Mi Kisim Planti Gutpela Blesing

Stori bilong Arthur Bonno

EM YIA 1951. Mi wantaim meri bilong mi Edith i stap long kibung distrik na mipela i harim toksave long wanpela miting bilong ol lain husat i laik mekim wok misineri.

Mi tok: “Yumi go harim!”

Edith i tok: “Art, yumi no inap mekim dispela wok!”

Mi tokim em: “Kam, yumi go harim tasol.”

Taim miting i pinis, ol i givim aplikesen bilong Skul Gileat long ol lain i laik kisim.

Mi tokim Edith: “Yumi raitim aplikesen.”

Em i tok: “Tasol Art, olsem wanem long ol famili bilong yumi?”

Inap olsem 18 mun bihain long dispela kibung, mitupela i go long Skul Gileat na ol i makim mipela long i go mekim wok misineri long Ekwado, long Saut Amerika.

Long dispela tok mi na meri bilong mi i bin mekim long kibung, ating yu luksave olsem mi gat strongpela tingting, na mi tingting olsem mipela inap mekim ol samting mipela i makim. Tasol Edith i gat pasin isi na em i ting i gat sampela samting em i no inap mekim. Em i bin i go bikpela long liklik taun Elizabeth, long Pennsylvania, Amerika, na em i save raun klostu long ples tasol, na em i no bin bungim wanpela man o meri bilong narapela kantri. I hatwok long em long lusim famili bilong em. Tasol em i amamas tru long kisim dispela asainmen long go mekim wok misineri long narapela kantri. Long 1954 mitupela i kamap long Ekwado na mipela i mekim yet wok misineri long dispela kantri i kam inap long nau. Insait long ol yia mipela i stap long dispela hap, mipela i kisim planti gutpela blesing. Yu laik harim sampela stori bilong ol dispela samting?

Mipela i Tingim Yet

Namba wan asainmen bilong mipela, em biktaun Quito, em i stap antap long maunten Andes inap olsem 2,850 mita. Mipela i lusim taun Guayaquil long nambis na mipela i raun long tren na trak inap tupela de bilong kamap long dispela hap, tasol long nau ol balus i save mekim dispela raun insait long 30 minit tasol! Mipela i mekim wok misineri long Quito inap 4-pela yia. Orait long 1958 narapela gutpela samting i kamap: Ol i singautim mipela long mekim wok sekit.

 Long dispela taim i gat tupela liklik sekit tasol long dispela kantri olgeta. Olsem na taim mipela i go lukim ol kongrigesen pinis, mipela i save lusim planti wik long autim tok long ol liklik taun bilong ol Indian i no gat sampela Witnes i sindaun long en. Ol ples slip bilong mipela long dispela hap em wanpela liklik rum i gat bet tasol. Mipela i save karim wanpela bokis i gat liklik stov kerasin, praipan, plet, dis bilong waswas, betsit, taunam, klos, sampela olpela niuspepa, na sampela samting moa. Mipela i save mekim wok long niuspepa bilong pasim ol hul long banis bilong rum na bai ol rat i no ken kam insait.

Ol dispela rum i tudak na i no gutpela tumas, tasol mipela i tingim yet ol gutpela samting bilong en, olsem long nait mitupela i save sindaun long bet na kaikai ol samting mipela i bin kukim long liklik stov na mipela save toktok wantaim. Mi gat pasin bilong kirap kwik long toktok na mi no tingting gut pastaim, olsem na taim mitupela i stap isi na toktok wantaim, Edith i save tok isi long mi long sampela gutpela pasin mi ken bihainim bilong kamapim tingting bilong mi long ol brata mipela save go lukim ol. Mi bihainim tok bilong em na taim mi go lukim ol kongrigesen, ol i kisim bikpela strong moa. Na tu, taim mi no tingting gut na mi mekim tok i daunim wanpela, Edith i no save insait long tok bilong mi. Olsem na mi lain long holim stretpela tingting long ol brata bilong mi. Tasol taim mipela i toktok wantaim long nait, planti taim mipela i kamapim sampela tok mipela i bin lainim long Wastaua na ol ekspiriens mipela i bin kisim long autim tok long dispela de. Man! Mipela i bin kisim ol gutpela ekspiriens stret!

Mipela i Bin Painim Carlos

Long taun Jipijapa long wes Ekwado, mipela i kisim nem bilong wanpela man i gat laik long harim tok bilong Baibel​—em nem Carlos Mejía​—tasol mipela i no kisim atres bilong em. Mipela i lusim rum long moningtaim na mipela i no save wanem hap bai mipela i kirap long painim em, olsem na mipela i wokabaut nating tasol i go. Mipela i mas abrusim planti hul long rot, em graun malumalum i pulap long ol, long wanem, long nait i gat bikpela ren i kam daun. Mi wokabaut i go pas long meri bilong mi na wantu mi harim em i singaut, “Art!” Mi tanim na mi lukim Edith i sanap insait long hul i gat blakpela graun malumalum i kam antap inap long skru bilong lek! Mi lukim em na mi laik lap stret, tasol mi lukim aiwara i go daun long pes bilong em na mi no lap.

