Husat i Nambawan Bikpela Samting Long Laip Bilong Yu?

“Yu wanpela tasol yu God Antap Tru na yu bosim olgeta hap bilong graun.” ​—SNG. 83:​18, NW.

1, 2. Bilong Jehova i ken kisim bek yumi, bilong wanem pasin bilong save tasol long nem bilong en i no inap?

 ATING namba wan taim yu lukim nem bilong Jehova, em long taim wanpela i bin soim Song 83:18 (NW) long yu. Ating yu bin kirap nogut long ritim dispela tok: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” Bihain, ating yu yet i bin yusim dispela skripsa bilong helpim ol narapela long save long gutpela God bilong yumi, Jehova.​—Rom 10:​12, 13.

² Tru, em i bikpela samting long ol manmeri i mas save long nem bilong Jehova, tasol dispela samting tasol i no inap. Man bilong raitim song i kamapim narapela tok i tru em yumi mas bilip long en sapos yumi laik bai God i kisim bek yumi. Em i tok: “Yu wanpela tasol yu God Antap Tru na yu bosim olgeta hap bilong graun.” Yes, Jehova em i nambawan Bikman long heven na graun. Em i Krieta bilong olgeta samting, olsem na i stret em i ken ting olgeta samting i gat laip i mas daun long em. (Rev. 4:11) I gat as tru na yumi mas askim yumi yet, ‘Husat i nambawan bikpela samting long laip bilong mi?’ Yumi mas skelim gut bekim bilong yumi yet long dispela askim!

Tok Satan i Sutim Long God

3, 4. Olsem wanem Satan inap giamanim Iv? Wanem samting i kamap?

³ Ol samting i bin kamap long gaden Iden i soim olsem dispela askim i bikpela samting tru. Wanpela bikhet ensel, em bihain ol i kolim em Satan, em i grisim namba wan meri, Iv, long putim laik bilong em yet i go pas long tok bilong Jehova long no ken kaikai prut bilong wanpela diwai. (Stt. 2:17; 2 Kor. 11:3) Em i bihainim tok bilong Satan na dispela i soim olsem em i no rispek long wok bos bilong Jehova. Iv i no tingim Jehova olsem nambawan bikpela samting long laip bilong em. Tasol olsem wanem Satan inap giamanim Iv?

⁴ Taim Satan i toktok wantaim Iv, em i yusim ol tok i givim tingting kranki long Iv. (Ritim Stat 3:​1-5.) Namba wan samting, Satan i no kolim nem bilong Jehova. Em i yusim tok “God” tasol. Tasol man i bin raitim Buk Stat i yusim nem Jehova long namba wan ves bilong dispela sapta. Namba tu samting, Satan i yusim tok “ating.” Long dispela rot, Satan i laik givim tingting olsem dispela tambu God i givim i no bikpela samting. Namba tri samting, maski Satan i toktok long Iv tasol, em i yusim tok “yutupela.” Long dispela rot, ating Satan i traim long kirapim pasin antap bilong Iv, na mekim Iv i ting em yet i samting tru​—olsem em i mausmeri bilong em na man bilong em. Wanem samting i kamap? I luk olsem Iv i ting em i ken makim maus bilong tupela na tokim snek olsem: “Mitupela i ken kaikai pikinini bilong olgeta diwai bilong dispela gaden.”

5. (a) Satan i kirapim Iv long tingting strong long wanem samting? (b) Taim Iv i kaikai prut, em i kamapim klia wanem samting?

⁵ Satan i paulim tu ol tok. Em i laik kirapim tupela long ting olsem God i mekim pasin i no  fea na i tokim Adam tupela Iv olsem ‘i tambu long kaikai pikinini bilong olgeta diwai bilong gaden.’ Orait nau, Satan i kirapim Iv long tingting long em yet na long olsem wanem em inap mekim sindaun bilong em i kamap gutpela moa, na long ting olsem em inap kamap “wankain olsem God.” Bihain, Satan i kirapim Iv long tingting strong long diwai na prut bilong en, na no ken tingting long dispela Man i bin givim olgeta samting long em. (Ritim Stat 3:6.) Sori tru, taim Iv i kaikai prut, em i soim olsem Jehova i no nambawan bikpela samting long laip bilong em.

