No Ken Larim Ol Tingting Giaman i Giamanim Yu

“WATPO yu mekim dispela samting?” God i bin givim dispela askim long Iv taim em i kisim pinis kaikai bilong diwai tambu. Iv i bekim tok olsem: “Snek i grisim mi na mi kaikai pikinini bilong dispela diwai.” (Stt. 3:13) Satan, em dispela snek i bin pulim em long sakim tok bilong God, bihain ol i kolim em “dispela snek bilong bipo yet, . . . em man i save giamanim olgeta manmeri bilong graun.”​—⁠Rev. 12:⁠9.

Stori bilong Buk Stat i soim olsem Satan em i man bilong trik, em i save mekim olkain tok giaman bilong giamanim ol manmeri i no save was gut. Iv i bin pundaun long tok giaman bilong em. Tasol yumi no ken ting Satan tasol inap giamanim yumi. Baibel i mekim tok lukaut tu olsem yumi no ken ‘larim ol tingting giaman i giamanim yumi yet.’​—⁠Jems 1:⁠22.

Ating bai yumi tingting olsem yumi no inap tru long giamanim yumi yet. Tasol yumi save, i gat as na dispela tok lukaut bilong God i stap long Baibel. Olsem na yumi mas skelim olsem wanem yumi inap giamanim yumi yet sapos yumi no was gut, na wanem kain tingting giaman inap long giamanim yumi. Wanpela stori bilong Baibel em inap helpim yumi.

Ol i Bin Giamanim Ol Yet

Long yia 537 B.C.E. samting, Bikpela King Sairus bilong Persia i tok olsem ol Juda i stap kalabus long Babilon, ol i ken i go bek long Jerusalem na wokim gen tempel. (Esr. 1:​1, 2) Long yia bihain, ol Juda i putim ol bikpela ston bilong wokim as bilong nupela tempel, na dispela i stret wantaim samting Jehova i tingting pinis long mekim. Ol i amamas na litimapim nem bilong Jehova long em i bin blesim namba wan hap bilong dispela bikpela wok bilong ol. (Esr. 3:​8, 10, 11) Tasol i no longtaim na ol birua i kirap na i laik pasim ol long wokim gen tempel, olsem na ol manmeri i bel hevi na i lusim dispela wok. (Esr. 4:⁠4) Inap 15 yia samting bihain long taim ol i kam bek, gavman bilong Persia i tambuim olgeta wok bilong wokim tempel long Jerusalem. Bilong strongim dispela tambu, ol bikman bilong bosim ol provins ol i “kisim ol soldia na hariap i go long Jerusalem na mekim ol Juda i lusim dispela wok.”​—⁠Esr. 4:​21-24.

Em nau, ol Juda i lukim dispela bikpela hevi i kamap na i pasim rot bilong ol na ol i larim ol tingting giaman i giamanim ol. Ol i tok: “Taim bilong wokim gen haus bilong God, em i no kamap yet.” (Hag. 1:⁠2) Ol i ting God i no laik bai ol i wokim tempel hariap. Ol i no wok long painim rot bilong mekim laik bilong em, nogat. Ol i lusim dispela wok holi em i bin givim long ol, na ol i putim tingting olgeta i go long stretim gut ol haus bilong ol yet. Hagai, em profet bilong God, em i askim ol strong: “Bilong wanem yupela i stap long ol gutpela gutpela haus, na haus bilong mi [tempel bilong God] i bagarap i stap?”​—⁠Hag. 1:⁠4.

Yu kisim wanem skul long dispela pasin bilong ol? Sapos yumi kisim tingting kranki long taim bilong God long kamapim ol samting em i tingting pinis long mekim, orait dispela inap mekim na yumi lusim tingting olsem ol wok bilong spirit yumi kisim i bikpela samting, na nau ol laik na wok bilong yumi yet i pulim nabaut tingting bilong yumi. Yumi ken tok piksa olsem: Yu wetim sampela lain long kam lukim yu. Yu hariap mekim ol wok bilong klinim haus na redim ol samting. Tasol bihain yu kisim toksave olsem ol bai kam bihaintaim liklik. Orait bai yu lusim wok bilong redim ol samting?