Mi pulim em i kam antap, tasol su bilong em i pas yet long graun malumalum. Wanpela mangi na liklik meri i lukluk i stap, olsem na mi tokim tupela: “Sapos yupela i kisim ol dispela su i stap long hul, bai mi givim sampela mani long yupela.” Wantu tasol tupela i kisim su, tasol Edith i mas painim ples we em i ken wasim lek pastaim. Mama bilong tupela pikinini i bin lukim ol samting i kamap, na em i singautim mipela i go long haus bilong em, na em i helpim meri bilong mi long wasim lek na tupela pikinini i klinim su. Taim mitupela i laik lusim ol, wanpela gutpela samting i kamap. Mi askim meri, mipela inap painim we wanpela man nem bilong em Carlos Mejía. Meri i kirap nogut na i tok: “Em man bilong mi.” Mipela i kirapim Baibel stadi long ol, na bihain olgeta long famili ol i kisim baptais. Sampela yia bihain, Carlos, na meri bilong em, na tupela pikinini bilong ol i kamap painia salim.

Ol Raun i Gat Hatwok —Ol Lain i Mekim Gut Long Mipela

Raun bilong mipela long wok sekit i gat sampela hatwok long en. Mipela i save raun long bas, tren, trak, kanu, na ol liklik balus. Wanpela taim, John McLenachan, em wasman distrik, na meri bilong em Dorothy, i raun wantaim mipela long autim tok long ol ples bilong ol man bilong kisim pis, i stap klostu long boda bilong Kolambia. Mipela i raun long kanu i gat moto long en. Ol traipela sak i longpela olsem mak bilong kanu ol i raun klostu long kanu! Man bilong stiaim kanu em i gat save pinis long dispela wok, tasol em i kirap nogut long ol dispela traipela sak, na kwiktaim em i stiaim kanu i go klostu long nambis.

 Tasol ol samting i givim hatwok long mipela long wok sekit i kamapim gutpela samting. Mipela i bin bungim ol gutpela brata na ol i mekim gut long mipela. Planti taim ol famili em mipela i stap wantaim ol, ol i strong long mipela i mas kaikai 3-pela taim long olgeta de, tasol ol yet i kaikai wanpela taim tasol. O ol i strong long mipela i slip long bet bilong ol, i gat dispela wanpela bet tasol long haus, na ol yet i slip long plua. Meri bilong mi i tok: “Ol dispela gutpela bratasista i helpim mi long save, mipela i no gat wok long holim planti samting, liklik samting tasol em inap long mipela.”

‘Mipela i No Laik Surik Long Mekim Wok’

Long 1960, mipela i kisim narapela gutpela blesing​—ol i singautim mipela long mekim wok long brens ofis long Guayaquil. Mi mekim wok long ofis, na Edith i mekim wok autim tok wantaim kongrigesen i stap klostu long brens ofis. Mi ting mi no man bilong wok long ofis, na mi pilim olsem mi no inap mekim gut dispela wok. Tasol olsem Hibru 13:21 i makim, God i save givim yumi “olgeta gutpela samting bilong mekim laik bilong em.” Tupela yia bihain, ol i singautim mi long mekim wanpela kos bilong Gileat inap 10-pela mun, em bai kamap long Betel long Brooklyn, New York. Long dispela taim bipo, ol man tasol i save go, na meri bilong ol i save stap long asainmen bilong ol. Meri bilong mi i kisim pas long Brooklyn. Pas i askim em long skelim gut olsem em bai orait long man bilong em i ken i go i stap inap 10-pela mun o nogat.

Edith i bekim pas na tok: “Tru, dispela bai i hatwok liklik long mekim, tasol mipela i save Jehova bai helpim mipela long karim ol hevi inap kamap long dispela taim . . . Mipela i no laik surik long mekim ol wok ol i laik givim long mipela o long lain long mekim gut ol wok bilong mipela.” Long taim mi stap long Brooklyn, mi kisim pas long meri bilong mi long olgeta wik.

Wok Wantaim Ol Gutpela Wanbilip

Long 1966, sik i mekim na mitupela Edith i go bek long Quito na mekim gen wok misineri wantaim ol bratasista bilong dispela hap. Ol i gutpela lain tru bilong holimpas bilip!

Wanpela gutpela sista i gat man i no Witnes na oltaim man i save paitim em. Wanpela taim long 6 klok moningtaim, wanpela i ring long mipela na i tok, man bilong dispela sista i bin paitim em gen. Mi sut i go long haus bilong sista. Taim mi lukim em mi kirap nogut tru. Em i slip i stap long bet na pes bilong em i solap nogut tru. Man i bin paitim em long stik bilong brum i go inap long stik i bruk tupela hap. Sampela aua bihain mi go long haus na man bilong em i stap na mi tokim em, samting em i bin mekim i nogut tru. Em i pilim nogut tru na tok sori.

