Tingim Wok Bilong Jehova Olsem Bikpela Samting
Tingim Wok Bilong Jehova Olsem Bikpela Samting
‘Yupela i mas wok yet long tingim ol bikpela samting.’—FILI. 4:8.
1, 2. Wanem samting i mekim na planti manmeri i tingim ol amamas tasol? Dispela i kirapim yumi long mekim wanem ol askim?
YUMI stap long taim we i gat planti hevi tru, winim olgeta taim bipo. Ol manmeri i no save tingim God, ol i hatwok tru long karim hevi bilong dispela ‘taim nogut i gat hatwok long en.’ (2 Tim. 3:1-5) Ol i karim ol hevi bilong ol wan wan de long strong bilong ol yet—tasol ol i no inap stretim ol dispela hevi. Planti i no laik tingting tumas long ol wok samting ol i mas mekim, olsem na ol i painim amamas tasol.
2 Bilong karim ol hevi bilong laip, planti taim ol man i putim laik bilong painim ol amamas i stap namba wan samting. Sapos ol Kristen i no was gut, ol tu inap kisim dispela pasin. Olsem wanem yumi inap abrusim dispela pasin? Yu ting dispela i makim olsem yumi no ken painim amamas liklik? Olsem wanem yumi ken kisim stretpela tingting long amamas na ol wok yumi mas mekim? Wanem ol stiatok bilong Baibel i ken helpim yumi long tingim ol bikpela samting bilong laip, tasol tu yumi no kisim pasin bilong siries tumas?
Tingim Ol Bikpela Samting Maski Ol Man i Laikim Tumas Amamas
3, 4. Olsem wanem Baibel i helpim yumi long save olsem em i gutpela long tingim ol bikpela samting?
3 Ol manmeri bilong dispela graun i save laikim tumas “kain kain amamas.” (2 Tim. 3:4) Pasin bilong ol long tingim tumas amamas inap bagarapim pasin bilong yumi long pas gut wantaim Jehova. (Snd. 21:17) Olsem na i gat as tru na long ol pas aposel Pol i raitim long Timoti na Taitus, i gat ol tok tu long pasin bilong stap stret na tingim ol bikpela samting. Taim yumi bihainim dispela tok, em bai helpim yumi long sakim pasin bilong tingim ol amamas tasol.—Ritim 1 Timoti 2:1, 2; Taitus 2:2-8.
4 Planti handret yia paslain long dispela, Solomon i stori olsem i gutpela long lusim sampela amamas na bai yumi ken tingim ol bikpela samting. (Sav. 3:4; 7:2-4) Tru tumas, yumi stap laip sotpela taim tasol, olsem na yumi mas “taitim bun tru” na bai God i ken kisim bek yumi. (Luk 13:24) Bilong mekim olsem, yumi mas wok long tingim “ol bikpela samting.” (Fili. 4:8, 9) Dispela i makim olsem yumi mas tingim gut olgeta samting long laip bilong yumi olsem wanpela Kristen.
5. Wanem wanpela samting ol Kristen i mas tingim olsem bikpela samting?
5 Olsem: Ol Kristen i bihainim pasin bilong Jehova na Jisas, ol i ting em i bikpela samting long ol i mas wok strong. (Jon 5:17) Olsem na planti taim ol man i litimapim nem bilong ol Kristen long pasin bilong ol long wok strong, na long ol narapela i ken bilip long ol. Na tu, ol het bilong famili i save tingim wok bilong ol long lukautim famili. Sapos man i no lukautim famili bilong em long ol samting bilong skin, i olsem “em i givim baksait pinis long bilip”!—1 Tim. 5:8.
Tingim Lotu Olsem Bikpela Samting na Samting Bilong Amamas
6. Olsem wanem yumi save olsem yumi mas tingim wok bilong yumi long lotuim Jehova i bikpela samting?
6 Oltaim Jehova i tingim olsem em i bikpela samting long lotuim em long pasin i stret. Olsem: Aninit long Lo Bilong Moses, ol Israel i bin kisim pe nogut taim ol i lusim stretpela pasin bilong lotuim Jehova. (Jos. 23:12, 13) Long taim bilong ol aposel, ol disaipel bilong Krais i mas wok strong tru bambai ol tok na tingting giaman i no ken bagarapim lotu i tru. (2 Jon 7-11; Rev. 2:14-16) Long nau, ol Kristen tru i wok yet long tingim wok lotu bilong ol i bikpela samting.—1 Tim. 6:20.
