I Gat As Tru na Yu Ken Amamas

OL LIKLIK sel bilong ol samting i gat laip na ol traipela galaksi, i soim olsem ol samting God i bin wokim i stap stret na i wok gut. Yumi no kirap nogut long dispela, long wanem, Man Bilong Wokim ol dispela samting “em i no save mekim ol samting i paul nabaut.” (1 Kor. 14:33) Rot God i stretim bilong lotu long em, dispela tu i nambawan tru. Tingim ol samting Jehova i bin mekim. Em i kamapim wanpela oganaisesen i gat planti milion manmeri na ol ensel insait long en, em ol i stap fri long makim ol samting ol i laik mekim na ol i wanbel long mekim lotu i tru. Man! Em narakain samting tru!

Long Israel long bipo, Jerusalem i makim oganaisesen bilong Jehova long graun, em ples we tempel bilong Jehova i stap na king em i makim. Wanpela man Israel i kalabus long Babilon i kamapim tingting bilong em long dispela taun holi. Em i tok: “Jerusalem, sapos mi lusim tingting long yu na sapos mi no makim yu i stap nambawan samting mi save amamas long en, orait mobeta nek bilong mi i bagarap na bai mi no inap mekim song gen.”​—⁠Sng. 137:⁠6.

Yu gat wankain tingting long oganaisesen bilong God long nau? Em i givim bikpela amamas long yu, winim ol narapela samting? Ol pikinini bilong yu ol i kliagut long wok oganaisesen bilong God long graun i mekim long bipo na long nau? Ol i pilim tru olsem ol i hap bilong lain brata bilong ol Witnes Bilong Jehova i stap long olgeta hap bilong graun? (1 Pita 2:17) Gutpela sapos yupela i bihainim ol dispela tok hia long taim yupela i mekim Famili Lotu, dispela bai helpim famili long amamas moa yet long oganaisesen bilong Jehova.

Stori Long Taim Bipo

Long olgeta yia, ol famili Israel i save bung bilong mekim Pasova. Namba wan taim ol i mekim dispela bung, Moses i tokim ol: “Bihain sapos ol pikinini man bilong yupela i askim yupela olsem, ‘Wanem as bilong dispela pasin?’ Yupela i mas tokim ol olsem, ‘Mipela i bin mekim wok kalabus long Isip, na Bikpela i bin mekim strongpela wok tru bilong kisim mipela long Isip na bringim mipela i kam.’ ” (Kis. 13:14) Ol man i no ken lusim tingting long ol samting Jehova i bin mekim bipo long lain Israel. Tru tumas, planti papa bilong lain Israel i bihainim dispela tok bilong Moses. Planti yia bihain, wanpela man Israel i beten olsem: “God, ol tumbuna bilong mipela i bin stori long mipela long ol strongpela wok yu bin mekim longtaim bipo, taim ol i stap yet long graun. Na mipela yet i harim pinis dispela stori.”​—⁠Sng. 44:⁠1.

Ol yangpela long nau inap ting, wok bilong ol Witnes Bilong Jehova insait long 100 yia i go pinis, em samting bilong “longtaim bipo.” Yu ken mekim wanem bilong kirapim ol pikinini bilong yu long amamas long kisim save long dispela samting? Bilong mekim olsem, sampela papamama i yusim buk Jehovah’s Witnesses​—Proclaimers of God’s Kingdom, Yearbook, ol laip stori i stap long ol nius bilong yumi, na ol narapela stori long ol wok i bin kamap long oganaisesen long bipo. Na tu, ol nupela DVD i stori long lain bilong God long nau. Ol vidio i stori long pasin birua ol man i bin mekim long ol brata bilong yumi long Soviet Yunion bilong bipo na long Jemani long taim bilong ol Natsi, ol i skulim ol famili long bilip long Jehova long taim bilong ol hevi. Skelim ol kain stori olsem long taim bilong Famili Lotu. Dispela bai strongim bilip bilong ol pikinini sapos ol samting bilong traim bilip bilong ol i kamap.