Long 1972 samting, helt bilong mi i wok long kamap gutpela gen na mipela i kirap gen long mekim wok sekit. Biktaun Ibarra i stap insait long sekit bilong mipela. Taim mipela i bin visitim dispela ples long 1958 samting, i gat tupela Witnes tasol i stap, em wanpela misineri na wanpela brata bilong dispela hap. Olsem na mipela i gat bikpela laik long bungim planti nupela manmeri i bin kam insait long kongrigesen.

Long namba wan miting bilong mipela long dispela kongrigesen, Brata Rodrigo Vaca i sanap  long pletfom na lukautim hap bilong miting i gat ol askim na bekim. Taim em i mekim wanpela askim, ol bratasista long miting i singaut “Yo, yo!” (“Mi, mi!”) na ol i no save apim han. Mitupela Edith i kirap nogut long dispela. Mi tingting, ‘Wanem dispela pasin ol i mekim?’ Bihain mipela i kisim save olsem Brata Vaca em i aipas, tasol em inap save long nek bilong ol bratasista long kongrigesen taim ol i singaut. Tru tumas, em i wanpela wasman i save gut long ol sipsip bilong em! Dispela i kirapim mipela long tingim tok bilong Jisas long Jon 10:​3, 4, 14, we em i stori long Gutpela Wasman na ol sipsip em ol i save gut long narapela narapela. Long nau, Ibarra i gat 6-pela kongrigesen bilong tokples Spen, na wanpela long tokples Quichua, na wanpela bilong tokples Sain bilong ol yaupas. Brata Vaca i save mekim wok yet olsem elda na painia salim. a

Tenkyu Long Gutpela Pasin Bilong Jehova

Long 1974, mipela i kisim narapela gutpela blesing na i kamapim gutpela pasin bilong Jehova​—ol i singautim mipela i go bek long Betel, na mi kisim wok gen insait long ofis, na bihain mi kisim wok insait long Brens Komiti. Pastaim Edith i wok long haus kuk, na bihain em i kirap mekim wok long ofis olsem meri bilong kisim na tilim ol pas.

Insait long ol dispela yia mipela i bin kisim amamas long tok welkam long planti handet misineri i bin kisim skul long Gileat, em ol i strongim ol kongrigesen na givim bel long mekim wok. Na mipela i amamas long planti tausen brata na sista bilong 30 kantri, em ol i bin lusim ples bilong ol bilong mekim wok autim tok long dispela kantri. Mipela i pilim tru pasin bilong ol long daunim sampela laik bilong ol yet! Sampela i bin salim haus na bisnis bilong ol bambai ol i ken i kam na mekim wok long ol hap ol i sot tru long ol man bilong autim tok bilong Kingdom. Ol i baim ol kar bambai ol i ken autim tok long ol longwe hap, na ol i kamapim ol nupela kongrigesen, na helpim wok bilong sanapim ol Haus Kingdom. Planti sista singel ol i bin lusim kantri bilong ol na ol i kam bilong mekim wok painia long dispela hap​—na ol i wok strong na ol i inap tru long mekim dispela wok!

Tru tumas, mi bin kisim planti gutpela blesing insait long ol yia mi bin mekim wok bilong God. Nambawan bikpela samting, em mi bin kisim pasin bilong pas gut wantaim Jehova. Na tu, mi tenkyu tru long Jehova i bin givim wanpela “helpim” long mi. (Stt. 2:18) Taim mi tingim bek dispela 69 yia mitupela meri bilong mi i bin wok wantaim, mi tingim Sindaun 18:​22, em i tok: “Sapos yu maritim wanpela [“gutpela,” NW] meri, dispela i gutpela tru.” Mi bin kisim bikpela amamas long Edith i stap gutpela poroman bilong mi. Em i bin helpim mi long planti samting. Na tu, em i bin mekim gut tru long mama bilong em olsem gutpela pikinini. Kirap long taim mipela i bin kam kamap long Ekwado, meri bilong mi i bin salim pas long mama bilong em long olgeta wik inap long taim mama i dai long 1990, taim em i gat 97 krismas.

Nau mi gat 90 krismas na Edith i gat 89 krismas. Mipela i tingim amamas mipela i bin kisim long helpim 70 samting manmeri long kisim save long Jehova. Tru tumas, mipela i amamas long mipela i bin putim aplikesen bilong go long Skul Gileat inap 60 yia i go pinis. Dispela disisen i mekim na i gat planti gutpela samting i bin painim mipela.

[Futnot]

[Piksa long pes 29]

Long Yankee Stediam long New York, wantaim ol wanklas misineri bilong mipela long Gileat, 1958

[Piksa long pes 31]

Mipela i go lukim wanpela famili Witnes taim mipela i mekim wok sekit, 1959

[Piksa long pes 32]

Long brens ofis long Ekwado, 2002