7. Olsem wanem Pol i redi gut long autim tok?
7 Wok bilong yumi long autim tok i save givim amamas long yumi. Tasol bilong holimpas dispela amamas, yumi mas tingim gut wok autim tok na redi gut pastaim. Pol i stori long olsem wanem em i tingim gut ol man em i skulim ol. Em i tok: “Mi kisim pasin bilong olgeta kain man, long wanem, mi laik traim olgeta rot bilong kisim bek sampela. Mi mekim olgeta samting bilong helpim gutnius bai mi inap autim tok bilong gutnius long ol arapela man.” (1 Kor. 9:22, 23) Pol i kisim amamas long helpim ol man long ol samting bilong spirit, na em i tingting gut long olsem wanem em inap helpim ol man i harim tok bilong em. Olsem na em inap long strongim na kirapim ol long lotuim Jehova.
8. (a) Yumi mas i gat wanem tingting long ol man yumi skulim ol? (b) Olsem wanem pasin bilong mekim Baibel stadi i helpim yumi long amamas long wok autim tok bilong yumi?
8 Pol i tingim wok autim tok i bikpela samting olsem wanem? Em i amamas long i stap olsem “wokboi” bilong Jehova na bilong ol man husat i harim tok i tru. (Rom 12:11; 1 Kor. 9:19) Olsem wanem? Taim yumi kirap mekim wok bilong skulim ol man long Tok Bilong God—long ol Baibel stadi, ol miting Kristen, o long Famili Lotu—yumi tingim tru wok yumi gat bilong helpim ol man yumi skulim ol? Ating yumi pilim olsem wok bilong mekim wanpela Baibel stadi long olgeta wik em i bikpela wok tumas long yumi. Tru, bilong mekim olsem yumi mas lusim sampela wok bilong yumi yet na givim taim bilong yumi long helpim ol narapela. Tasol dispela i stret wantaim tok bilong Jisas olsem “amamas bilong givim samting i winim amamas bilong kisim samting.” (Apo. 20:35) Taim yumi yet i skulim ol narapela long rot bilong kisim laip, dispela i givim bikpela amamas long yumi, winim amamas yumi kisim long ol narapela samting.
9, 10. (a) Yu ting pasin bilong tingim ol bikpela samting i makim olsem yumi no ken malolo na amamas wantaim ol narapela? Stori long dispela. (b) Wanem samting bai helpim elda long strongim bel bilong ol narapela na ol i no hatwok long toktok wantaim em?
9 Pasin bilong tingim ol bikpela samting i no makim olsem yumi no ken malolo na amamas wantaim ol narapela. Nogat. Jisas i stap gutpela piksa long dispela, em i makim taim bilong skulim ol man na em i save malolo na kamap pren bilong ol narapela. (Luk 5:27-29; Jon 12:1, 2) Na tu, pasin bilong tingim ol bikpela samting i no makim olsem yumi mas pes drai tasol. Sapos Jisas i save siries tumas, ol manmeri bai i no laik i go klostu long em. Ol pikinini tu i amamas long i go long em. (Mak 10:13-16) Olsem wanem yumi inap bihainim dispela pasin bilong Jisas?
10 Wanpela brata i stori long pasin bilong wanpela elda olsem: “Em i laik bai olgeta samting em i mekim i mas stret tru, tasol em i no gat tingting olsem pasin bilong ol narapela i mas gutpela olgeta.” Olsem wanem? Dispela tok i makim yu? I stret yumi ting ol narapela inap mekim sampela gutpela wok. Olsem: Ol pikinini i save mekim gut wok taim papamama i putim ol mak i stret long ol na i helpim ol long winim ol dispela mak. Na tu, ol elda inap strongim ol wan wan insait long kongrigesen long kamap strong na ol i givim sampela tok i helpim ol long mekim olsem. Taim elda i gat stretpela tingting long ol samting em yet inap mekim, em bai i gat pasin bilong strongim bel bilong ol narapela na ol i no hatwok long toktok wantaim em. (Rom 12:3) Wanpela sista i tok: “Mi no laik bai elda i mekim tok pani long olgeta samting. Tasol sapos em i siries long olgeta taim, bai i hatwok long i go toktok long em.” Narapela sista i tok em i pilim olsem pasin bilong sampela elda “i save pretim man, long wanem, ol i siries tumas.” I stret ol bilipman i amamas long lotuim Jehova, em “God bilong amamas,” na ol elda i no laik daunim dispela amamas.—1 Tim. 1:11.