Tok Satan i Sutim Long Jop

6. Satan i sutim wanem tok long pasin bilong Jop long stap gut long God? Rot i op long Jop i ken mekim wanem?

⁶ Inap planti handret yia bihain, gutpela man Jop i gat rot long kamapim klia husat i nambawan bikpela samting long laip bilong em. Taim Jehova i tokim Satan long pasin bilong Jop long stap gut long em, Satan i tok: “Yu ting bai Jop i aninit long yu sapos em i no kisim wanpela samting long han bilong yu, a?” (Ritim Jop 1:​7-10.) Satan i save Jop i bihainim tok bilong God. Tasol em i tok Jop i tingim em yet na dispela i as na em i mekim wok bilong Jehova, i no olsem Jop i laikim Jehova. Jop tasol inap soim olsem dispela tok i giaman, na rot i op long em inap mekim olsem.

7, 8. Wanem ol hevi i painim Jop? Pasin bilong em long sanap strong na stap gut long God i kamapim klia wanem samting?

⁷ Jehova i larim Satan i kamapim planti bikpela hevi long Jop. (Jop 1:​12-19) Jop i mekim wanem taim ol hevi i painim em? Baibel i tok em i “no mekim sin na em i no tok nogut long God.” (Jop 1:22) Tasol dispela i no stopim Satan long toktok moa. Em i tok: “Mi ting sapos wanpela man i laik i stap gut, em inap givim olgeta samting bilong en bilong baim bek laip bilong en.” (Jop 2:4) Satan i tok olsem sapos Jop yet i kisim pen, em bai no tingim Jehova moa olsem nambawan bikpela samting long laip bilong em.

⁸ Bikpela sik i bagarapim tru skin bilong Jop, na meri bilong em i tokim em long toknogutim God na dai. Bihain, tripela pren giaman i sutim tok long Jop olsem em i mekim pasin i no stret. (Jop 2:​11-13; 8:​2-6; 22:​2, 3) Tasol taim ol dispela hevi i painim Jop, em i no lusim pasin bilong em long stap gut long God. (Ritim Jop 2:​9, 10.) Em i sanap strong na stap gut long God, na long dispela rot em i soim olsem Jehova i nambawan bikpela samting long laip bilong em. Na tu, Jop i soim olsem maski man i gat sin, em inap kamapim klia olsem tok Satan i sutim i no tru.​—Skelim Sindaun 27:11.

Jisas i Bekim Tok Satan i Sutim

9. (a) Olsem wanem Satan i traim long pulim Jisas long inapim laik bilong em yet? (b) Jisas i mekim wanem taim Satan i traim em?

⁹ Bihain liklik long Jisas i kisim baptais, Satan i traim long pulim Jisas long tingim laik bilong em yet na no ken tingim Jehova olsem nambawan bikpela samting long laip bilong em. Satan i kamapim 3-pela traim long Jisas. Namba wan, em i kirapim Jisas long inapim laik bilong em long kaikai, em i tokim em long tanim ol ston i kamap bret. (Mat. 4:​2, 3) Jisas i  no bin kaikai inap 40 de na em i hangre nogut tru. Olsem na Satan i kirapim em long yusim strong bilong em long wokim mirakel bilong pinisim hangre bilong em. Jisas i mekim wanem? Em i no bihainim pasin bilong Iv, nogat, em i tingim Tok Bilong Jehova na wantu em i sakim dispela traim.​—Ritim Matyu 4:4.

10. Bilong wanem Satan i tokim Jisas long kalap i go daun long banis bilong tempel?

¹⁰ Long namba tu traim, Satan i tokim Jisas long kalap i go daun long banis bilong tempel. (Mat. 4:​5, 6) Satan i laik bai wanem samting i kamap? Satan i ting olsem sapos Jisas i no kisim bagarap taim em i kalap i go daun, dispela bai kamapim klia olsem Jisas em i “pikinini bilong God.” Satan i laik bai Jisas i tingim em yet, olsem tingting tumas long gutnem bilong em, na mekim samting bilong pulim ai bilong ol man. Satan i save olsem man inap mekim kain samting olsem, sapos em i gat pasin antap na em i no laik kisim sem long ai bilong ol narapela. Satan i paulim tok bilong God, tasol Jisas i soim olsem Em i kliagut tru long Tok Bilong Jehova. (Ritim Matyu 4:7.) Taim Jisas i sakim dispela tok bilong Satan, em i kamapim klia gen olsem Jehova i nambawan bikpela samting long laip bilong em.

11. Bilong wanem Jisas i no laik kisim ol kingdom bilong dispela graun em Satan i laik givim em?

¹¹ Orait nau Satan i wok strong moa yet long pulim Jisas, em i tok em bai givim olgeta kingdom bilong graun long Jisas. (Mat. 4:​8, 9) Wantu tasol Jisas i sakim dispela tok. Em i save olsem sapos em i kisim ol dispela kingdom, dispela i makim olsem em i sakim wok bos bilong Jehova​—olsem rait bilong Jehova long i stap God Antap Tru. (Ritim Matyu 4:10.) Long olgeta dispela traim, Jisas i kolim ol skripsa i gat nem bilong Jehova long en taim em i bekim tok long Satan.

