Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Yu ken traim bekim ol dispela askim i stap daunbilo:

• Bilong wanem yumi ken bilip olsem gaden Iden em wanpela ples i bin stap tru?

Baibel i stori long en olsem wanpela ples tru, na i stori gut long hap em i bin stap long en. Tupela wara i stap long Iden em Baibel i stori long ol, ol i stap yet long nau. Ol stori nating i no save kamapim ol kain tok olsem. Jisas, em man yumi inap bilip tru long en, em i stori long Adam na Iv olsem man na meri i bin i stap tru.​—1/1, pes 5-6, 9.

• Yu ting God i bin save olsem Adam na Iv bai mekim sin?

Nogat. Jehova i givim gutpela save long ol na ol i stap fri bilong makim ol samting ol i laik mekim, olsem ol bai bihainim tok o nogat. Tru, Jehova inap save long ol samting bai kamap bihain, tasol sampela taim Jehova i no mekim wok long dispela strong.​—1/1, pes 13-15.

• Ol Kristen tru i save yusim nem bilong God olsem wanpela paspas bilong lukautim ol?

Sampela man i ting wanpela mak o samting ol i holim inap lukautim ol olsem wanpela paspas, tasol lain bilong God i no ting nem bilong em inap lukautim ol olsem wanpela paspas. Ol i bilip long Jehova na ol i wok strong long mekim laik bilong em, olsem na ol i kisim ples hait long nem bilong em. (Sef. 3:​12, 13)​—1/15, pes 5-6.

• Pasin bilong bungim ol hap kaikai i stap long gaden i bin helpim husat long Israel?

Dispela pasin i helpim olgeta. Ol rabisman husat i mas bungim hap kaikai i stap yet, dispela i kirapim ol long wok strong. Na dispela pasin i helpim ol narapela long kisim pasin bilong givim ol samting na bilip long God bai blesim ol.​—2/1, pes 15.

• Bilong wanem Jehova i sakim King Sol?

Sol i mas wet long profet bilong God i wokim ofa, tasol king Sol i sakim tok na em yet i wokim ofa. Bihain, em i no bin bihainim tok long em i mas bagarapim wanpela lain birua.​—2/15, pes 22-23.

• Olsem wanem yumi ken soim olsem yumi heitim pasin bilong sakim lo?

Bai yumi no dring planti tumas alkohol, bai yumi sakim wok bilong ol spirit nogut, na bihainim tok bilong Jisas long sakim pasin pamuk. Olsem, bai yumi abrusim ponografi na ol tingting nogut em dispela inap kamapim. (Mat. 5:​27, 28) Na tu, bai yumi no bung wantaim ol rauspela man.​—2/15, pes 29-32.

• Long Israel long nau, ol saveman i bin painim ol olpela haus bilong ol binen, bilong wanem dispela i bikpela samting?

Ol saveman bilong painim ol samting bilong bipo i painim 30 samting haus bilong ol binen, na ol saveman i ting ol dispela binen i bin wokim 500 kilogram hani long olgeta yia. Dispela i makim olsem ol man i bin lukautim ol binen long dispela hap em bipo God i bin tok em i “pulap long susu na hani.” (Kis. 3:​8, NW)​—3/1, pes 15.

• Olsem wanem Jeremaia i olsem wanpela diwai ‘ol i bin planim klostu long wara, em ol rop bilong en i go daun na kisim wara’? (Jer. 17:​7, 8)

Oltaim wok bilong Jeremaia i karim kaikai; em i no larim ol man nogut bilong tok bilas i stiaim tingting bilong em. Nogat. Em i pas gut wantaim Man i as bilong wara bilong givim laip, na em i pilim tru long bel olgeta tok God i mekim long em.​—3/15, pes 14.

• Bilong wanem Jisas i bin tokim Marta olsem i no gat wok long planti samting, wanpela samting tasol em inap? (Luk 10:​41, 42)

Jisas i no tok Marta i save tingim tumas ol samting bilong skin taim em i wokim planti narapela narapela kaikai, na tu, Jisas i no tok olsem wok Marta i mekim i samting nating, nogat. Jisas i laik bai Marta i tingim ol nambawan bikpela samting. Rot i op long Marta i ken strongim bilip bilong em, tasol em i no mekim olsem.​—4/1, pes 12-13.