Bihainim Krais, Em Nambawan Lida

OL MAN i bihainim ol lida bilong graun, planti taim ol i kisim bel hevi long dispela. Tasol ol man i stap aninit long wok lida bilong Krais, ol i no olsem. Jisas i tok: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela. Karim hap plang bilong mi na kisim skul long mi, long wanem, mi man bilong pasin isi na pasin daun, na yupela bai kisim nupela strong.” (Mat. 11:​28, 29) Wok lida bilong Jisas i save givim nupela strong na amamas long yumi. Em i save tingim tru ol man nating na ol man i stap tarangu, na em i singautim ol long i kam aninit long gutpela hap plang bilong em. Tasol yumi mas mekim wanem bilong bihainim wok lida bilong Jisas?

Aposel Pita i tok: “Krais yet i bin karim pen bilong helpim yupela. Em i stap olsem gutpela piksa bai yupela i ken bihainim gut lek mak bilong en.” (1 Pita 2:21) Pasin bilong bihainim lek mak bilong Jisas i bikpela samting olsem wanem? Tingim olsem yu insait long wanpela grup i mas wokabaut long wanpela hap graun we i gat ol bom insait long en, na wanpela tasol bilong grup i save long hap bilong putim lek na wokabaut na bai yupela i no ken kisim bagarap. Ating bai yu bihainim em gut na putim lek i go stret antap long lek mak bilong em, a? Olsem tasol, sapos yumi laik i stap gut long bihain, yumi mas bihainim pasin bilong Jisas. Bilong mekim olsem, yumi mas harim na bihainim ol tok bilong em na wok gut wantaim ol mausman bilong em.

Harim na Bihainim

Klostu long pinis bilong bikpela tok bilong em long maunten, Jisas i tok: “Man i harim ol dispela tok bilong mi na bihainim, em i olsem man i gat savetingting na i wokim haus bilong en antap long bikpela ston. Na bikpela ren i pundaun na wara i tait na win i sakim strong dispela haus, tasol haus i no pundaun. Long wanem, haus i sanap antap long bikpela ston.”​—Mat. 7:​24, 25.

Em nau, Jisas i tok, man i harim na bihainim ol tok bilong em, em i gat “savetingting.” Orait olsem wanem long yumi? Yumi givim bel long bihainim tok bilong Krais na long dispela rot yumi soim olsem yumi rispek na pilim tru gutpela pasin bilong Jisas? O yumi save makim sampela tok bilong Jisas i no gat hatwok long en na yumi bihainim ol dispela tok tasol? Jisas i tok: “Oltaim mi save mekim ol samting [God] i laikim.” (Jon 8:29) Yumi mas wok strong long bihainim dispela pasin bilong em.

Ol aposel i bin stap olsem gutpela piksa long i stap aninit long wok lida bilong Krais. Wanpela taim Pita i tokim Jisas: “Harim! Mipela i lusim pinis olgeta samting na bihainim yu.” (Mak 10:28) Tru tumas, ol aposel i tingim wok lida bilong Jisas i bikpela samting tru, olsem na long laik bilong ol yet ol i lusim olgeta samting bambai ol i ken bihainim em.​—Mat. 4:​18-22.

Wok Gut Wantaim Ol Mausman Bilong Krais

Klostu long taim Jisas i dai, em i kolim narapela rot we yumi ken bihainim wok lida bilong em. Em i tok: “Man i kisim dispela man mi salim i kam, em i kisim mi tu.” (Jon 13:20) Ol mausman bilong Jisas em God i bin makim, Jisas i kolim ol olsem “brata” bilong em. (Mat. 25:40) Taim Jisas i kirap bek pinis long matmat na i go antap long heven, em i givim wok long ol “brata” bilong em long ‘kisim ples bilong em’ olsem ol ambasada i singautim ol narapela long kamap wanbel wantaim God Jehova. (2 Kor. 5:​18-20) Bilong  daun long wok lida bilong Krais, yumi mas i stap aninit long ol “brata” bilong em.

Yumi mas skelim gut tingting bilong yumi long ol tok kaunsel bilong Baibel i save kamap long taim stret bilong en long ol buk na nius bilong Baibel. Taim yumi stadi long Baibel na go long ol miting, yumi tingim gen ol tok bilong Krais. (2 Pita 3:​1, 2) Na yumi soim olsem yumi tenkyu long ol dispela kaikai bilong spirit taim yumi kisim long olgeta taim. Tasol yumi mas ting olsem wanem sapos sampela taim ol i kamapim wankain tok kaunsel? Olsem: Baibel i givim tok kaunsel long ol Kristen olsem ol i mas maritim poroman “i bihainim Bikpela.” (1 Kor. 7:39) Winim wan handret yia pinis, Wastaua i bin kamapim tok long dispela samting inap planti taim liklik. Ol brata bilong Krais i save wokim ol nius i gat ol dispela kain tok na ol narapela tok i kam long Baibel, na long dispela rot ol i soim olsem ol i laik bai yumi stap gut long samting bilong spirit. Taim yumi putim gut yau long ol dispela tok bilong kirapim gen tingting, em i wanpela rot bilong soim olsem yumi save bihainim nambawan Lida bilong yumi, Jisas Krais.

Sindaun 4:18 i tok: “Rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” Tru tumas, wok lida bilong Krais i wok long kamap strong moa​—em i no stap nating tasol. Narapela rot bilong wok gut wantaim ol “brata” bilong Krais, em yumi mas amamas long ol tok i tru bilong Baibel em “gutpela wokboi i gat savetingting” i bin mekim i kamap klia moa.​—Mat. 24:45.

Na yumi soim olsem yumi stap aninit long ol “brata” bilong Krais taim yumi wok gut wantaim ol wasman insait long kongrigesen Kristen. Aposel Pol i tok: “Yupela i mas bihainim tok bilong ol man i go pas long yupela na stap aninit long ol. Oltaim ol i was long yupela.” (Hib. 13:17) Olsem: Ating wanpela elda i givim gutpela tok long yumi olsem i bikpela samting long makim wanpela taim long olgeta wik long mekim Famili Lotu, o em i tokim yumi long sampela samting bilong wok autim tok bilong yumi. Ating wasman bilong raun bai givim gutpela tok kaunsel long yumi long wanpela pasin bilong i stap Kristen. Sapos yumi bihainim ol dispela kain tok kaunsel, dispela i soim olsem yumi bihainim Krais, em Lida bilong yumi.

Ol lain bilong dispela graun ol i sot tru long gutpela lida. Tasol taim yumi bihainim gutpela wok lida bilong Krais, yumi save kisim nupela strong! Olsem na yumi mas bihainim tok bilong Lida bilong yumi na wok gut wantaim ol man em i yusim long nau.

[Ol Piksa long pes 27]

Yu bihainim tok kaunsel bilong Baibel long no ken maritim man o meri i no bilip long Jehova?