12. Klostu long taim Jisas i dai, em i mas wokim wanem disisen i hatwok long mekim? Samting em i mekim long dispela taim i givim wanem skul long yumi?

¹² Klostu long taim bilong Jisas long i dai na lusim graun, em i mas wokim wanpela disisen i hatwok long mekim. Long wok autim tok bilong em, em i bin kamapim klia olsem em i redi long givim laip bilong em olsem ofa. (Mat. 20:​17-19, 28; Luk 12:50; Jon 16:28) Tasol Jisas i save olsem ol man bai sutim tok giaman long em, na kot bilong ol Juda bai i tok olsem em i toknogutim God na em i mas i dai. Jisas i tingting  planti long dispela samting. Em i beten olsem: “Papa bilong mi, sapos inap, dispela kap i ken tekewe long mi.” Tasol em i tok moa: “No ken bihainim laik bilong mi. Nogat. Bihainim laik bilong yu tasol.” (Mat. 26:39) Yes, pasin bilong Jisas long stap gut long God i go inap long em i dai, i kamapim klia tru husat i nambawan bikpela samting long laip bilong em!

Yumi Bekim Tok Satan i Sutim

13. Long dispela stadi yumi lainim pinis wanem ol samting long pasin bilong Iv, Jop, na Jisas Krais?

¹³ Long dispela stadi yumi lainim pinis wanem ol samting? Pasin bilong Iv i lainim yumi olsem, ol man husat i tingim laik bilong ol yet o i tingim ol yet i samting tru, ol i kamapim klia olsem Jehova i no nambawan bikpela samting long laip bilong ol. Tasol Jop i stap gut long God, na dispela i lainim yumi olsem ol man i gat sin ol inap kamapim klia olsem ol i putim Jehova i stap nambawan, ol i sanap strong long taim bilong hevi​—maski ol i no kliagut long as na ol i karim hevi. (Jems 5:11) Pasin bilong Jisas i lainim yumi long redi long kisim sem na no ken wari tumas sapos ol man i bagarapim gutnem bilong yumi. (Hib. 12:2) Tasol olsem wanem yumi ken bihainim ol dispela skul yumi kisim?

14, 15. Taim traim i painim Jisas, olsem wanem pasin em i mekim i narapela kain olgeta long pasin bilong Iv? Olsem wanem yumi ken bihainim pasin bilong Jisas? (Stori long piksa long pes 18.)

¹⁴ No ken larim ol traim i mekim na yu lusim tingting long Jehova. Iv i larim traim i pulim tingting bilong em na em i no tingim narapela samting. Em i lukim prut ‘i naispela tru na i gutpela bilong kaikai.’ (Stt. 3:6) Jisas i bihainim narapela kain pasin olgeta taim 3-pela traim i painim em! Long olgeta 3-pela traim, Jisas i no larim traim i pulim tingting bilong em, nogat, em i tingting strong long ol samting bai kamap sapos em i pundaun long traim. Em i bihainim Tok Bilong God, na tu, em i yusim nem bilong Jehova.

¹⁵ Taim ol traim i pulim yumi long mekim ol samting Jehova i no laikim, yumi save tingting long wanem samting? Sapos yumi tingting long samting i pulim yumi, laik nogut bai kamap strong moa. (Jems 1:​14, 15) Yumi mas mekim samting hariap bilong rausim laik nogut, maski yumi mas mekim samting i hatwok tru long mekim, i olsem yumi katim na rausim wanpela hap bilong bodi. (Mat. 5:​29, 30) Olsem Jisas, yumi mas tingting strong long wanem samting bai kamap long pasin yumi mekim​—dispela bai mekim wanem long pasin bilong yumi long pas gut wantaim Jehova. Yumi mas tingim tok bilong Baibel. Long dispela rot tasol yumi inap kamapim klia olsem Jehova i nambawan bikpela samting long laip bilong yumi.

16-18. (a) Wanem samting inap bagarapim tru bel bilong yumi? (b) Wanem samting bai helpim yumi long karim ol hevi?

¹⁶ Yu no ken larim ol hevi i kirapim yu long bel nogut long Jehova. (Snd. 19:3) Yumi kamap klostu moa long pinis bilong pasin nogut bilong dispela graun, na planti manmeri moa long lain bilong Jehova i karim hevi bilong ol bikpela bagarap na hevi. Yumi no ting olsem Jehova bai wokim mirakel bilong lukautim yumi long dispela taim. Tasol olsem Jop, ating bel bilong yumi i bagarap taim wanpela yumi laikim tru em i dai o ol hevi i painim yumi.