Kisim Wok Insait Long Kongrigesen
11. Sapos man Kristen i “laik” kisim wok insait long kongrigesen, em i mas mekim wanem?
11 Taim Pol i kirapim ol man long kongrigesen long wok strong long winim mak bilong mekim bikpela wok moa, em i no tingting long kirapim ol long inapim laik bilong ol long kisim namba, nogat. Em i tok: “Sapos wanpela man i laik kamap wasman, em i laik kisim gutpela wok.” (1 Tim. 3:1, 4) Sapos man Kristen i “laik” kisim wok insait long kongrigesen, em i mas i gat bikpela laik long wok strong long kisim ol gutpela pasin Kristen na bai em inap mekim wok bilong helpim ol brata bilong em. Sapos wanpela brata i bin baptais pinis inap wanpela yia na em i inapim ol mak bilong kamap kongrigesen sevan olsem Baibel i kolim long 1 Timoti 3:8-13, orait ol elda i ken toktok wantaim wasman sekit long dispela samting. Ves 8 i tok: “Ol wokman bilong kongrigesen tu i mas mekim pasin we ol arapela i ken rispektim ol.”
12, 13. Stori long ol samting ol yangpela brata inap mekim bilong kisim ol wok insait long kongrigesen.
12 Olsem wanem? Yu wanpela brata i gat 18 o 19 krismas na i save tingim ol bikpela samting? I gat ol samting yu ken mekim bilong kisim wok insait long kongrigesen. Wanpela samting, em yu ken insait moa long wok autim tok. Olsem wanem? Yu save amamas long mekim wok autim tok wantaim ol brata i gat kain kain krismas? Yu wok long painim wanpela man bilong yu ken mekim Baibel stadi wantaim em? Taim yu bihainim ol tok i kamap long ol miting long pasin bilong mekim Baibel stadi, wok tisa bilong yu bai kamap gutpela moa. Na tu, bai yu lain long pilim hevi bilong man i wok long kisim save long ol pasin bilong Jehova. Taim sumatin bilong yu i luksave olsem em i gat wok long senisim sampela pasin, bai yu lain long mekim pasin isi na mekim ol tok long gutpela pasin na helpim em long bihainim ol stiatok bilong Baibel.
13 Yupela ol yangpela brata inap long helpim ol lapun insait long kongrigesen. Na tu, yupela i ken helpim wok bilong klinim na stretim gut Haus Kingdom. Taim yupela i redi long mekim ol samting yupela inap long mekim, yupela i kamapim klia olsem yupela i tingim wok lotu bilong yupela i bikpela samting. Olsem Timoti, yupela inap lain long lukautim gut ol wok bilong kongrigesen.—Ritim Filipai 2:19-22.
14. Olsem wanem ol elda inap “traim wok” bilong ol yangpela brata bilong save olsem ol i fit long mekim wok insait long kongrigesen o nogat?
14 Ol elda, yupela i mas tingim na givim wok long ol yangpela brata husat i wok strong long “ranawe long ol laik i save kamap long bel bilong ol yangpela” na ol i bihainim “stretpela pasin, pasin bilong bilip, pasin laikim, bel isi,” na ol narapela gutpela pasin. (2 Tim. 2:22) Taim yupela i givim wok long ol insait long kongrigesen, i olsem yupela i “traim wok bilong ol bai yupela i ken save olsem ol i fit long mekim wok o nogat.” Long dispela rot “olgeta manmeri i ken lukim klia olsem [ol i] wok long kamap strong moa.”—1 Tim. 3:10; 4:15.
Tingim Kongrigesen na Famili Olsem Bikpela Samting
15. Olsem 1 Timoti 5:1, 2 i tok, olsem wanem yumi inap soim olsem yumi tingim ol narapela i bikpela samting?
15 Pasin bilong tingim ol bikpela samting i makim tu olsem yumi soim rispek long ol brata na sista. Ol tok Pol i mekim long Timoti i soim olsem em i bikpela samting long rispek long ol narapela. (Ritim 1 Timoti 5:1, 2.) Dispela i bikpela samting moa taim brata i toktok wantaim wanpela sista, o sista i toktok wantaim wanpela brata. Jop i givim biknem long ol meri, na moa yet long poroman marit bilong em, na dispela pasin bilong em i gutpela long bihainim. Em i wok strong long em i no ken aigris long ol meri. (Jop 31:1) Taim yumi tingim ol brata na sista bilong yumi i bikpela samting, bai yumi no tok gris long ol o mekim wanpela samting i mekim ol i pilim nogut. Pasin rispek i bikpela samting moa taim man na meri i pren wantaim na i tingting long marit. Kristen i tingim ol bikpela samting, em bai no kirapim nating laik bilong narapela.—Snd. 12:22.
16. Stori long olsem wanem tingting bilong ol manmeri bilong graun long wok bilong maritman na papa i narapela kain long tingting bilong Baibel.
16 Na tu, oltaim yumi mas holimpas tingting olsem ol wok God i givim yumi insait long famili, ol i bikpela samting. Ol manmeri Satan i bosim, ol i daunim wok bilong maritman na wok papa. Ol lain i wokim ol muvi na TV program, ol i amamas long kamapim ol piksa we famili i no rispek long het bilong famili na i tok bilas long en. Tasol Baibel i tok maritman i gat bikpela wok, em i “stap het bilong meri bilong en.”—Efe. 5:23; 1 Kor. 11:3.
