasim sendol?

Sampela man i tok, 3-pela stori bilong Gutnius i tok long Jisas i salim ol disaipel i go autim tok, ol dispela stori i pait wantaim. Tasol sapos yumi skelim gut dispela 3-pela stori, tingting bilong yumi bai i klia. Pastaim yumi ken skelim ol tok Mak na Luk i raitim. Stori bilong Mak i tok: “[Jisas] i tokim ol long ol i no ken karim ol samting i go wantaim ol, olsem bret, beg kaikai, na paus mani, nogat, ol i ken karim stik wokabaut tasol. Ol i ken putim sendol, na ol i no ken werim tupela siot.” (Mak 6:​7-9) Stori bilong Luk i tok: “No ken karim ol samting i go wantaim yupela, no ken karim stik wokabaut o beg kaikai o bret o silva mani, na no ken kisim tupela siot.” (Luk 9:​1-3) I luk olsem dispela tupela tok i pait wantaim. Stori bilong Mak i tok, Jisas i tokim ol aposel long karim stik wokabaut na pasim sendol, tasol stori bilong Luk i tok ol i no ken karim wanpela samting, na stik wokabaut tu, nogat. Mak i toktok long sendol, tasol Luk i no toktok long en.

Bilong kliagut long tingting Jisas i laik kamapim long dispela taim, yumi ken tingim wanpela tok i stap long 3-pela Gutnius wantaim. Long ol dispela stori yumi kamapim pinis, na long stori i stap long Matyu 10:​5-10, Jisas i tokim ol aposel long ol i no ken werim o karim “tupela siot.” Yumi ken ting ol wan wan aposel i bin werim wanpela siot tasol. Olsem na ol i no ken kisim narapela bilong karim i go wantaim ol. Na ol i bin pasim sendol. Stori bilong Mak i tok ol i mas “putim sendol,” em sendol ol i putim pinis long lek na ol i wokabaut. Na olsem wanem long stik wokabaut? Wanpela buk (The Jewish Encyclopedia) i tok: “I luk olsem, em pasin bilong ol Hibru bilong bipo long karim stik wokabaut.” (Stt. 32:10) Mak i tok long ol aposel i “no ken karim ol samting i go wantaim ol”​—⁠ol i ken holim stik wokabaut tasol, em samting ol i holim pinis taim Jisas i bin givim dispela tok long ol. Olsem na ol man bilong raitim Gutnius ol i kamapim klia tok bilong Jisas long ol i no ken hatwok long kisim sampela samting moa bilong karim i go wantaim ol.

Matyu tu i bin kamapim klia dispela samting; em i bin harim tok bilong Jisas long dispela taim na em i raitim long Gutnius. Jisas i tok: “Yupela i no ken kisim ol koin olsem gol o silva o kopa bilong putim long paus mani bilong yupela. Na yupela i no ken kisim beg kaikai, o tupela siot, o sendol, o stik wokabaut i go wantaim yupela. Long wanem, man i mekim wok, i stret em i ken kisim kaikai.” (Mat. 10:​9, 10) Olsem wanem long sendol ol aposel i bin werim na stik wokabaut i stap long han bilong ol? Jisas i no tokim ol long tromoi ol dispela samting ol i holim pinis, nogat, em i tokim ol long ol i no ken i go kisim ol sendol na stik wokabaut. Bilong wanem em i bin givim dispela tok long ol? Long wanem, “man i mekim wok, i stret em i ken kisim kaikai.” Em poin bilong tok bilong Jisas na i stret wantaim Bikpela Tok Long Maunten em i bin mekim, we em i tok ol i no ken tingting planti long ol bai kaikai o dring o werim wanem samting.​—⁠Mat. 6:​25-32.

Tru, taim yumi ritim namba wan taim dispela tok bilong Jisas i stap long ol Gutnius, ating i luk olsem ol tok i pait wantaim, tasol ol i toktok long wankain samting tasol. Ol aposel i mas i go wantaim ol klos samting ol i holim pinis, na ol i no ken wok long kisim sampela samting moa na dispela bai pulim nabaut tingting bilong ol. Bilong wanem ol i no ken mekim olsem? Long wanem, Jehova yet bai lukautim ol long ol samting.

 Husat dispela “meri, na ol meri” Solomon i toktok long en?​—⁠Sav. 2:​8, NW.

Yumi no save tru, tasol wanpela tingting i olsem, em ol meri i gat nem, na Solomon i bin bungim ol long haus king bilong em.

Long Saveman sapta 2, Solomon i stori long planti samting em i bin mekim, wanpela em wok bilong wokim planti bikpela haus samting. Na em i tok: “Mi bin kisim planti silva na gol long ol provins bilong mi na long ol king bilong ol arapela kantri. Mi bungim sampela lain man na meri bilong singim ol song na mekim mi amamas. Na mi kisim [“meri, na ol meri,” NW ] . . . bilong mekim bel bilong mi i amamas tru.”​—⁠Sav. 2:⁠8.

Planti man bilong skelim tok bilong Baibel, ol i ting dispela “ol meri” Solomon i toktok long en, em ol planti meri bilong em bilong ol narapela kantri na ol namba 2 lain meri, em i bin kisim long taim em i lapun na ol i bin pulim em long lotuim ol giaman god. (1 Kin. 11:​1-4) Tasol i gat sampela samting long dispela tingting i no stret tumas. Taim Solomon i bin raitim dispela tok, em i save pinis long dispela “meri, na ol meri.” Na long dispela taim Jehova i orait yet long em, long wanem, spirit bilong Jehova i wok long kirapim em long raitim sampela buk bilong Baibel. Dispela i no inap kamap long em long taim em i lapun, long wanem, em i gat planti handet meri bilong ol narapela kantri na ol namba tu lain meri, na em i kirap lotuim ol giaman god.

Long Buk Saveman, Solomon i tok em i wok long “painim tok i swit long yau bilong ol man, na em i raitim gut ol dispela trupela tok.” (Sav. 12:10) Olsem na em i save long ol tok Hibru i makim ol dispela tok “meri bilong yu,” “kwin,” na “namba 2 lain meri,” long wanem, em i bin yusim ol dispela tok long ol rait bilong em, em spirit bilong God i bin kirapim em long raitim. (Snd. 5:18; 12:4; 18:22; Sav. 9:9; Sol. 6:​8, 9) Tasol long Saveman 2:⁠8, Solomon i no yusim ol dispela kain tok.

Dispela tok “meri, na ol meri,” em wanpela taim tasol we Baibel i kamapim narapela kain tok Hibru (wanpela na planti). Ol saveman i tok ol i no save gut long mining bilong en. Planti man bilong tanim Baibel ol i ting, dispela tok long Saveman 2:8 i makim ol meri, ol i raitim olsem wanpela na planti. Dispela tok ol i tanim olsem “meri, na ol meri” i kamapim kain tingting olsem.

Solomon i gat nem tru long planti hap, olsem na wanpela kwin bilong kantri Seba i bin harim sampela tok long em na kwin i go lukim em na i kirap nogut long em. (1 Kin. 10:​1, 2) Em nau, dispela inap makim wanpela mining bilong dispela tok “meri, na ol meri,” em Solomon i mekim. Ating Solomon i toktok long ol meri i gat nem, em i bin bungim ol long haus king bilong em insait long planti yia taim God i bin orait yet long em.