Tasol tingim dispela: Hagai na Sekaraia i bin helpim ol Juda long kliagut olsem Jehova i laik yet long ol i mas wokim tempel hariap. Hagai i tokim ol: “Bel bilong yupela olgeta i no ken hevi. Yupela i mas kirap na mekim wok.” (Hag. 2:⁠4) Ol i mas kirap na mekim dispela wok na  bilip strong olsem spirit bilong God bai helpim ol. (Sek. 4:​6, 7) Olsem wanem? Dispela samting i bin kamap em inap helpim yumi long abrusim sampela tingting kranki long de bilong Jehova?​—⁠1 Kor. 10:⁠11.

Lusim Tingting Giaman na Kisim Stretpela Tingting

Long namba 2 pas bilong em, aposel Pita i toktok long taim Jehova i bin makim bilong kamapim “nupela skai na nupela graun.” (2 Pita 3:13) Em i tok sampela man bilong tok bilas ol i bin tok, i luk olsem God bai i no pinisim pasin nogut bilong dispela graun. Ol i mekim tok kranki olsem, i no gat wanpela samting bai kamap, na “olgeta samting i stap wankain olsem bipo tru taim God i mekim ol samting i kamap.” (2 Pita 3:⁠4) Pita i laik daunim dispela kain tingting giaman. Em i tok: “Mi kirapim yupela long tingim gen sampela samting na bai tingting bilong yupela i ken sap na wok gut.” Em i laik kirapim ol wanlain Kristen long tingim olsem ol dispela man bilong tok bilas ol i popaia stret. Bipo God i bin salim bikpela tait wara i kam na i bagarapim olgeta wok samting bilong ol man bilong dispela graun.​—⁠2 Pita 3:​1, 5-7.

Hagai i bin givim wankain tok long ol Juda long 520 B.C.E., em ol i bel hevi na lusim wok. Em i tokim ol: “Yupela i mas tingting gut long ol pasin bilong yupela.” (Hag. 1:​5, NW ) Bilong kirapim tingting bilong ol, em i tokim ol wanlotu bilong em long ol tok promis bilong God na ol samting God i tingting pinis long mekim. (Hag. 1:8; 2:​4, 5) Bihain liklik long dispela tok bilong strongim bel bilong ol, ol i kirap gen long wokim tempel​—⁠maski gavman i tambuim dispela wok. Long dispela taim tu, ol birua i laik bagarapim wok, tasol ol i no inap. Gavman i pinisim tambu, na insait long 5-pela yia ol i wokim pinis tempel.​—⁠Esr. 6:​14, 15; Hag. 1:​14, 15.

Tingting Gut Long Pasin Bilong Yumi

Olsem ol Juda long taim bilong Hagai, yu ting yumi inap bel hevi long taim ol hevi i kamap? Sapos olsem, orait ating bai yumi hatwok long holimpas yet pasin bilong givim bel long autim gutnius. Tasol wanem samting inap mekim na yumi bel hevi olsem? Ating ol pasin i no stret bilong dispela graun i givim hevi long yumi. Tingim Habakuk, em i askim olsem: “Wanem taim bai yu harim singaut bilong mi na yu helpim mipela, na ol dispela samting nogut i kamap long mipela i no ken bagarapim mipela?” (Hab. 1:⁠2) Nogut Kristen i kisim tingting bilong sampela man olsem God i isi tumas, na Kristen i no pilim moa olsem taim i sot pinis, na em i putim tingting i go long kisim gutpela sindaun. Yu ting dispela samting inap painim yu? Sapos yumi bihainim dispela kain tingting, bai yumi giamanim yumi yet. Em i bikpela samting tru long yumi mas harim gut tok kaunsel bilong Baibel long ‘tingting gut long ol pasin bilong yumi’ na kirapim tingting na bai ‘tingting bilong yumi i ken sap na wok gut’! Yumi ken askim yumi yet: ‘I stret mi kirap nogut olsem pasin nogut bilong dispela graun i no pinis hariap olsem mi bin tingim?’