¹⁷ Jop i no save bilong wanem Jehova i larim ol hevi i kamap, na ating sampela taim yumi tu i no kliagut long as na ol samting nogut i save kamap. Ating yumi harim stori bilong ol gutpela brata i dai taim graun i guria, olsem long Haiti, o ol i dai long sampela narapela bikpela bagarap. O ating yumi save long wanpela brata o sista i stap gut long God na ol raskol i mekim nogut long em o em i dai long eksiden. O yumi bel hevi taim sampela samting i givim hevi long yumi yet o yumi ting wanpela i mekim pasin i no stret long yumi. Ating yumi bel hevi tru na tok olsem: ‘Jehova, wai na dispela samting i kamap? Wai na dispela i painim mi? Mi bin mekim wanem rong?’ (Hab. 1:​2, 3) Wanem samting bai helpim yumi long karim hevi long kain taim olsem?

 ¹⁸ Yumi mas was gut, nogut yumi ting ol kain hevi olsem i makim olsem Jehova i no orait long yumi. Jisas i kamapim klia dispela taim em i stori long tupela bikpela hevi i bin kamap long taim bilong em. (Ritim Luk 13:​1-5.) Planti hevi i save kamap bikos “taim nogut i save painim yumi olgeta.” (Sav. 9:11) Tasol maski wanem samting i as bilong bel hevi bilong yumi, yumi inap karim dispela hevi sapos yumi putim tingting bilong yumi i go long “God bilong mekim isi bel bilong ol man long olgeta kain taim.” Em bai givim strong long yumi inap long yumi ken stap gut yet long em.​—2 Kor. 1:​3-6.

19, 20. Wanem samting i helpim Jisas long karim hevi bilong ol samting i semim em? Wanem samting inap helpim yumi long bihainim pasin bilong em?

¹⁹ Yu no ken larim pasin bilong tingim gutnem bilong yu o pasin bilong pret long kisim sem i kamap bikpela samting long yu. Pasin daun bilong Jisas i helpim em long ‘lusim olgeta samting em i bin holim na kamap olsem wanpela wokboi.’ (Fili. 2:​5-8) Em i bilip olsem Jehova bai helpim em, olsem na em inap karim planti hevi bilong ol samting i semim em. (1 Pita 2:​23, 24) Long dispela rot, Jisas i putim laik bilong Jehova i stap namba wan, olsem na God i givim bikpela namba moa long em. (Fili. 2:9) Jisas i tokim ol disaipel long bihainim wankain pasin.​—Mat. 23:​11, 12; Luk 9:26.

²⁰ Sampela taim, ating samting i traim bilip bilong yumi inap mekim yumi sem. Tasol yumi mas i gat wankain tingting olsem bilong aposel Pol husat i tok: “Long dispela as tasol mi karim ol dispela pen na hevi, tasol mi no sem. Long wanem, mi save long dispela man mi bilip long en, na mi save gut olsem em inap lukautim dispela samting mi bin putim long han bilong em i go inap long de bilong kot.”​—2 Tim. 1:12.

21. Maski ol man bilong graun i tingim ol yet tasol, yu tingting strong long mekim wanem?

²¹ Baibel i tok profet olsem long taim bilong yumi ol man bai “laikim ol yet tasol.” (2 Tim. 3:2) Olsem na yumi no kirap nogut long yumi stap namel long ol man i tingim ol yet tasol. Yumi no ken tru kisim dispela kain pasin! Nogat. Maski ol traim na hevi i painim yumi, o ol man i laik semim yumi, yumi olgeta wan wan i mas strong long kamapim klia olsem, tru tumas, Jehova em i nambawan bikpela samting long laip bilong yumi!

Yumi Kisim Wanem Skul Long . . .

• pasin bilong Satan long giamanim Iv?

• pasin Jop i mekim taim ol hevi i painim em?

• samting i nambawan bikpela samting long Jisas?

[Askim Bilong Stadi]

[Piksa long pes 17]

Iv i no tingim pasin bilong em long pas gut wantaim Jehova

[Piksa long pes 18]

Jisas i sakim ol traim bilong Satan na i tingting strong long mekim laik bilong Jehova

[Piksa long pes 20]

Autim tok long ol haus sel bihain long bikpela guria long Haiti

[Ol Piksa long pes 20]

Long taim bilong hevi yumi ken tingting long “God bilong mekim isi bel bilong ol man”