Tasol ol pikinini inap les hariap long harim stori long ol samting bilong bipo. Olsem na helpim ol pikinini long insait long dispela. Olsem: Askim pikinini long makim wanem kantri em i laik kisim save long en, na mekim wok  painimaut long ol wok tiokratik i kamap long dispela kantri, na bihain em i ken stori long famili long save em i bin kisim. Ating long kongrigesen bilong yupela i gat sampela Kristen i stap gut long wok bilong Jehova inap longpela taim, em ol i ken insait long famili lotu bilong yupela long wanpela taim. Narapela pikinini i ken inteviuim ol na kirapim ol long stori long ol samting bin painim ol. O ol pikinini i ken droim piksa bilong sampela bikpela samting i bin kamap, olsem piksa bilong konstraksen bilong brens, kibung intenesenel, o taim ol i yusim masin pikap bilong autim tok long ol haus.

Olsem Wanem ‘Olgeta Hap i Mekim Wok Bilong Ol’?

Aposel Pol i tok kongrigesen Kristen i olsem wanpela bodi em “olgeta hap bilong bodi i pas wantaim na i mas wok gut wantaim long rot bilong ol join i save mekim gut wok bilong ol. Olgeta wan wan hap bilong bodi i mekim wok bilong ol inap long skel bilong ol.” (Efe. 4:16) Taim yumi kisim save long ol hap bilong bodi i wok olsem wanem, dispela bai mekim na yumi amamas na rispek moa long Man Bilong Wokim yumi. Na olsem tasol, taim yumi skelim olsem wanem kongrigesen i stap long olgeta hap i mekim wok, yumi kirap nogut “olsem i gat planti samting tru i insait long savetingting bilong God.”​—⁠Efe. 3:⁠10.

Jehova i stori long olsem wanem oganaisesen bilong em long graun na heven i save mekim wok. Em i tokim yumi olsem pastaim em i givim tok long Jisas Krais, husat “i salim ensel bilong en i kam long wokboi bilong en, Jon, na long rot bilong dispela ensel em i kamapim dispela tok hait long rot bilong ol piksa i makim ol samting.” (Rev. 1:​1, 2) God i kamapim klia olsem wanem oganaisesen bilong em long heven i mekim wok, olsem na yumi ken save em i laik bai yumi kliagut long olsem wanem “olgeta wan wan hap” bilong oganaisesen long graun i mekim wok.

Sapos klostu nau wasman sekit bai kam visit long kongrigesen bilong yupela, gutpela sapos famili i stori long gutpela wok bilong ol wasman raun na ol blesing ol i kisim. Olsem wanem ol i save helpim yumi olgeta wan wan? Yupela i ken skelim ol dispela askim tu: Bilong wanem em i bikpela samting long putim ripot bilong wok autim tok? Olsem wanem oganaisesen bilong God i kisim mani bilong mekim wok? Olsem wanem Gavening Bodi i mekim wok bilong en, na olsem wanem em i save givim kaikai bilong spirit?

Taim yumi save long olsem wanem lain bilong Jehova i stretim wok bilong ol, dispela i helpim yumi long 3-pela rot: Yumi amamas moa long ol lain husat i wok strong bilong helpim yumi. (1 Tes. 5:​12, 13) Bel i kirapim yumi long sapotim ol wok tiokratik. (Apo. 16:​4, 5) Laspela samting, bai yumi bilip moa long ol brata husat i go pas long wok taim yumi lukim olsem tok bilong Baibel i as bilong ol disisen ol i mekim na wok ol i stretim.​—⁠Hib. 13:⁠7.

“Lukim Gut Ol Strongpela Haus Bilong En”

“Yupela i mas wokabaut long maunten Saion, na raunim banis bilong taun na kaunim ol taua bilong en. Yupela i mas tingting gut long banis bilong Saion, na lukim gut ol strongpela haus bilong en. Olsem na bai yupela i ken toksave long ol lain i kamap bihain.” (Sng. 48:​12, 13) Man bilong raitim song i kirapim ol Israel long lukim gut taun Jerusalem. Tingim ol famili Israel husat i go long dispela taun holi bilong mekim ol bikpela bung long olgeta yia na lukim naispela tempel, ating ol i tingim bek planti gutpela samting. Dispela i mas kirapim ol long “toksave long ol lain i kamap bihain.”