Wanpela Haptaim Baibel i Tok Profet Long En

Tingim tok bilong Jisas long pinis bilong pasin bilong dispela graun. Stori bilong Mak long tok profet Jisas i bin mekim long taim bilong las  de, i soim olsem planti taim Jisas i tok yumi mas was i stap. (Mak 13:​33-37) Yumi lukim wankain tok lukaut insait long wanpela tok profet i stori long bikpela de bilong Jehova long Armagedon. (Rev. 16:​14-16) Bilong wanem dispela tok lukaut i kamap planti taim? Yumi mas i gat ol dispela tok bilong kirapim tingting, long wanem, taim ol man i wet wet na i olsem ol i wet longpela taim tru, ating bai ol i no pilim moa olsem taim i sot pinis.

Jisas i mekim tok piksa long yumi mas was i stap taim yumi wetim pinis bilong pasin nogut bilong dispela graun. Em i stori long wanpela papa bilong haus, em stilman i bin brukim haus na stilim ol samting bilong em. Em inap mekim wanem na bai stilman i no ken brukim haus na stil? Em i ken was i stap inap nait olgeta. Bilong pinisim tok piksa Jisas i tokim yumi: “Yupela tu i mas redi i stap, long wanem, long taim yupela i no ting long en, Pikinini bilong man bai i kam.”​—⁠Mat. 24:​43, 44.

Dispela tok piksa i soim olsem yumi mas redi na wet i stap, maski yumi mas wet longpela taim. Yumi no ken tingting planti olsem pasin nogut bilong dispela graun i no pinis hariap olsem yumi bin tingim. Nogut yumi giamanim yumi yet na ting ‘taim bilong Jehova i no kamap yet.’ Kain tingting olsem bai daunim laik bilong yumi long autim gutnius bilong Kingdom.​—⁠Rom 12:⁠11.

Rausim Ol Tingting Giaman

Stiatok i stap long Galesia 6:7 i stret long pasin bilong kisim tingting giaman. Em i tok: “No ken giamanim yu yet . . . Samting man i planim, dispela samting tasol em bai kamautim.” Sapos wanpela hap graun i stap nating, kwiktaim ol gras nogut bai kamap long en. Na olsem tasol, sapos yumi no kirapim tingting na bai em i sap na i wok gut, orait ol tingting giaman inap kamap long tingting bilong yumi. Olsem: Ating bai yumi tokim yumi yet, ‘De bilong Jehova bai kamap tru​—⁠tasol em bai no kam hariap.’ Sapos yumi kisim kain tingting olsem, dispela inap mekim na yumi ting yumi ken wok isi tasol long mekim wok bilong God. Orait bihain, bai yumi no givim bel moa long ol wok bilong spirit. Em nau, de bilong Jehova bai kamap long taim yumi no bin tingim.​—⁠2 Pita 3:⁠10.

Tasol ol tingting giaman i no inap kamap long tingting bilong yumi sapos oltaim yumi skelim yumi yet na bai yumi “ken save tru long laik bilong God, em dispela laik em i gutpela, na em i orait, na i gutpela olgeta.” (Rom 12:⁠2) Nambawan samting bilong helpim yumi long mekim olsem, em long ritim Baibel long olgeta de. Baibel inap strongim yumi long bilip olsem, oltaim Jehova i save mekim ol samting long taim stret olsem em i bin makim.​—⁠Hab. 2:⁠3.

Pasin bilong yumi long stadi, beten, go oltaim long miting, autim tok, na mekim ol gutpela pasin bilong helpim ol narapela, dispela bai helpim yumi long “tingim na wetim de bilong Jehova i kamap.” (2 Pita 3:​11, 12) Jehova bai lukim pasin bilong yumi long mekim yet ol dispela samting. Aposel Pol i tok: “Yumi no ken les long mekim ol gutpela wok, long wanem, long taim stret bilong en bai yumi kamautim kaikai sapos yumi no givap.”​—⁠Gal. 6:⁠9.

Tru tumas, nau i no taim bilong larim ol tingting giaman i giamanim yumi na yumi ting de bilong Jehova i stap longwe yet. Nau em i taim bilong strongim bel, long wanem, de bilong Jehova i kam klostu pinis.

[Piksa long pes 4]

Hagai na Sekaraia i kirapim ol Juda long wokim tempel

[Piksa long pes 5]

Olsem wanem sapos papa bilong haus i bin save olsem stilman bai kam?