17. Stori long olsem wanem pasin bilong insait long famili lotu i soim olsem yumi tingim ol wok bilong yumi i bikpela samting.
17 Ating maritman i lukautim famili long sait bilong skin. Tasol sapos em i no stiaim famili long sait bilong lotu, dispela i soim olsem em i no gat gutpela tingting na save. (Lo 6:6, 7) Olsem na 1 Timoti 3:4 i tok, sapos yu wanpela het bilong famili na yu gat laik long kisim sampela wok moa insait long kongrigesen, orait yu mas stap olsem man husat i “bosim gut ol wanhaus bilong em, na ol pikinini bilong en i mas i gat gutpela tingting na ol i mas daun long em.” Askim yu yet, ‘Mi save makim taim bilong mekim famili lotu long olgeta wik?’ Sampela maritmeri Kristen i mas kirapim man bilong ol long go pas long ol samting bilong spirit. Olgeta maritman i mas skelim ol yet, ol i gat wanem kain tingting long dispela wok ol i mas mekim? Tasol tu, maritmeri Kristen i mas sapotim Famili Lotu na wok gut wantaim man bilong em bilong mekim Famili Lotu i kamap gutpela.
18. Olsem wanem ol pikinini inap lain long tingim ol bikpela samting?
18 Ol pikinini tu i mas tingim ol bikpela samting long laip. (Sav. 12:1) I gutpela long ol liklik pikinini i lain long wok strong, mekim ol wok bilong haus i stret long krismas na save bilong ol. (Kra. 3:27) Taim King Devit i yangpela mangi yet, em i lain long mekim gut wok bilong lukautim ol sipsip. Em i lain tu long pilaim musik na raitim ol singsing—em ol dispela save i mekim na em inap stap klostu long king bilong Israel na mekim wok. (1 Sml. 16:11, 12, 18-21) Taim Devit i yangpela mangi em i save pilai, tasol tu em i kisim save long mekim ol gutpela wok na bihain em i yusim dispela save bilong litimapim nem bilong Jehova. Save bilong em long lukautim ol sipsip i helpim em long bihainim pasin isi taim em i stiaim lain Israel. Yupela ol yangpela, yupela i lain long mekim wanem ol wok? Ol dispela wok bai helpim yupela long mekim wok bilong God na ol narapela wok yupela i mas mekim long bihain?
Holim Stretpela Tingting
19, 20. Yu tingting strong long holim wanem tingting long yu yet na wok lotu bilong yu?
19 Yumi olgeta i mas wok strong long holim stretpela tingting long yumi yet—yumi no ken ting yumi yet i nambawan tru. Yumi no laik ting olsem yumi “stretpela man tumas.” (Sav. 7:16, NW ) Pasin bilong tok pani liklik inap daunim bel kaskas, maski yumi stap long haus, ples wok, o taim yumi mekim ol samting wantaim ol brata na sista Kristen bilong yumi. Olgeta wan wan long famili i mas was gut, ol i no ken skelim tumas ol narapela long famili, dispela bai mekim na famili i no inap i stap bel isi na amamas taim ol i stap long haus. Insait long kongrigesen, olgeta inap lain long lap na amamas wantaim ol narapela, na mekim ol gutpela tok na skulim ol narapela long pasin i save strongim bel bilong ol.—2 Kor. 13:10; Efe. 4:29.
20 Yumi stap long graun we ol manmeri i no ting olsem Jehova na ol lo bilong em i bikpela samting. Tasol lain bilong Jehova i tingim tru pasin bilong ol long bihainim tok bilong God na stap gut long em. Yumi amamas tru long stap insait long kain bikpela lain husat i ting pasin bilong lotuim Jehova i bikpela samting! Gutpela sapos yumi holimpas tingting olsem laip na lotu bilong yumi i bikpela samting tru.
Bai Yu Bekim Olsem Wanem?
• Bilong wanem yumi mas sakim pasin bilong ol man bilong dispela graun long tingim ol amamas tasol?
• Olsem wanem yumi inap ting olsem wok autim tok i bikpela samting, na tu, em i samting bilong amamas?
• Tingting yumi gat long kisim sampela wok moa, olsem wanem dispela i soim olsem yumi gat pasin bilong tingim ol bikpela samting o nogat?
• Bilong wanem pasin bilong soim rispek long ol brata na famili bilong yumi i bikpela samting?
[Askim Bilong Stadi]
[Ol Piksa long pes 12]
Maritman i mas lukautim famili long sait bilong skin na long sait bilong lotu