Tingim kwin bilong Seba, pastaim em i no bilip tumas long ol stori em i harim long gutpela wok king bilong Solomon na bikpela savetingting bilong em. Wanem samting i senisim tingting bilong em na em i kirap long bilip olsem ol stori em i bin harim ol i tru? Em i tok: “Pastaim mi no bin bilipim dispela tok. Tasol nau mi kam na mi lukim pinis long ai bilong mi yet.” (2 Sto. 9:⁠6) Tru tumas, samting yumi lukim long ‘ai bilong yumi yet,’ em inap mekim bikpela samting moa long yumi.

Olsem wanem yu inap helpim ol pikinini bilong yu long lukim ol gutpela samting bilong oganaisesen bilong Jehova long ‘ai bilong ol yet’? Sapos i gat wanpela brens ofis bilong ol  Witnes Bilong Jehova i stap klostu long hap bilong yupela, orait stretim rot bilong go visitim. Mandy na Bethany i kamap bikpela long wanpela hap i stap longwe long Betel inap 1,500 kilomita. Tasol papamama bilong ol i bin stretim rot bilong famili i ken go visitim dispela hap planti taim liklik, na moa yet taim tupela pikinini meri bilong ol i wok long kamap bikpela. Tupela i tok: Paslain long mipela i visitim Betel, mipela i ting em ples we i no gat amamas long en na ol man i gat bikpela krismas tasol i save stap long en. Tasol mipela i bungim planti yangpela husat i wok strong long mekim wok bilong Jehova na ol i amamas! Mipela i lukim olsem oganaisesen bilong Jehova i no stap long dispela liklik hap bilong mipela tasol, na olgeta taim mipela i go long Betel mipela i kisim strong long mekim wok bilong Jehova.” Taim Mandy na Bethany i lukim gut wok bilong oganaisesen bilong God, dispela i kirapim tupela long mekim wok painia, na tu, sampela taim ol i mekim wok volantia long Betel.

I gat narapela rot tu bilong “lukim” oganaisesen bilong Jehova, em ol Israel bilong bipo i no bin i gat. Long nau, lain bilong God i gat ol vidio na DVD i stori long narapela narapela samting bilong oganaisesen bilong God, olsem: Jehovah’s Witnesses​—Organized to Share the Good News, Our Whole Association of Brothers, To the Ends of the Earth, na United by Divine Teaching. Taim yu na famili bilong yu i lukim bikpela wok bilong lain i wok long Betel, ol bratasista i helpim ol lain i kisim bagarap, ol misineri, na ol brata i redim na stretim rot bilong kamapim ol kibung, orait amamas bilong yupela long bikpela lain brata i stap long olgeta hap bai i go bikpela moa.

Olgeta kongrigesen bilong God ol i gat bikpela wok bilong autim gutnius na helpim ol Kristen i stap long hap bilong ol. Na tu, yu na famili bilong yu i mas lusim hap taim long tingim ‘ol wanbilip i stap long olgeta hap bilong graun.’ Dispela bai helpim yu na pikinini bilong yu long “sanap strong long bilip,” bai yupela i luksave olsem i gat as tru na yupela i ken amamas.​—⁠1 Pita 5:⁠9.

 [Blok/Piksa long pes 18]

Oganaisesen Bilong God Gutpela Long Stadi Long En

Yumi gat planti samting bilong helpim olgeta long kisim sampela save moa long wok bilong oganaisesen bilong Jehova long nau na long bipo. Ol dispela askim inap helpim yu long mekim olsem:

☞ Wok bilong ol wasman raun bilong nau i bin kirap olsem wanem?​—⁠Wastaua, Novemba 15, 1996, pes 10-15.

☞ Wanem bikpela samting i kamap long “De Bilong Ol Pikinini” long 1941 Kibung Tiokratik?​—⁠Wastaua, Julai 15, 2001, pes 8.

☞ Olsem wanem lain Gavening Bodi i save mekim ol disisen?​—⁠Wastaua, Epril 1, 2007, pes 24, paragraf 11.